Oulodi mEvululuko ota u twikile

0
298

Komudindoli

ONGWEDIVA – Onghalo youlodi oyo vati yakala ta i hepeke neenghono  ovakalimo vomolukanda Evululuko mOshakati onghee ta i pula komesho.

Onghalo ya tya ngaha oyali ya fininika engafifi lovakalimo vomolukanda omo li ka lopotele Komufala wOpolifi mOshana omahepeko aa. Komishina Ndahangwapo Kashihakumwa okwa ti, onghalo yomevululuko okwe i lopotela Gavana woshitukulwa Clemens Kashuupulwa nosho yo elelo lopamifyuululwakalo.

“Opolifi iha i longo noinima ya nyika omaulodi, omolwaasho nee nda shivifila ovaleli ava vavali opo va tale kutya ota va ningipo shike. Okwali yoo nda udaneka kutya ohandi ka konaakona ngee ovanhu ovo ovena tuu oufemba wokukala moshilongo. Osho ongaha opolifi otwe shi ninga, novanhu vamwe ovo twa hangele vehe na oufemba otweva shunifa nale ko Angola,” Kashuupulwa ta ti.

Otaku hokololwa kutya, ovakalimo vomolukanda omo ova ninga eedula tava hepekwa neenghono oufiku, kovanhu ovo tava ti kutya ovalodi ovo va dile ko Angola nohava di meumbo lonhumba li li mEvululuko.

Ovakainhu vamwe vomolukanda omo otaku hokololwa kutya ohava iwa navo moixulo kovakainhu vakwao, nohava i komafimbo oikando ya fika nopu ine momwedi , nohava vele eembuda.  Omovalumenhu ovanyasha novakulunhu  otaku hokololwa kutya ohava piti tava ende va ulungana voo va tamanana, konima eshi va iwa navo moixulolo kovalumenhu vakwao, pandjongo.

“Efimbo nefimbo oto mono omulumenhu ta ende a mbanganyana omolwa ouyehame.Onguloshi, omukainhu umwe okwa twa ondjodi ta lu nomukulupe wokeumbo oko, ndee ta kupulwa oshinima shafa ohonde omanga veli molwoodi. Okwa penduka mo meemhofi diva diva te lipushula moshipala, ndee eshi ta shi kumwifa, oshilapi osho eli pushula nasho osha li shi yadi ohonde, ashike ye mwene kali ena oshipute,” Umwe womoovaleli molukanda omo osho a lombwelele opolifi.

Oshivike eshi, vamwe vomolukanda omo ova lombwela Kundana kutya, onghalo paife oya hanya shaashi vamwe vomolukanda omo novaneumbo ovo tava lundililwa oulodi ova tameka oku li kuma komalutu.

Otaku hokololwa kutya omukainhu umwe molukanda omo omafiku aa okwa  dengelwe nokwa ningwa oshipute momupindi komulumenhu womeumbo olo, eshi va li tave li hokololifa eendaka dina sha noulodi.

Omukainhu umwe ta hokolola vali kutya, okudja efiku ovakwashiwana vomolukanda omo va lopotela opolifi onghalo yomahepeko, ovafekelwa voulodi, iha va i vali kovanhu nomalupe avo vene ndele paife ohava vakepo omalupe ovanhu vamwe.

“Ashike omalutu aa have uya nao o avo, ndee nomunhu eshi to mushakeneke mongula iteku tale nande momesho, e livangeka umu pule eshi e kuningila oufiku,” umwe womovakwashiwana ta hokolola.

Gavana Kashuupulwa okwa lombwela Kundana kutya onghalo yokEvululuko okwali ngaho e i lopotelwa nopolifi oya ile ko ngaho kolukanda oko ashike paife oya fa ya xwepopala shaashi paife opwa pita efimbo ina lopotelwa sha shinasha nokolukanda oko.

“Oinima oyo ya nyika omaulodi oha i popiwa ngoo moshiwana shetu, ashike moNamibia ihatu pangula oinina youlodi. Ashike ovo tava fekelelwa oulodi ova pumbwa oku amenwa, ndee naava tava ti kutya otava hepekwa ova pumbwa oku amenwa.

“Oulodi iha u i shili moihokolola ashike ngee opena ouyelela wa yela, ou ta fekelwa ota dulu  oku landulwa. Fye inatu hala ovanhu vetu tava ningilwa omatilifo,” Kashuupulwa ta ti.

LEAVE A REPLY

Please enter your comment!
Please enter your name here