Ondjila yaRosh Pinah nOranjemund tayi eta oompito dhomahupilo

0
206

 

ROSH PINAH – Etulo lyoteya kondjila yopokati kaRosh Pinah nOranjemund olyo etameko lyomathimbo omawanawa mehumo komeho lyoshilongo pahapu dhOmuprima Minista , Hage Geingob.

Omuprima okwa popi ndhika pethimbo lyetameko lyiilonga yokutunga ondjila yoteya yuule wookilometa konyala dha konda pomilongo omugoyi pokati kaRosh Pinah nOranjemund. Iilonga mbika otayi ka kutha po oodola oomiliona omathele N$560 mondjato yepangelo. Iimaliwa ayihe mbika ota yi zi ashike moshiketha sha Namibia pwaana nando ekwathelo lyasha okuza kiilongo yilwe muuyuni.

Omuprima Geingob okwa ti ondjila ndjoka ota yi ka tungwa uule woomwedhi omilongo ndatu.

Ondjila oya tameka konyala uule wookilometa ndatu kuumbugantu waRosh Pinah, yeenda pooha nondjila onene yonomola 118 eta yi yi ookilometa hetatu kuumbugantu wondjila yopashitopolwa yonomola 212, osigo opondalaye yoku uka ko Sendelings Drift noku tsikila ya landula ondjila yoomanya ndjoka ya ya kOranjemund uule wookilometa 85.

Geingob okwa ti Namibia okwi itulamo okwoopaleka oondjila dhe sigo opomuthika ngoka tagu thigathanapo noondjila dhomiilongo mbyoka ya ya komeho muuyuni.

“Otuna nale omukanka omwaanawa na otwa hala iilonga yongushu okuza kwaamboka ya pewa iilonga okutunga oondjila noshowo iiyalo yilwe.Ngele oto tungu ondjila tunga ondjila ombwanawa yo oya kola. Inatu hala oku mona iilambo moondjila dhetu,” osho a ti, kutya aaNamibia ina ya igilila oku kala taya hingi moondjila dhina iilambo nando.Ngele opena iilambo mondjila oshikondo shiilonga na shi lombwelwe opo shi opaleka noku filapo iilambo mbyoka mbala.

Okwa indile woo aagandji yomayakulo opo ya gwanithepo omauvaneko ngoka ya uvanekele oshigwana.

“Inamu uvaneka ashike ndele gandjeni  shoka mwa uvaneke, ngele oya pumbwa omakwatathano ge ya peni, ngele elongo, omagumbo taga vulika omeya, eyogopeko , uungomba nomadheulo ayihe mbyoka yi gandjeni noshowo oondjila oombwanawa,” osho ati.

Geingob okwa indile woo oshikondo shopaumwene opo shi kwathele epangelo a ti opo ndika li gandje iiyalo ya kola olya pumbwa eyambidhidho lyopaukuume.

Ngolonea gwoshitopolwa sha //Kharas  Bernadus Swartbooi okwa indile oomina dhomoshitopolwa opo dhi tule uukuni kumwe moku tungitha ondjila yookilometa 147 pokati kaRosh Pinah na Aussenkehr opo oompito dhomahupilo dhi eguluke odhindji.

“Otashi ti sha, okutunga ondjila ndjoka oshoka moku shi ninga ota tu kalekepo iilonga mokutumina omandjembele pondje yoshilongo,” osho a  ulike.

Ofaalama ndjika ota ku tiwa oya tamekele okutuma omandjembele pondje ashike gootona eyovi limwe omumvo 1991 ndele etumo pondje lyomandjembele olya yi sigo opootona 16 650, nogeetamo iimaliwa yoodola oomiliona omathele N$250.

Ofaalama ya Aussenkehr oya thikama momahangano ogendji, nonando mwene gwevi ndyoka oye Dusan Vasiljevic.Ominista Yopevi Yiiyenditho Kilus Nguvauva sho a popi woo pompito ndjoka okwa tseyitha kutya iilonga yokwoopaleka olutenda pokati koLindili no Aus ota yi ka pwa mu Juni 2014. Mbika okwa tegelelwa yi ka kwathele opo omahala ogendji muumbugantu waNamibia noshowo muumbangalantu wa Capa ga vule okulongitha etuliloskepa lya Lindili.Okwa ti ishewe iilonga yoku opaleka olutenda pokati ka Kranzberg na Tsumeb na yo ota yi ende nawa.

Nguvauva okwa ti osha pumbiwa oku tamununamo oondjila moNamibia noshowo oku dhi tungulula a ti omahala gokomikunda natango ka ge na oondjila dhili nawa onkene itaga yi nawa komeho pamahupilo.

Okwa ti woo okwa hala oku mona ontopolwa ya Namibia kombinga yegameno lyomoondjila yomimvo omulongo ndjoka ya zimininwe koKabinete omumvo 2011  ya longa nawa oku shonopeka iiponga moondjila dhoshilongo.

Omanga Ben Boshoff, omuinginia omukuluntu gwa VKE Consulting Engineers,ehangano ndyoka olyo ta li ka talela iilonga yetungo lyondjila ndjoka, okwa ti opena ompumbwe okwoopaleka oondjila moshilongo oshoka odhindji odha pitilila ponkalamwenyo yadho yomimvo omilongo 40 unene tuu moshitopolwa sha //Karas.

Okwa ti ondjila ndjika oyo eshongo enene molwaashoka oya pumbwa okulongwa nuukeka no pamukalo gwopaithano, okusoshimpwiyu kutya ndjika ondjila yethimbo alihe itaa yi pumbwa oku opalekululwa omathimbo nomathimbo.

Okwa ti ondjila oya pumbwa oku gamenwa komamanya ngoka haga etwa kekunguluko lyevi noshowo oku yi gamena ketondoko lyomeya gomulonga.

Okwa ti woo ondjila onene yo B1 oya pumbwa oku nenepekwa opo oololi dhoondongelwa dhi kale tadhi pingathana nawa itaa dhi ipumu nomasipili unene tuu pethimbo lyuusiku.

“Odhindji dhoondjila ndhika odha, adha ehulilo lyonkalamweny yadho. Odha pumbwa oku pingenwapo nokunenepekwa dhi kale dhina uunene woometa 7,5 nomapepe goometa 2,5 kombinga kehe.Oondjila ndhika odha nika oshiponga unene tuu pethimbo lyuusiku,” osho a ulike.

Ehangano lyokutunga oondjila lya Raubex PTY Ltd olyo tali tungu ondjila ndjika kohi yetonatelo lya VKE Namibia Consulting Engineers.

Ku Jemima Beukes

LEAVE A REPLY

Please enter your comment!
Please enter your name here