Ondjodhi ye oya li oku kwashilipaleka egameno lyaanuulema womeho.

0
229

WINDHOEK – Oshigwana shaanuulema womeho moNamibia mehangano lyaanuulema womeho nenge Namibia Federation of the Visually Impaired (NFVI) osha kanitha unene mezepo lyomulumentu ngoka a li a hala okumona onkalo yoopala yaantu mboka yena uulema womeho moshilongo.

Manasse Tjangalala, gwomimvo 49 okwa mana oondjenda medhengo lyomutima oshiwike sha yi. Naashika osha kolekwa kaakwanezimo lye. “Okwa li omunahole  , omwiinekelwa, omuyuuki, ha longo nuudhiginini, kuume kaayehe , ka shina nee mbudhi kutya omuntu okuthike peni ye okwa li a gandja ashihe” osho omumwayina kadhano Helena Orr e mu hokolola.

Omathimbo gamwe pegumbo lya nakusa Tjangalala mOtjomuise opwa kala aantu yena uulema womeho , mboka ye a kumike opo ya kambadhale oku kala monkalamwenyo yili nawa nonando yo ka yena omeho.Orr osho a hokolola. Nomeho guudha omahodhi okwa popi mumwayina niitya iiwanawa. Nakusa Tjangalala okwa li avalwa nokankela yapumba ndjoka ya fala sigo oompoka kutya ina vula oku kala ta monoko. Okwa ti eso lyo mumwayinamati olyo ekanitho enene, oshoka nguka okwa li ongudhi yawo yoku ya tsa omukumo noku ya pa oonkondo.

“Okwa kala nehalelo opo aanuulema yomeho ya kale nonkalamwenyo yili nawa.Okwa li omulumentu omumweni hapulakene nawa komashongo ngoka ga taalela  aantu omanga inaa gandja omadhiladhilo ge. Okwa li omulumentu ngoka ihaa kala a hala oku kala a landula uupyakadhi ethimbo nongele owa fa tawu nyengana oha ti na wu ethiwe” osho Orr a gwedha ko.

Tjangalala ngoka ta hokololwa kutya omulumentu ena omukumo okwa li ena omutalelo gwonkalamwenyo gu li nawa nokwa li ehole oyana yaamati yaali, gwomimvo hamano, Nasel naangoka gwomumvo gumwe August unene tuu sho a mono mbaka pethimbo lyuukokele.Okwa li eya nine oshindji momadhiladhilo,. Nonando Nasel oku li monooli Manasse okwa li emu halela ashihe oshiwanawa.

Pethimbo a li muka okwa soshimpwiyu kutya okwe mu fala kosikola nonando ye okuna uulema womeho. Tjangalala okwa valelwa moShaanda momasiku 14 gaMaalitsa 1964 na okwa kokele mOtavi. Momumvo  1974 okwa yi tango kosikola yowina pEluwa muumbangalantu woshilongo mpoka a kala uule woomvula ne omanga inaa ya kosikolla kEngela hoka a kala oomvula mbali. Oku za kEngela okwa shuna kOtavi hoka a kala sigo omumvvo 1996 . Okwa tembukile koVenduka, oku konga ekwatho lyezulonkalo pendiki lyo ku yakula aantu mboka ye na uulema womeho.

Tjangalala okwa ndhindhilikwa ena omagano nuunongo onkene momumvo 1997 okwa pewa iilonga kehangano lyaNamibia lyaantu yena uulema womeho ongo omulongi gwelaka ndyoka ha li leshwa kaanuulema womeho.Okwa kala ta longo iilonga mbika sigo opethimbo a  mana oondjenda dhe.

Ongo omulongi gwobraille, Tjangalala okwa longo aalongwa oyendji, mwa kwatelwa aalongi yaanuulema womeho mboka opo taya tameke  unene tuu mboka ya za komanongelo gamwe ngoka ha ga gandja elongo lya shewa kaanona.

“Okwa li ena eitulemo, na aluhe okwiilongekidha oku kwatha.Oha taambako ayehe kashina mbudhi kutya oye li ngiini.Otwa kala ha tu mu ithana omuprofessori oshoka okwa li omunawino melaka lyoshiposi” Maria Ampweya ti.

Tjangalala okwa li ena onzapo yaLuiz Braille  melaka lyOshimbulu nOshiingilisa. Okwa li woo a kuthombinga miigongiilonga ya yooloka  na okwa mona onzapo melongo lyokulesha noku humitha komeho ontseyo yo ku lesha mokati koshigwana.

Tjangalala ngoka a li woo Omunashipundi shokomittee yelaka lyoBraille, na okwa li a pewa onzapo moku monako kashona kowala. Okwa li woo a kuthombinga medhikopo lyoshifo shaantu yena uulema womeho melongelokumwe nehangano lyaNew Era Publication Corporatin.

Tjangalala okwa thigako aamwayina aakiintu yatano nomulumentu, gumwe, oyana aamati yaali nomuholike gwe Elizabeth Karufere .Ota fumvikwa Olyomakaya ngaka  pOtavi.

Ku Alvine Kapitako      

LEAVE A REPLY

Please enter your comment!
Please enter your name here