Where Others Wavered: Sam Nujoma – Iilonga yokondalaka osho oshinima oshiwinayi twa li ta tu kondjitha

0
231

Tse mo South West Africa ka twa li unene ta tu ipula andola no kwaana elongo nenge ontseyo kutya iilongo yilwe mbyoka ya li muukoloni ngaashi Ghana oya mona emanguluko,  oshoka shika hasho sha li tashi tu thiminike unene muka. Onkalo ndjoka ya li tayi yu thiminike oondjoka yaantu yetu ya  li ya kutwa miilonga konyala ongo aapika ha ya longithwa pakondalaka. Oshikwawo osho oveta yoopaasa ndjoka ya li ya ngambeka einyengo lyaAfrica mevi lyooyina. Omukalo gwiilonga yokondalaka osho oshinima twa li ta tu kondjitha opo shi tekepo.  Ngame onda monene omahepeko nomadhengo kolutu gaantu yandje mboka ya li ha ya longithwa pamukalo gwokondalaka. Shika onde shi mona nopethimbo ndali omushona pegumbo. Onde shi mono woo miilonga yolutenda moka aaniilonga ya li ya talika, ongo iilongithwa mbyoka tayi vulu oku ekelwahi uuna yaa na we oonkondo oku longa, ndele ha ngaashi aantu andola.

 

Mbaka oya li ha ya ekelwahi kutya nee okwa monene oshiponga miilonga mbyoka. Ngame onda li nda katuka oonkatu pehala lyaalumentu aagundjuka mboka ya li ya dhengwa koonalunanga. Oshiholelwa ongaashi uuna nda tuulapo oopaasa nookondalaka dhiilonga dhaamatyona mboka ya li haya longo molutenda no ku dhi umbila mokandjugo ngame tandi ya fala kosikola kOld Location hoka aalongisikola ya li ookuume kandje. Opwa li wo ehangano lyo ku kuta aaniilonga hali ithanwa WENELA [Witwatersrand Native Labour Association] ndika olya li hali kutu aakwashigwana yiilongo mbyoka ya li kohi yuukoloni wa Britania, ngaashi oshigamenwalongo sha Bechuanaland, Rhodesia lyokuumbugantu nokuumbangalantu, Nyasaland, Tanganyika, Kenya na Uganda. Akuhe kiilongo mbyoka aaniilonga oya kutwa ku WENELA oku ka longa moomina dha South Africa, nongeyi mbaka oya tungu  omahupilo goshilongo shoka okupitila moomina.

 

Aaniilonga oya li woo ya kutwa okuza koAngola sha ningilwa podoolopa ya Rundu moSouth West Africa , ndele aaniilonga mboka aavalelwamo ya South West Africa oya li ashike ya kutwa oku ka longa moomina dhomoshilongo muka noshowo okulonga mepangelo, moofaalama dhaatiligane nomomagumbo. Omukalo gwiilonga yokondalaka ogwa etwapo kehangano lya Anglo-American Corporation, ndyoka oondhila dhalyo dhali hadhi tuka okuza koFrancistown okuya ku Senanga na Broken Hill moRhodesia lyokuumbangalantu nenge [Zambia] oku ka tala aaniilonga noku ya eta poFrancistown mpoka ha ya londo eshina lyokolutenda  okuya kiilonga koSouth Africa. Omanga aaniilonga mboka ha ya zi kuuzilo wAfrica ,oya li haya falwa noololi sigo opo Mbeya moTanganyika  noku za mpoka oha ya londo mondhila oku ya koomina moSouth Africa. Omikalo nomaihumbato gaatiligane mboka ya li taya pangele ka kwali haga kondjithwa nando okulye kakele kOmukwaniilwa, Hosea Kutako meni lyoshilongo nokomusitagongalo Michael Scott poombelewa dhIigwana Hangano.

 

Omusita Scott okwa li a ponokelwa kOminista Yiikwapondje ya South Africa pethimbo ndyoka yedhina Eric Louw, kohi yepangelo lya Malan, sho aniwa ha ti oha popileko aavalelwamo ya South West Africa. Omolwashika, otwa mono kutya osha pumbiwa opo aatiligane mbaka ya palamenwe.Omuntu gumwe woo ngoka a kondjitha woo aatiligane mbaka nomilandu dhawo dhuukoloni omusita gwegongalo lya Anglican pOnekuaja  moUkwanyama. Theophilus Hamutumbangela. Nguka okwa li a hokololelwa omaupyakadhi ogendji kaaniilonga mboka ye ya kegumbo uuna okondalaka yawo ya puko.Mbaka oya li ya futwa oondjambi dhuupika nodholuhepo oku yeleka noondjambi  dhiilumbu mbyoka oyo aluhe ya li aahona piilonga kehe. Aahona oya futwa ooranda 375 komwedhi omanga aaniilonga yaaluudhe oya li ya futwa iimaliwa  yi li pokati kooranda17, sigo ooranda 45. Aaniilonga momatungo oya li ha ya kwata ooranda 7 noosenda 50, Aaniilonga moofaalama oya li ya futwa ashike ooranda 3,75 sigo ooranda 10 niithilinga itano.Omathimbo ogendji aaniilonga aaluudhe oya longo ko kondalaka yoomwedhi 18 nenge oomwedhi 24, no inaa ya mona efudho lyokomumvo oku ka talelapo omazimo gawo. Aaniilonga yokondalaka oya li woo ha ya pewa  iikulya nomulalo, go omauwanawa ngaka ngele oga tulwa pashimaliwa oga li gena ongushu yooranda 15 niithilinga iyali nosipenitha. Ndele nee omayakulo ngaka molupe lwoondunda dhokulala, noshowo iikulya ka gali taga hokitha niishewe oguunkundi. Aaniilonga yokondalaka kaya li ha ya pewa omafudho guuwehame nenge uuna omukwezimo lye a mana oondjenda aaniilonga mbaka iha ya ethiwa opo ya ye koosa dhomukwawo. Oludhi lwiilonga mbika olwa li lwa yooloka kuupika oshoka ngoka ha longo ongo omupika okwa silwa oshimpwiyu ku mwene gwe omanga iilonga yokondalaka omuniilonga ngele ita vulu we iilonga oha shunithwa ashike hoka a yambukile, ye omuhona gwe ta lombwele  ehangano lya SWANLA opo li  mu tumine omuniilonga omupe. Ishewe omulandu nguka ogo  uupika oshoka omuniilonga ngele okwa si aakwawo iha ya futwa sha. Kakele konkalo yiilonga ya nyayika aaniilonga mbaka oya li woo ya dhinika kaatiligane mboka ya kala noku ya tala nondhino.Oya li ishewe ya talika ya fa yaa napo sha, okuyeleka naaluudhe ooyakwawo mboka ya li ihaa ya longo iilonga yopakondalaka.

 

Omusitagongalo Hamutumbangela nesindano lyetu lyotango

 

Nonando aaniilonga yokondalaka oya li ya futwa iimaliwa iishona, yo oye shi pondola oku tumina iimaliwa komagumbo noshowo oku faalela iilandomwa oyindji ngaashi iilongitho, iizalomwa na yilwe ngaashi oothewa dhoshizimba nomagadhi gokwiishasha gezimba ewanawa. Pomweelo gwaNamutuni ngoka gwa li gwa talika ongongamba pokati kOwambo nuushimba nenge naashoka kwali hashi ithanwa ehala lyaapolisi moka mwa li muna iilumbu, aatiligane mboka woo ya uuviteko unene oonalunanga odhindji dhomudho aapolisi oya kala noku yuga aaniilonga mboka taya shuna komagumbo iilandomwa yawo unene tuu oothewa noshowo omagadhi gezimba ewanawa. Oonalunanga ndhika  odhi iitopolele nee iinima mbika mokati kadho dhene. Mokuyuga aaniilonga mboka taya shuna komagumbo konima sho ookondalaka dhawo dha teka, aatiligane mboka oya ti iilandomwa mbyoka aniwa ina, yoopalela aaluudhe Aafrica onkene oye yi ya kutha ashike shafa uudhano.

 

Mokuuva shika omusitagongalo Hamutumbangela okwa nyolele kIigwana Hangano okulopota oshinima shika. Ndele nee kOmufala gwIipambele yaavalelwamo gwedhina Blignaut oya longele kumwe nOmumbishofi gwaAnglican pethimbo ndiyaka ha ithanwa Omumbishofi gwa Damaraland Vincent, opo momumvo 1957 omusitagongalo Hamutumbangela okwa ithanwako kegongalo lyokOnekuaja noku lundululilwa koWindhoek, moka a kala ha uvitha po St Barnabas Osoondaha kehe. Otwa li tu shishi kutya okwa kuthwa ko kuumbangalantu molwaashoka okwa li ena enwethemo enene mokati kaantu oku kondjitha noku mona uuwinayi wo ku thindilwa kongudhi kepangelo lyokatongo lya South Africa.Kuyele petameko lyomumvo 1958 nakusa Fanuel Kozonguizi nangame otwa tokola tu palamene Omumbishofi gwAnglican, Vncent. Ye okwa zimine opo tu mu tsakaneke. Kuyele kongulohi yEtiyali koshiwike otwa yi kegumbo lye lili popepi nongeleka onene yAnglican. Otwe mu lombwele twa ti”Ngoye Omumbishofi gwAnglican owa longele kumwe nakOmufala gwaavalelwamo opo wu lundululile Omusitagongalo Hamutumbangela  molwashoka ha nyenyeta kombinga yokwaana uuyuki hoka haku ningilwa aaniilonga yokondalaka noshowo shono ha ya yugwa omaliko gawo.”  Kozonguizi pethimbo ndyoka okwa li ti iilongo koUnivesiti ya Fort Hare mo South Africa tse otwa gandja osheetwapo shetu kuVincent neitulomo. Omumbishofi okwa li a haluthwa kehokololo lyetu. Oshoka shika osho shotango ta taalelwa pamukalo ngoka kaAfrica. Otwe mu lombwele kutya”Otatu ke ku popya na yi ngele ino soshimpwiyu kutya Omusitagongalo Hamutumbangela okwa shuna kegongalo lye , na ishewe ngoye owa ethapo okulongela kumwe noonalunanga,”. Pethimbo ndyoka Omumbishofi Vincent okwa adhika opo a zi koshigongi sha li ko Lambeth moLondon , hoka ngiika a uvithwako kutya opena ombepo yelunduluko kombinga yoshinima shuukoloni. Okwa li a popi moLondon kutya aatiligane ohaya uvu omambo yiilile ya topoka kaaluudhe nenge kAawambo naakalimo yalwe oshoka aniwa mbaka otaya kala yuuvite nayi mokuuva pamwe naEuropa, mongeleka yimwe” shika oshina oku kala sha konenenwa unene ngiika kaa kwashigongi shoka.

 

Opwa piti ashike Etitatu nEtine momasiku ngaka gaali Omumbishofi Vincent okwa landa okatekete keshina lyokolutenda kOmusita Hamutumbangela nokwe mu lombwele opo a shune kegongalo lye kOnekuaja mUukwanjama.Kutse aagundjuka olya li esindano lyotango. Oku uka pehulilo lyomumvo 1958 Ngame onda ka talelapo kuumbangalantu , netalelopo ndika olya li lyahugunina omanga inaandi ya muundjendi. Onda li nda yi naanegumbo lyandje ayehe oku ka talelapo aakuluntu yandje. Konima yo ku kala puyo omasiku gontumba onda ka talelapo Omusitagongalo Hamutumbangela pOnekuaja hoka a shunithwa kOmumbishofi Vincent, onda kala puye omasiku gane mu Desemba gwomilongo 1958.

 

Elalakano lyandje enene olya li oku mu talelapo noku mu pandulila iilonga ye noshowo okuuva nkene eli po, ndele otwa haluka ta tu tsikile oku kundathana onakuyiwa yopolitika nomikalo ndhoka tatu longitha oku yi humitha komeho.Otwa uvathana kutya okwa pumbwa oku kala iitulamo mwaashika oku andjaganeka omauyelele opo pu kale ekwatathano unene tuu kwaashoka tashi longwa kaatiligane muumbangalantu woshilongo. Omusita Hamutumbangela okwa li iitulamo mokukondjela elunduluko monkalo yoshilongo, nokwa nwethamo aagundjuka oyendji papolitika  moWindhoek noshowo muumbangalantu. Okwa kala omuuvithi gwohapu ya Kalunga muumbangalantu uule womimvo odhindji osigo opeso lye  momumvo 1990. Ota kala noku dhimbulukiwa aluhe onga gumwe gwaamboka ya pala ondjila yekondjelomanguluko.

LEAVE A REPLY

Please enter your comment!
Please enter your name here