Omuhongifikola a kwatwapo molwa ekwatonghonga

0
267

Ku Helvy Shaanika

Opolifi mOshitukulwa shaShana oya kwata po omuhongifikola ta tamanekelwa ekwatonghonga lomukainhu weedula 23.

Oshiningwanima eshi osha ningilwa pomukunda Omaalala oo uli pokati kOngwediva nOndangwa, onguloshi yOmaandaxa oshivike eshi.

Pamulombo oo wa yandjwa kOmukulunhu wOpolifi mOshitukulwa shaShana Komishina Ndahangwapo Kashihakumwa, omuhongifikola, nokakadona aka ova enda mokatekisa kamwe oko keva tula pOmaalala.

Eshi va helukamo omulumenhu vati okwa lombwela omukainhu ou opo va pite moixwa imwe ili pOmaalala opo nokuya keumbo lonhumba.

Eshi va fika meumbo, omulumenhu vati okwa pula omukainhu opo va ye moixulo,  ashike  eshi omukainhu a anya, omulumenhu ou womuhongifikola okwa tameka okudenga omukainhu, nokumu kwata keenghono.

Omukainhu okwa lopota oshiningwanima kopolifi nomulumenhu okwa kwatwa po nokwa teelelwa a holoke momhangu oshivike eshi.

Kahihakumwa okwa kunghilila ovakainhu opo va kotoke, va ha efe oku kala tava hekwa hekwa kovalumenhu vehe va shi osho tashi dulu okuva etela oshiponga.

“Ngeenge oushi kutya kuna ehalo lomulumenhu oo, ino itavela u ende naye momangade ile muye naye konhele yonhumba. Oshinima shotete, omunhu ou kumushi ove vali kuna omahalo naye.

Ounyuni kemuwa, onghee ounona vatu, ovamwamemekadona, oomeme vetu -novakainhu vetu nava kotoke, shaashi omunhu oteku twala ashike konhele uhe shiko, oko kuhe na nande oumwe teku udu nande ou kuwe,” Kashihakumwa ta ti.

LEAVE A REPLY

Please enter your comment!
Please enter your name here