Oshiwana pOhakafiya inashi hala lomalenga mape

0
256

Ku Clemence Tashaya

EENHANA – Ovakalimo vomomikunda Ohakafiya mOshitukulwa Ohangwena ova ningile ehololomadiladilo oshivike sha djako veli omhinge neuliko lomalenga avali manene  Ephraim Weyulu na  Toivo Shiweda.

Omalenga aa okwa ulikwa konima eshi ovaHakafiya ya tukulwa moikandjo ivali.

Ongudu yovahololi vomadilaadilo oya li ya kwatelwa komesho kopolifi okudja kOhakafiya fiyo okombelewa yaNgoloneya woshitukulwa shaHangwena Usko Nghaamwa kEenhana. Osheendo osha li mewiliko la Hamushanga waHakafiya Ndiilenga Moses ou a lesha omukanda womanyenyeto omhanga ine u yandja momake a ngoloneya.

Ngolonea  Nghaamwa okwa tambula omukanda oo nokwa udanekele ovakwashiwana ovo nokutya ote ke u twala kelelo lopamufyuululwakalo laUkwanyama olo tali wiilikwa kOhamba, Meekulu Martha Kristian Nelumbu.

Hamushanga wOhakafiya okwa hokololele oshifo sho New Era kutya euliko lomalenga oo avali  noshoyo etukulo lOhakafiya moitukulwa ivali kali li pakotamhango nomaufo oshilongo shaUkwanyama. Omolwa oshinima eshi ovakwashiwana mediko lomikunda edi ova tokola oku holola omadilaadilo avo inaa va hafela omatokolo oo. Ovati vo ina va panda oshinima osho osheshi ka va li va kundafanwa navo opo yoo va yandje omayele avo.

“Namibia oshitunda shoudemokoli onghee ouhamba waUkwanyama owa li una oku popya nafye ongo ovalelwa, fimbo omalenga aa ina a ulikwa nokutulwa koipundi.

“Shikwawo vali osheshi nokutya opa li pena elenga olo la li ta li yakula fimbo ta pa hoololwa elenga lipe ndele nee omuwiliki ou naye ina kundafanwa naye kutya nee omoshiima shetukulo lomukunda ile osho shenangeko lomalenga aa,” Moses ta ti.

Moses, okwa ti omalenga oo avali , Ephraim Weyulu na Toivo Shiweda okwa ulikwa momafiku Auguste 20, neudo ndele nee ewiliko olo la hangikapo  kala li la shiivifilwa oshinima osho, shoyo noshiwana kasha li sha lombwelwa opo nasho yoo shi yandje omaliudo asho.

“Ouhamba wetu oo tau ufa ashishe, ashike ovawiliki vetu vokomikunda navo ovena yoo okupewa omhito oku yandja omaliudo nomayele avo omhanga euliko nenangeko lomalenga mape ina li ya moilonga. Onghee ohatu indile kelelo laUkwanyama opo li ninge omahoololo opo fye tu hoolole omalenga manene oo fye twa hala. Shikwawo fye inatu hala omukunda wetu wa tukulwa moinhimbu ivali, ngaashi sha ningwa fye inatu lombwelwa,” Moses ta ti.

Ovakwashiwana ova lundile yoo oilyo imwe melelo lopanghedi lOukwanyama vati vehena efimaneko lovaleli vepangelo loshilongo sha Namibia  onghee ova hala ovanhu ovo opo va tewa tewemo moilonga yokuwilika omikunda.

Ovalesha omukanda womapandja a tatu womanyenyeto wa ndjadjukununa omaindilo nomailikano avo, opo nee ove u yandja ku Ngolonea Nghaamwa.

Omudo wadjako opa li okuhena ombili nelelo lOukwanyama , vati molwashi Ohamba Martha Mwandinomho Kritstian Nelumbu  ha  pangele itaa nyamukulwa na oha tula moilonga noku kufa ovawiliki moilonga ngaashi eudite.

Pefimbo eli opena oihokolola mOmhangu yOpombada yoshilongo omo omalenga atatu manene tava kondjifa etaatao lavo moilonga youlenga kOhamba yOukwanyama.

LEAVE A REPLY

Please enter your comment!
Please enter your name here