Etotepo lyOvamboland People’s Organsation lya tsikila

0
222

Okommissi ya Good offices

Omumvo 1958 Aakwaniilwa Hosea Kutako na Samuel Witbooi oya li ya shangele IigwanaHangano ombapila tayi nyenyeta kombinga yombelewa ya li ya dhikwapo kolutu ndoka. Ombelewa ndjika hayi ithanwa Good Offices  Commission.Ndjika oya li noshinakugwanithwa oku kundathana nepangelo lyokatongo lya South Africa kombinga yondjila yi na okulandulwa opo South West Africa a gandjwe momake gIigwana Hangano.Oshilyo shoKommissi ndjika yaantu yatatu nomukwashigwana gwa Britania, Sir Charles Undery okwa li a kala ashike ootundi dhimwe dhimwe moshigongi po Kaiti. Okommissi oya ka gandja ethaneko kutya South West Africa na topagulwepo, opo oshitopolwa konyala oshinene shoshilongo sha li hashi ithanwa ehala lyaapolisi naamuka omo mwali iilumbu oyindji nashi ninge oshitopolwa sha South  Africa.

Omanga iitopolwa ayihe mbyoka ya hupako ngaashi Ovamboland, Kavango, noshowo Caprivi lyokuuzilo mwakwatelwa no Kaokoland ogo na ga gandjwe ongo omahala giinekelelwa okulelwa kIigwana Hangano.Ndele nando ongawo andola omahala ngaka otaga kala taga wilikwa ko South Africa pehala lyIigwana Hangano. Ihe kutse etopolo ndika ka lya li ekandulepo lyomukundu gwa South West Africa. Aakwashigwana yaAmerica yeli yaali mboka ya li iilyo yo ka kommissi haka oyi ikuthamo muko no ya ti oshikumungu shuumbugantu wa Africa na shi longwe nasho kaaBritania.Ethaneko ndika olya li lye ekelwahi kOmutumba gwaayehe gwIigwana Hangano. Ihe nando ongawo omawi shono ga yalulwa oga ulike kutya iilongo 21 oya hogolola ya hala South West Africa a topagulwe.Iilyolongo omilongo ne nashimwe oya tokola kutya oshinima shika kashi li nawa. Iilongo omulongo na shimwe inayi hogolola sha kokutya ina yi ulika kutya otayi  yambidhidha ethaneko linipo.Omahogololo ngaka oga li ga ende ngaaka pethimbo ndyoka iilongo oyindji muAfrica ya li natango muukoloni no ina yi manguluka no ku ninga iilyolongo yIigwana Hangano.Iilongo yaAfrica mbyoka yali iilyo yo UN  Oya li ashike Ethiopia na Egypt,.Mbika opamwe na India oya li ya kondjele oshikumungu sha South West Africa.India okwa kala aluhe omuyambidhidhi gwaantu ya Namibia okuza tuu nkene Iigwana Hangano ya totelwepo mo San Fransisco.

Omumvo Iigwana Hangano ya totwa, ndjayi Smuts okwa li a kalelepo oshilongo she South Africa eli momuzalo gwoshikwiita, a li ta dhiladhila kutya ngiika oyendji ota ye ke mu dhimbulula ndele kapwali nando ogumwe ngoka emu koneke.Omikalo dhomakoto dha South Africa melongelokumwe nokakommissi  hoka otwa kala twe dhi tala nawa tse aagundjuka mboka twa li mekwatathano nomukwaniilwa Hosea Kutako. Ishewe omayamukulo ge oge tu kumike noku tu koleka. Hatse  atuke twa li twa kondjitha oondungethaneko dhokommissi ndjika ndele naayalwe mIigwana Hangano mboka ya li haya shanga omikanda nyenyeto kombinga ya South West Africa oya li woo inaa ya nyanyukilwa iilonga yokomissi ndjoka. Oshifonkundana the Windhoek Advertiser osha li sha endulula elondodho lyomusita, Michael Scott kutya ngele aantu ya South West Africa ina ya pewa oompito dhelunduluko lyopakotampango, otashi vulika pu ka tukuke einyengo nenge endwafuko enene ndyoka inaali monika nale mondjokonona yomuntu.

Shoshene oshili oondjika kutya pethimbo ndyoka mo South West Africa ka mwali nando ompito ta yi fala melunduluko lyopakotampango onkene shoka sha li sha tegelelwa osho endwafuko enene.Pethimbo ndyoka omukwaniilwa Hosea Kutako okwa ulike kutya ye ohe yopolitika ompe moSouth West Africa molwashono okwa teyapo omayinda gopamuhoko sho a shaina omikandanyenyeto ndhoka dha tumwa kIigwana Hangano pamwe nomukwaniilwa Samuel Witbooi gwaaNama, nokuza meyovi limwe 1959 okwa shaina woo nangame ongo omuperesidende gwOvamboland’s People’s Organisation[OPO].Shika osha li eyokomeho enene mopolitika yoshilongo. Pethimbo ndyoka ngame onda li nda unganeke aaniilonga yokondalaka nenge yokondhalate ngaashi yamwe ya li ye yi luku oyendji yaambaka oomboka ya za kiitopolwa yokuumbangalantu woshilongo. Onda li nde shi ningi oshoka aaleli yopamuthigululwakalo yaantu mbaka yamwe oya li ha ya longele kumwe nepangelo lyiilumbu yokatongo, unene mokuthindila aalelwa yawo opo ya ka zalekwe okaholo nongeyi ya ka longe kondhalate kohi yehangano ,lya South West Africa Native Labour Association [SWANLA]. Omukalo gwoku kutwa miilonga nguka ogwa li ashike iilonga yuupika wowene.

 Enwethemo lyokatongotongo lya tsikile  

Pethimbo ta tu kondjo opo tu teyepo iilonga yuupika yokondalaka otwa kala tu shishi kutya iilongo yilwe mbyoka ya li iikolonyekwa ya Ndowishi oya gandjwa miikaha yo UN, omanga South West Africa a kala kohi yepangelo lyokatongo lya South Africa.Aatiligane oyendji aaSouth Africa oya dhiladhila kutya aantu oyendji moshilongo shika na unene tuu aapopi yOshiwambo ota ya kala yuuvite ombili molwaashoka ina ya longwa sha. Edhiladhilo ndika olya ka kolekwa komusitagongalo gumwe Omundowishi, omundohotola Vedder, noshowo a ka ninga oshilyo shoParliamende ya South Africa ngoka a li megumbo ndyoka a kalelapo aniwa aavalelwamo yomoSouth West Africa. Nguka okwa li ehole  okupopya kutya aavalelwamo ya South West Africa ina ya pewa elongo oshoka ngele shika osha ningwa osha fa iilumbu  tayi pewa okambi opo yi iitete omiligu nenge tu tye yiidhipage.

Omolwashoka pethimbo ndyoka aavalelwamo mevi ndika kaya li ya longwa pombanda oyendji.Mboka ya mono elongo ndyoka ongaashi  nakusa Fanuel Kozonguidhi ngoka eshi pondola oku pita omatrica mo South Africa nokuya koUnivesiti ya Fort Hare, hoka kwa longwa aawiliki oyendji yiilongo yamanguluk ya aAfrica.Yalwe aashona woo mboka ya longwa ongaashi omusitagongalo , Theophelus Hamutumbangela na Clemens Kapuuo mbaka oya adha onkatu yuulongi wonzapo yo Junior okulonga omanongelo gopevi.Oonzapo ndhika oye dhi mono miiputudhilo ya South Africa.

Epangelo lya South Africa olya li lya kambadhala ngaashi tali vulu oku tu kaleka monima. Omumvo 1959 shono twa ndhindhilke shika otwa tokola oku tuma omunasikola gumwe kocollege koKapa opo e ki ilongele uutseyimpango opo a kale te tu popile. Otwa li twa tumu Onesmus Shikongo Akwenye, ngoka twali ha tu mu futile iipoda 60 komumvo. Ndele iilumbu  oya ka dhimbulula shika ta tu ningi noya kwata Akwenye noku mu tidhila ko South West Africa, Akwenya okwa ka tokola a ye muundjendi opo e ki ilonge elongo ndyoka aatiligane yaa South Africa ya li inaa hala eli mone. Akwenye okwa li a longo ongo amushanga takalele  gwopevi moshikondo shUundjolowele Nonkalonawa, nopethimbo ndika oku li moshipundi shevululuko. Gumwe gwetu , Mburumba Kerina okwa yi koNew York hoka e ki ilonga mo Univesiti ya Lincoln moka a mono oonkatu dhelongo. Omukwawo gumwe Hans Beukes ngoka a pewa  iimaliwa yoku ilongitha mekwathelo lyomwiilongi omuAmerica, Allard Lowenstein.

LEAVE A REPLY

Please enter your comment!
Please enter your name here