Egongalo lyaMulondo tali kongo oshimaliwa oku tunga ongeleka

0
406

 

OMULONDO – Egongalo Omulondo mOshitayingeleki Omandongo, mOshikandjongeleki shUuzilo olya ningi oshinyangadhalwa omasiku ngano opo li gongele oshimaliwa shokunenepeka ongeleka noku yi eta pomuthika gwopashinanena.

MOsoondaha yoshiwike shaziko egongalo ndika olyali lya longekidha oshinyangadhalwa shalyo mokukondjela Meme Krestina Ngula ngono omvalele yEgongalo ndika ashike okwa hokanwa kEgongalo kOshitayi.

Egongalo olyali nee lya longekidha opo lyi landeko meme Ngula ngoka a hokanwa ku tate Andreas Ngula ngono eli omwanamati gwomusita omukulu nakusa Kasindani Ngula opo a galukile kegumbo.

Mbono yali koshituthi omwa kwatelwa Boas Mweendeleli ngoka a ningile euvitho lyesiku noshowo  kansela gwaKaku Joseph Kapya Endjala ngoka naye woo a yambidhidha egongalo ndika.

Elalakano oku gongelela oshimaliwa shomoshiketha shegongalo, opo ongeleka yi tungululwe yo yi kale yili pamuthika gwopashinanena ngaashi oongeleka odhindji dha tungwa oomvula ndhika dhina omawawa nokuli.

Esiku olyali tali mwenyekwa koongundu dhomalwiimbo ngaashi ongundulwiimbo yegongalo Omulondo, ongundulwiimbo Tse Yamwe, niipopiwa oyindji yindji.

Egongalo Omulondo olya totelwepo  mesiku lyotango lyaJanuali, 1985 mekwatelo komeho lyOmusita Jesaya Iipito. Ewilikongundu lyo 2013 mOshitayingeleki olya longekidha iinyangadhalwa opo li yambulepo Omagongalo agehe mOshitayingeleki. Egongalo ndino olili mewiliko lyomusita Selma Kagola ngono eli lela uule woomvula omugoyi na olina iilyo yili lwopo 6704 lwaampo.

Omusita gwegongalo Selma Kagola okwa pandula ayehe mboka yiile okuyambidhidha ta indile mboka yena ehalo lyoku yambidhidha omolwa etungo lyongeleka ya thikithe omakwatho gawo tati okwe  ya tegelela. Pahapu dhe mwene otati ongeleka oshona unene na ihayi gwana aantu ayehe osho to adha ngaashi pethimbo lyomatango omanene aantu yamwe ohaya uvile pondje shono e wete kutya ka shili nande mondjila.

Ta halele ayehe mbono yiile yuuve elongeloKalunga pamwe nayo yaza koombinga noombinga ondjila ombwanawa yo ya ka thike nombili. “Kalunga ne muyambeke aaholike,’’ ta gwedhako.

Ku Maria Namupala

LEAVE A REPLY

Please enter your comment!
Please enter your name here