Komuvalu wovali vomafuma neendongi kwa wedwa ovaChina

1
445

ONGWEDIVA – Omuvalu waavo ve hole eendja domafuma neendongi owa ninga muhapu eshi kwa monika kutya ovaChina, navo yoo ohava kala moyana tave li pumu keenyala nova nhu monooli moku hakana ooShimboto.

Kakele komafuma ovakwashiwana vaChina ava ota va yambapaleke  yoo ovanamikunda unene meenhele omo velipyakidila oku tunga omatungo, eshi hava lande eendongi nokudi toma vo tava ningi nee omafiku tave shi liningile.

Oshinima shoku kwata omafuma osha udifa nai vamwe vomovali vooShimboto ovo tava hokolola kutya ovaChina ovena outekenika woku kwata omafuma mahapu ina vafa ovakwashiwana ovo va kala hava maneko oyana tava kwata omafuma koolimwe noolimwe.

“Hamba itatu li omafuma neudo? OvaChina veli moshana tava kwata omafuma, ve a nangela nee poshana shaMhumbu (mOshakati) apa,” umwe womovaholi vo facebook osho a tameka.

Eshi nokuli osha etifa ovanhu vamwe opo va tameke oku nyenyeta ko kofacebook tuu oko, tava yandje eembedi kovaleli vopamifyuulwa kalo, eshi va efa opo ovaChina ava va kwate omafuma moyana yomonoli.

“Hano omalenga noovene vomikunda ove shi ashike okuwanifa po oveta nelandulafano ngeenge tashi uya kovalaule novAfrica vakwao?

“Vakwetu kufeni onghatu. Hano ovaChina ove uya okungeshefa ile ove uya oku kufapo oinakuwanifwa yetu ovaNamibia.

“Oh! Hamba ovaChina ovahala oku tu li kwatela, onda hala naanaa va kwatwe kokaketaketa ndee tava** nana nawa apa tadi ina va enda mo vali moshana! Nava efe omafuma etu alikana otava ti nee ohatu li shike?” vamwe osho va popya ngaho noku tanguna ko facebook.

Nonande vamwe va nyemata veudite tava manenwa po omafuma, vamwe ove udite kutya okulya omafuma neendongi kovaChina oyo ongeshefa oyo vahapu vomoNamibia, unene tuu ava veli komikunda tava dulu oku li monena mo oiyemo.

Nokuli, eshi odula ya loka oshivike eshi noya talameka nawa, ovanyasha vamwe nounona vofikola ove li monena oufilinga vavo, eshi va landifa omafuma.

Vamwe ota va hokolola kutya, ovaChina ovo ovalandi vawa neenghono, shaashi vo ohava lande eenduba domafuma, ina va fa ovaNamibia ovo hava lande ashike okapandi kamwe ile oupandi vavali vomafuma.

“Ou wakwata omafuma kalandife ashike kovaChina nande wati limwe olina N$100 ota lande ashike, shaashi nokoChina olina ondilo nai nai. Nomayoka avo meefitola oto hange ena ashike kundja po N$50,” umwe osho a nyola ko facebook.

Omukwashiwana womuChina umwe, oo a popya na Kundana no ina hala edina laye li tumbulwe otati, hava China aveshe hava li omafuma. Ashike oikulya ei oya talika ko onga eendjaandjaa moitukulwa imwe yoshilongo osho ngaashi koushilo nokoumbangalanhu wa China.

OmuChina ou ta hokolola kutya, moitukulwa imwe yokoshilongo shavo kamuna omafuma nande nande, novanhu vamwe kave a shi nokuli.

Omulumenhu ou ta ti okwadja ko nooli yaChina otati konhele oko a dja oku holike yoo ombelela yondongi nomolwaasho mopaife eshi eli moNamibia ye novaChina vakwao ohave shi liningile shaashi ohava lande eendongi kovanailonga vaye  ovaNamibia nokudi toma po.

“Ndishi oku toma ndongi moNamibia kashili kondje yoveta? Shaashi fye oku kOkalongo, ohatu lande eendongi noingulu kovanailonga vetu, ndele hatu shi liningile,” omuChina oo kwali a tila okutya pamwe oku toma ndongi moNamibia okuli pondje yoveta osho a pula Kundana.

Ku Helvy Shaanika 

1 COMMENT

LEAVE A REPLY

Please enter your comment!
Please enter your name here