Oohi dha tulwa mondooha moNamibia dha holoka moositola

0
236

 

WALVIS BAY – Efuta Maasbanker, oshilongomwa sha Namibia okuudha , sholudhi lwoohi dho horse mackerel dha longwa no ku tulwa  moondooha mOmbaye , otadhi adhika moositola dhomoshilongo.Oohi ndhika dhomondooha otadhi adhika mooraka dhoositola dha Shoprite oshilongo ashihe oku tameka oshiwike tuuka.

Oondooha dhoohi ndhika otadhi holoka momaludhi gatatu, naashika osho osheetwapo shimwe moku ngushupaleka oonzo dhomefuta lyaNamibia noshowo oku humitha komeho okulya oohi mokati kaakwashigwana ya Namibia.

 

Ominista yOohi nOonzo dhOmefuta, Bernard Esau oyo ya tula miilonga noshowo ya tseyitha eetepo lyiilongomwa mbika iipe moWalvis Bay.

 

Oludhi lwoohi nduka lwEfuta Maasbanker osho osheetwapo shomuhanga  shomahangano gaali goohi Erongo Marine Enterprises nEtosha Fishing. Erongo Marine olya gandja oohi dhohorse mackerel dhootona omathele gaali kEtosha Fishing , dho ndhoka odho ihe dha tulwa moondooha,  dha yi miipakete yili omayovi omulongo  na gatatu, mbyoka ya tegelelwa ashike oku falwa moongeshefa dha yooloka moshilongo.

 

Oondooha dhoohi ndhoka odha tulwa oombapila dhomalwaala gapya nodhili momilyo dha yooloka ngaashi momuhoka gwetoma, gwondungu naangoka, gwobrine. Oondooha ndhoka otadhi vulu oku kala moraka yositola nenge mompungulo yiikulya megumbo lyomukwashigwana uule womimvo mbali inaa yi ninga nayi  no ina yi pumbwa okutulwa mokila.Oohi ndhika ohadhi tulwa moondooha pofabulika yEtosha, ndjoka pethimbo ndika yi na aaniilonga ye li omatehele 650.

Pethimbo a tseyitha iilongomwa yEfuta, mbika pambelewa, Esau okwa tumbaleke omahangano ngoka gaali goohi sho ga longele kumwe noku gwanithapo elalakano limwe enene lyoshikondo sho ku kwata oohi ndyoka lyo ku etapo oompito dhiilonga memuno lyiikwafuta noshowo oku gwedhako ongushu  kiikwameya.

“Ondi inekela kutya iilongomwa mbika ita yi kumike ashike aantu okulya oohi moshilongo ndele ota yi etele woo oshilongo iimaliwa okuza pondje molupe lwiimaliwa yokiilongo yilwe. Mbika ota yi etapo woo oompito odhindji dhiilonga moshikondo shoohi,” Esau a ti.

Okwa fatulula a ti okuza kemanguluko momumvo 1990 oohi dhohorse mackerel ndhoka dha li dha kwatwa mefuta lyaNamibia  odha li dha tuminwa pondje, naashika osha li sha nayipike oonkambadhala dhopashigwana dhokweetapo oompito dhiilonga.

“Oshikwawo sha simana pethimbo ndika lyoluteni ngaashi nuumvo ooshoka oku kwata nawa oonzo dhiikwahi yetu  omolwa uuwanawa waaNamibia ayehe.Oshitopolwa sholudhi lwoohi ndhika osho shimwe sha simana  moshikondo shoohi moshilongo.Ongushu yiiyemo mbyoka yeetwamo ko ku  landitha oohi pondje yoshilongo pamayalulo gomumvo 2011 oya li oodola oobiliona N$ 5,1. Etata lyoshimaliwa shoka olya  zi melanditho lyoohi dholudhi lwo horse mackerel.

Shoka tashi ulike kutya oshimpungu sholudhi lwoohi ndhika osho hashi gandja oshindji pondondo ontiyali momahupilo goshilongo, moshinima shoohi,”Esau a ti.

Esau okwa ti kakele ko ku etamo oshindji moshiketha shoshilongo, oohi ndhika odho dhimwe ha dhi liwa koyendji moNamibia noshowo moAfrica.

 

“Shika otashi tu ulukile esimano lyadho nonkene shapumbiwa opo tu dhi kwate nawa. Oshoka ngele kapena uuwanawa mboka tawu zi mudho nena oshikondo shoohi otashi kala monkalo yaa li nawa,” osho a fatulula.

Pahapu dhomukuluntuwiliki gwErongo Marine Enterprise, Muetulamba Shingenge Haipinge, ehangano lyawo olya li ashike ta li gandja oompito ooshona dhiilonga kaaNamibia tashi pitile miilonga yoku ya momeya.

“Mekondjithathano naashika ehangano lyEtosha Fishing  ndyoka li na ofabulika yoshinanena yokutula oohi moondooha mUumbugantu wAfrica olya li ashike tali vulu woo oku gandja oompito dhiilonga dhaashi odhindji molwashoka kalya li ta li longo shuudha. Molwaashoka ka lya li li na omwaalu ogundji gwoohi oku dhi tula moondooha. Omanga oshitopolwa shoohi dholudhi lwo horse mackerel shoka osho oshinene momwaalu itashi vulu okweetapo oompito odhindji dhiilonga. Onkene oku tala ko nziililo ndjika shika oshetu tonatitha kutya kashi na shoka tashi kwatha  ngele itatu ningipo sha shoka inaash ningwa nale opo okwaa thike pamwe huka moshikondo shika ku kuthwepo,” osho a fatulula.

Sho a popi poshiithanene shika, omunashipundi shewilikongundu lyEtosha Fishing, Johny Nekwaya okwa ti oku gwedha iilongomwa yoludhi lwohorse mackerel kiilongomwa yehangano ndyoka otashi li kwathele opo li kale tali longo ethimbo alihe niilonga ya gamenwa yaaNamibia oyendji.

Ku Eveline de Klerk

 

LEAVE A REPLY

Please enter your comment!
Please enter your name here