Ovanailonga ovakwafeli pauhaku onhopa okuhanga MDG

0
196
Ominista yOuhaku ya Ethiopia Dr Kesetebirhan Admasu Birhane pamwe nambushe moilonga wa Namibia, Dr Richard Kamwi tava popifa ovanailonga vouhaku pEenhana oshivike shadjako.

Ku Clemence Tashaya

EENHANA – Ethiopia ota ka twikila oku kwafela Namibia okuwapaleka nokuyelulapo eshiivo lovanailonga vomouhaku ngaashi ovakwafeli mouhaku komikunda nomokati koshiwana.

Ethiopia na Namibia ova shaina eudafano olo tali ufa nhumbi oilongo ei ivali tai ka longa nokudeula ovanailonga vouhaku, mwa kwatelwa ovapangi  ovakwafeli vokomikunda, ovanailonga voungoba, ovanailonga meendjuwo domiti nosho tuu.

Omaudaneko elongelokumwe okwa tumbulwa kOminista yOuhaku ya Ethiopia fimbo ya li tai popifa ovanailonga vouhaku komikunda vomoitukulwa Ohangwena nOmusati pEenhana oshivike shadjako. Omundohotola, Kesetebirhan Admasu Birhane okwa ti oilongo ei ivali oina omashongo elifa ngaashi omikifi domikwayu noshoyo odo iha di tambulwafanwa, nomafyo ovakainhu fimbo tava pulumuna. Birhane okwa ti oshilongo shaye osha ndjambula shihapu mokuninipika omashongo aa opaunamiti, onghee oshi udite etumba nohokwe oku kwafela Namibia opo naye yoo a hange omafindano oo.

“Ongo oshilongo ihashi etapo sha moAfrica noshina ovanhu eemiliona dili omilongo 90 Ethiopia okwa ya komesho mokuhanga omalalakano eyokomesho lokefelemido okuya komudo 2015. Okwa ti oshilongo shaye osha shonopeka efyo mokati kovakainhu tava mono ounona okuya koshi yeepelesenda omilongo 50, sho eshi osho sha kumika epangelo laye opo liuye li kwafele Namibia oku mu likila nghee vo ve shi pondola.

Birhane ta ti monakudiwa oshilongo shaye osha li shina oudjuu neshongo lakula loku yadja ouhaku uli nawa ndele paife osheshi pondola oku kandulapo eshongo olo.

“Nye onye ovaneifano pamufika wokomikunda onghee onye ekwatakanifo pokati keefamili komikunda noupangelo vashona vopopepi. ofamili keshe nai kale ina epeko  omo omukwafeli wouhaku ha nyolamo nhumbi ha kwafele ovaneumbo keshe momukunda,” osho ominista ya indila.

Omuwiliki wouhaku wa Ethiopia okwa kumaida ovahakuli ava vokomikunda kutya ovena oku kala yoo vena elandulafano liwa nove na okukala tava yadje oshiholelwa shiwa kovakwashiwana.

“Otwa shiiva nokutya Namibia okwa ya kokule mokuhanga omalalakano mahapu efelemudo nonando ota longo noudjuu oku wanifapo oshilalakanenwa oshitine noshititano. Ohandi pandula Namibia eshi a hanga oshilalakanenwa oshitihamano. Naashi oshe mu tula mongundu yaye, shaashi oye aeke a djambula eshi. Birhane okwa ti okupitila meudafano eli Namibia nosho yo Africa pauyadi ota ka hanga omalalakano aa yefelemudo.

Moshipopiwa shaye Oministeli yOuhaku moNamibia Dr Richard Kamwi okwa ti omhumbwe yovanailonga vouhaku  moinyangadalwa i lili nokulili oshiima shafimana  noshoyo oshidjuu oku ufana  noshoyo oku kaleka po ovanailonga ava unene tuu moitukulwa yokomikunda.

“Epangelo la Namibia ole li pyakidila noku twala omayakulo koitukulwa oyo ya kala i li kokule nomayakulo aa. Omayakulo otaa etwa koitukulwa ngaashi Ohangwena, mokutunga oipangelo oku etapo omayakulo omatalelopo, oupangelo vanini, noshoyo ouhaku wopashiwana.

Oshinakuwanifwa sheni ongo ovahakuli vokomikunda osho oku twala komesho ekeelelo lomikifi , okukalekapo oukoshoki, omatunhilo, oku tala nawa ovakainhu veli momateelelo, oshoyo oundjolowele wounona,” Kamwi ta ti.

Kamwi okwa twikila ko vali tati omalongekido aa ouhaku okwa tamekwa moitukulwa itano ngaashi Zambezi, Kavango, Ohangwena, Omusati no Kunene mekwafelo laEthiopia

Kamwi okwa kunghilila ovawiliki voitukulwa ovo vaha kutile ovahakuli vokomikunda keembuda ngaashi sha ningwa koshitukulwa sha Zambezi oko vati omuwiliki umwe wopashitukulwa a kuta ashike ovakwapata vaye noshoyo omuholike kadona waye.

Fiyo opapa okwa deulwa ovakwafeli vouhaku momikunda veli 565.

LEAVE A REPLY

Please enter your comment!
Please enter your name here