Omukulupe ta fekelelwa ekengelelo a pewa iifutilemo

0
191

Ku Albertina Nakale

Windhoek- Omukulupe ngoka ta tamanekelwa ekengelelo sho ta ku tiwa kutya okwa yuga epangelo konyala oodola omayovi N$42 000 okuza moshiketha shopenzela yaakuluntu mokugandja oomvula dhuukokele we dhaashi dhoshili okwa pewa iifutilemo oodola oamyovi N$ 8 000 mondholongo yopolisi  pEenhana.Okwa pelwe iifutilemo mondholongo shiwike shayi omanga a li mompangu ya mengestrata mEenhana, Iihokolola ye oya undulilwa komeho sigo omomsaiku 20 ga Januali 2014.

Omufekelwa Faustina Simon ngoka ta fekelelwa ekengelelo okwa kala mondholongo okuza momwedhi gwa Kotoba na okwa li tango a tindilwa okwiifutilamo miikando ayihe iyali mbyoka ye a holokele mompangu pEenhana.

Omufekelwa nguka okwa kwatelwepo koplisi momasiku 16 ga Kotoba nuumvo, nota tamanekelwa ekengelelo, okufundjaleka nosho tuu. Opolisi  oya ti  iiningwanima mbyoka Simon ta tamanekelwa oya za komumvo 2006. Omukiintu nguka omukokele ota ku fekelwa a kengelele oholomende sho aniwa a kala nokulongitha uumutse uyali wiifundja. Kamwe otaka ulike ena omimvo 63 omanga okakwawo otaka ti okuna omimvo 68. Ota lundilwa kutya okwa kala ha taamba openzela lwaali mokulongitha uutse mboka uyali. Opolisi oya ti  ota yi fekele kutya  Simon okwa longitha omishangwa dhekengelelo opo a pewe okamutse hoka ke mu ningi a kulupa oku yeleka noomvula dhe dhoshili, naashika okwe shi ningi opo a tameke oku pewa openzela konyala omimvo ne omanga inaa gwanitha omimvo 60 ndhoka odho dhili paveta opo omuntu a tameke oku kwata openzela yaakulupe.

Omalenga gomikunda dha Hauwanga oga ti oga haluthwa koshinima shoka, ga ti ka ga li ge shiwo kutya Simon okwa li ta longo uukengeleli wa tya ngaaka, sigo oosho opolisi ye ya kuyo noku ya ulikila uumutse noombapila dhilwe  ndhoka  nguka  a li ta  longitha oku kengelela epangelo. Omunambelewa gwopolisi eli omukwatakanithi mekondjitho lyomiyonena moshitopolwa shaHangwena, Abner Agas okwa koleke kutya omukulupe ngoka okwa pewa opo iifutilemo mondholongo noodola omayovi gahetatu. Agas okwa ti ina tseya we nee ngele nguka osho a futu omwaalu ngoka opo aze mo mondholongo.

Omukuluntu gwopolisi moshitopolwa sha Hangwena Komisina Tylves Kampolo okwa ti Simon oku na oonzapo dhili mbali dhomavalo ndhoka a longitha oku ishangitha opo  a kwate openzela. Yimwe ota yi ulike kutya okwa valwa momumvo 1945 omanga onkwawo otayi ti okwa valwa momumvo 1950. Okwa tameke ku kwata openzela omumvo 2006 sho a longitha evalo lyomumvo 1945. Omumvo 2009 okwa ka pewa onzapo yuudhapo mundjoka uulike kutya okwa valwa momumvo 1950. Omumvo 2010 Simon okwa tsakanitha omimvo 60 onkene okwa li ena uuthemba paveta oku tameka oku kwata openzela, naashika oshe mu pe ompito opo iishangithe  ishewe olutiyali nongeyi aniwa okwa kala ta kwata openzela yepangelo lwaali komwedhi.

Kakele kaashika Simon ota nyenyetwa woo kaanamukunda oyakwawo oshoka aniwa  ohe eta uupyakadhi momukunda,a lundilwa aniwa adhipaga po oshingulu sha mushiinda oshisimba noku fumvika uungulwena. Moshiningwanima shoka Simon okwa futithwa odola eyovi limwe noongobe mbali  koveta yopamuthigululwakalo. Oshiningwanima oshikwawo ota lundilwa aniwa a pandeka oondongi ndatu dha mushiinda she  noku dhi  hepeka noonkondo aniwa  sigo otadhi  si.

LEAVE A REPLY

Please enter your comment!
Please enter your name here