Omunangefa a yashwa ku Walye

0
184
Komufala wOpolifi mOshitukulwa shaShana Komishina Ndahangwapo Kashihakumwa

Ku Helvy Shaanika

ONGWEDIVA – Omunangeshefa umwe mOngwediva okwa yashwa nokwa monifwa oshiponga neenghono kovalumenhu veheshivike. Oshiningwanima eshi osha ningilwa meumbolaye mOngwediva exuliloshivike ladjako.

Komufala wOpolifi mOshitukulwa shaShana Komishina Ndahangwapo Kashihakumwa okwati opolifi oya patulula oshipofa shonghendabala yedipao nomushingi umwe wokatekisa okwa kwatwapo moshiningwanima eshi.

Kashihakumwa ta hokolola kutya onguloshi yEtitano loshivike shadjako ovalumenhu veheshivike ove li teela meumbo lomunangeshefa Niklaas Mouton, ena omido 30, mwene wonegeshefa yokutunga, yedina Dumpco Site.

Mouton oo a li te likosho pefimbo eengangala deuya meumbo laye, vati okwa uda omalinyengo ma limbilika, naashi a djamo ngeno a tale osho sha li ta shi linyenge okwa yashwa, ku umwe womovalumenhu ovo.

Pefimbo opo omukulukadi waMouton nounona vaye navo omo vali meumbo, ashike vo ina va ningwasha.

Nonande ouyelele ina u yela naana, ota ku hokololwa kutya Mouton okwa yashwa monhulo, kombinga yokolulyo nomepepe kombinga yokolumosho, neeholo adishe oda pitamo molulutu laye.

Kashihakumwa ota hokolola kutya, Mouton okwa li a twalwa me endelelo kOshipangelo shOpaumwena kOngwediva Medipark nonghalo yaye paife ota i etifa eenghono.

Kashihakumwa okwa lombwela Kundana tati mongaha opolifi oya kwata po omulumenhu umwe oo taku fekelwa kutya oye a pele ovakolokoshi ovo olefa eshi va ka longa oilonga youlingilingi keumbo la Mouton.

“Pahokololo laye, otati eengangala odo ode mu kwata po ombabyona opo edi twale dika longe omunyonena, ashike opolifi ota i konaakona manga opo i tale ngeenge mehokololo laye omu na tuu oukwashili. Paife oku li manga konima yekumba,” Kashihakumwa ta ti.

Nonande eengangala edi da faduka po ashike nongodi yopeke ya Mouton, komufala wopoliofi ota ti opolifi ota i fekele kutya ovalumenhu ava ova longa oilonga ei yoikulumuna, nekwafelo na umwe ile vamwe vomovanailonga va Mouton.

Ota ku hokololwa kutya, Mouton okwa ningile eemwedi nhatu ina futa ovanailonga vaye nokwali a udaneka opo eva pe oshimaliwa shavo efiku la landula olo loikulumuna.

Hano opolifi ota i fekele kutya ota shi dulika umwe womovanailonga vaMouton a nofwela ko eengangala kutya otashi dulika Mouton a kale ena oimaliwa meumbo.

Mupya munene ina va hanga mo sha, nova ya ashike nongodi yaye yopeke.

Kashihakumwa ta ti eshi shimwe ashike shomoikulumuna ihapu taku fekelwa kutya oha i longwa mekwatafano novanailonga vomomahangano omoshitukulwa oo taa longelwa omunyonena.

“Oikulumuna oyo ta i longwa mekwafelo novanailonga vomomahangano ile meengeshefa ota i tu hepeke, ota i hepeke oshitukulwa, nomukundu ou ota u kandulwapo ashike ngeenge oovene veengeshefa navo vene tava kala veli oupafi mokukeelela oulingilingi woludi eli.

“Ovanhu vetu ove na okushiiva kutya, nonande omivalu doimbuluma ka di li pombada unene moshitukulwa, inava kala vena ouhasha. Ookalyamupombo pefimbo eli o tava longo noudiinini ve limonene oimaliwa yoKrismesa noyomudo mupe. Onghene natu file eemwenyo detu oshisho, fye natu fye oshisho shovanhu vetu,” Kashihakumwa ta londwele.

Komufala ta kunghilile kutya ovanhu nava kale alushe hava fi oshisho oku kala veli patela momaumbo avo, nongeenge veudite omalinyengo taa limbilike, nava  delenge ile va tume oSMS kopolifi meendelelo.

LEAVE A REPLY

Please enter your comment!
Please enter your name here