Omina kekango laUkwambi ota i dulu okuya komesho -Enviro Dynamics

0
323

Ku Helvy Shaanika

EMBANDU – Ehangano olo la ninga omapekaapeko mokutala omauwa nomawii oku etapo omina mekango lomongwa mOukwambi, ola yandja omayele, opo e etepo lopoloyeka ei liye komesho.

Eloise Carstens wehangano lo Enviro Dynamics oo kwali ta yandje olopota yomapekaapeko oo a ningwa kehangano laye okwa ti nonande eetepo lomina yomongwa mOukwambi oli na omawii, omauwa oo ta a ka etwa komina oyo, omahapu no ena ondjudo, idulife omawii.

“Fye ohatu yandje omayele kutya opoloyeka ei nai ye moilonga shaashi ota i ka kwafela moku xwepopeka omaxupilo moNamibia  okuyandja ouyamba kovakalimo vomomudingonoko omo muna ekango lOtjivalunda, oku kwafela mexumokomesho nomokuyandja eemhito doilonga,” Cartens ta ti.

Omashilafano moshikumungu shekango lomongwa lOtjivalunda okwa tameka odula ya djako eshi ehangano lo Gecko Namibia la tokola opo li tunge omina mekango lomongwa olo lili metonatelwa nhele yaIipumbu ya Shilongo Conservancy, onhele oyo ya li oshitukulwa sheEtosha National Park.

Momudingonoko omo muna Otjivalunda omuna omakango amwe omongwa ashike Otjivalunda osha talikako onga ekango olo li na omongwa una omulyo udule womomakango makwao.

Elelelo laUkwambi otali popile eetepo lomina yomongwa, ashike ovakwashiwana vahapu oveli omhinge noshinima eshi. Etomhelo lopokati lelikolelelwa kulo kovakwashiwana ololo kutya omina ita i ka kufa ashike omongwa wokombada ngaashi oshi sha kala hashi ningwa kovakwashiwana ashike ota i ka fa no mokuhanaunapo etindi olo la kaleka ekango li li ngaashi li li nohali eta po nokuhapupalifa omongwa paushitwe omido omafele.

Ovakwashiwana ova tomha yoo kutya omina ota i dulu oku eta omaweelelo nondwi oyo tai dulu oku naipika oukolele wovakwashiwana vopopepi nomina nowovanailonga ovo tava ka kutwa mo. Ovakwashiwana otava ti omina otai dulu okupiyaaneka oushitwe mwakatelwa, oudila noupuka ovo hava hupile nokudalela pekango opo. Oshitwa shinene osheshi kutya, ekango olina ongushu pamufyuululwakalo naau tekeli piyaaneka ota ka piyaaneka nokushundula ongushu yomufyuululwakalo.

Ashike molopota yaye, Carstens okwa lombwela omalenga, oovene vomikunda navamwe vomovakwashiwana vomOukwambi ovo vali veuya koshiufanene kutya ehangano laye ola longifa ovashivi vonawa noshoyo ovanongononi mokuninga omapekapeko.

Carstens okwati, ngeenge ehangano olo la hala oku ka mina mekango ola shikula omayele oo ta a yandjwa ko Enviro Dynamics, nena ita pa kakala pena oupyakadi wakula ngaashi ovakwashiwana tava dilaadila.

“Eyele eli tu na ololo kutya, ehangano eli tali ka mina mekango, ina li mina momakango aeshe a vali oshita ndele nava tameke tete naali lokoushilo, olo iha li longifwa naana, opo nee ngee va mane tava kufapo omatungo avo ndee tava lalakanifa po nawa.

Ngeenge va mane ekango lokoushilo, okwa pumbwa nee oku ninga omapekaapeko konima yeedula omulongo ku talwe ngeenge ekango olina tuu natango ongushu komufyuululwa kalo wOvakwambi. Keshe nee oshidjemo osho tashi ka djamo, naku minwe ashike etata lekango, loo etata likwao tali fiwa li li ngaashi li li,” Carsten ta yelifa.

Carstens okwa twikila kutya, ehangano laye ota li ka yandja yoo omayele opo keshe ou taka mina mekango omo a longife omashina oku keelela ondwi nomaweelelo nokukala tava fi oshisho oku shasha omeva opo ku amenwe ondwi mokati kovanhu.

“Aa, omafaneko ashike nomayele hatu yandje, ehangano letu kali na oufemba okutya mekango namu minwe ile ahawe. Ehangano olo tali ka hala oku tula mo omina mekango natango olina oku mona ombapila kOuministeli wEemina nOikwanghono,” Carstens ta yelifa.

Olopota oyo ya yandjwa ku Carstens ina i tambulwako nawa kuvahapu ovo vali moshiongalele ovo tava ti omauwa oo taa ka yandjwa kopoloyeka, itaa kalelele shaashi omina oyo ota i kakala ashike oule fimbo weedula 25, omanga ngeenge ekango ina li kumwa otali yandje omauwa taa kalelele. Ovakwashiwan tava ti ekango ola longifilwe kovakuluvonale, ota li kwafa epupi lopaife nota li ka kwa kwafela omapupi ta eya, mokuyandja oiyemo ta i di kovatalelipo nomelandifo lomongwa, nai kwao ihapu.

Umwe womovakwashiwana oo eli yoo oshilyo koshokakomitie kashona metonatelwanhele Iipumbu ya Shilongo Lukas Nantanga otati oku mina mekango, itaku nyonauna ashike oushitwe nokupiyaaneka omauwa ovakwashiwana taakalelele, ashike okuli kondje youtendo vahapu vopaveta, mwakwatelwa nekotamhango laNamibia.

Leonard Nangolo Mukwiilongo oo a li nale Gavana waMusati, okwa yandja ombedi tati kutya Ovakwambi aveshe ovali vena oku ongwelwa opo va yandje omadilaadilo avo.

Mukwiilongo ta ti oshikumungu shekango oshili kondje yo othema oyo hai longifwa kepangelo laNamibia oyo i lilepo oku hokifwa ova Namibia oshilongo shavo oyo ta i ti ‘edu letu, efyuululo letu, ounhwa wetu.

“Paife eshi tashi ningwa apa osha fa takutiwa, ‘edu lange, efyuululo lange, ounwa wange’. Shaashi ope na ovanhu oohandimwe ovo tava lalakanene ashike eendjato davo ndele hashiwana. Omina oyo  ota iya i femo etindi, hano shahala kutya konima yayo ita pa kala vali ekango.

“Oshinima eshi ta mu tulombwele apa omwa fa ashike tamulombwele omunhu ta i kundhohotola ta a ka kufwe omungo momakipa nohonde. Omunhu oo ota kala tuu nomwenyo?” Mukwiilongo ta pula.

Moshinima omu otuna ngeno oku kala hatuti,  ‘edu letu, ekango letu, efyuululo letu, ounhwa wetu fye Ovakwambi,” Mukwiilongo ta ti.

LEAVE A REPLY

Please enter your comment!
Please enter your name here