Shiimbi a nangekwa mwene womukunda Okathima Kanangolo

0
431

OKATHIMA KANGANGOLO – Elelo lopamufyuululwakalo lUukwambi ola nangeka, Helen Shiimbi, omuwiliki wOilonga yOshiwambo mehangano lokutuma Omawi mOmhepo laNamibia NBC a kale mwene womukunda Okathima Kanangolo. Shiimbi okwa pewa oshinakuwanifwa osho  oshivike sha djako, eshi a shikula Xe oo a kulupa paife, mouleli womukunda oo. Shiimbi okwa nangekwa poshivilo sha kalwa koidale nokovanenhu noshoyo kuXe yoshiwana sha Namibia Omukokoli Peresidende, Sam Nujoma, Ohamba ya Uukwaaluudhi , Josia Shikongo Taapopi, noshoyo koomuwiliki wo NBC Albertus Aochamub. Enangeko laye ola ningwa ku Maria Angungu oo eli omutokolindjovo melelo lUukwambi.

 

Xe yoshiwana sha Namibia, Nujoma oo a li omupopi a fimana poshivilo osho okwa pandula neenghono oshiwana shaKathima Kanangolo eshi sha ulika omukainhu ongo mwene womukunda wavo, a ti eshi otashi ulike nhumbi vo va tambula omulandu wa diminwa koshoongalele shoSwapo opo pa kale ekalelopo li fike pamwe lovalumenhu novakainhu pomifika adishe depangelo. Okwa pula yoo oshiwana keenhele dimwe opo shi hopaenene ovaKathima Kanangolo moshiima eshi.Nujoma okwa udanekele ta yambidida Shiimbi moku longa oshinakuwanifwa eshi.”Fye otwa hala ombili nengungumano, ngeenge opena osho ito dulu tu ifana opo fye tu wapalekepo” Nujoma ta udanekele Shiimbi. Helena oo a dalwa Helena Yakuleni Jeremia oye onghelo yomoukadano vavali na okwa hoololwa kuXe, omushamane Hafeni ya Jeremia oo a lela noku wilika Okathima Kanangolo okudja omudo 1953 fiyo osheshi a yandja ewiliko komonakadona oo. Tatekulu Jeremia okwa  yandje oshipundi komona osheshi okwa koka ye vali kena oukolele nawa.

 

“Omolwounghundi noshoyo oukokele, onda tokola okuyandja elelo lomukunda ou kokaadona, okaadona oko paamha ka ninga omwalikadi, wedina Helen Shiimbi. Onde mu pa omukunda ou mombili, no handi kala nda hafa ngeenge amushe omwe mu  tambula ongo omulanduli wange, Onda hala a kale omuleli ta kufa oshihopaenenwa kuaame, ta longo ngaashi ame nda kala hailongo,” osho Tatekulu Jermia a ti. Mondjokonona ixupi tatekulu Jeremia okwa popya a ti ye owomepata leehamba dUukwaluudhi nedimo laye oku kala mUukwambi osha tamekele momido pokati ko 1875 nomudo 1907 eshi ooinakulu vamwe va fiilepo oshitunda shUukwaluudhi . Ohamba Taapopi o ili inakulu  wa Jeremia , ei ya shanga embo kombinga yodiililo yeehamba dUukwaluudhi oya indila Shiimbi a kale ta pwilikine noukeka eendjovo dovanhu va ye mhangha inaa ninga etokolo . Osheshi fimbo limwe ovanhu oha veuya neendjovo va hala ashike va ude eshi to ti opo ve ku etele oupyakadi. Okwa indila yoo oshiwana opo shi kale noshili ndele ha ku tonga oipupulu. Shiimbi okwa teelelwa yoo a kale omuwiliki womikunda dili nhano naimwe.
Ku Helvi Shaanika

LEAVE A REPLY

Please enter your comment!
Please enter your name here