Nelson Mandela a lilwa kuuyuni auhe nokoomiliona odhindji

0
222

Nakusa Omuperesidende gwotango gwa South Africa lyuudemokoli okwa lilwa kaakuuyuni auhe konima sho omuwiliki nguka a li a kala oomvula omilongo 27 mondjedhililo a mana oondjenda dhe oshiwike shayi.Uuyuni auhe shono wa kundana eso lye owa tameke okutuma omahekeleko oku hekeleka ezimo lye nomuselekadhi gwe noshowo oshigwana ashihe sha South Africa omolwa eso lye. Oyendji muuyuni oye mu popi ongo ongundja yopapolitika. Nakusa Nelson Rolihlahla Mandela  ngoka a si mepipi lyomimvo 95 ota  dhimbulukiwa ongo omukondjithi gwokatongotongo ngoka a gandjapo onkalamwenyo ye nokwa edhililwa mondholongo uule womimvo 27 opo a mangulule aantu ye. Konima yoku kala oomvula 27 mondholongo kontuntu ya Robben noshowo mondholongo ya Pollsmoor naandjoka ya Victor Vester , okwa mangululwa na okwa ka kwatela oshilongo she komeho ongo omupereseidende gwasho gwotango sho sha ningi omahogololo gotango guudemokoli waantu ayehe. Aawiliki konyala yaza miilongo ethele muuyuni oshowo aawiliki yomahangano gopaigwana mwa kwatelwa nIigwana Ya Hangana oya kalele poshituthi dhimbuluko sha nakusa Mandela mokapale okanene ketanga lyokoompandhi moSoweto shaJohannesburg mesiku lyoipagwana lyuuthemba womuntu,10 Desemba 2013. Aawiliki ayehe aakulu naamboka ye li kiipundi oya tanga nakusa Mandela omulumentu nomuntu gwaantu, keena kutya ngoye olye, keena omunene nenge omushona , omuthigona nenge omuyamba, golwaala inaalu fa lwe nenge ndoka lwafa lwe, Mandela okwa yolo naayehe nokwapopi naayehe noshipala tashi imemeha. Omuhongi gweitaalo lyaaJuda omuSouth Africa okwa yeleke Mandela na Josefa gwomOmbiimbeli a ti Mandela ongaashi Josefa okwa umbilwa mondholongo ngaashi Josef a li eshi ningilwa kaamwayina. Ndele Josef sho a ka tsakanena naamwayina konima yomimvo odhindji omanga a li omuwiliki omunene mu Egipiti, ine ya kwatela onkone andola ndele okwe ya dhiminepo. Mandela okwa edhililwa mondholongo kaa kwashigwana yoshilongo she, okwa monenemo iihuna yaashi ku tumbulwa, ndele sho eegululwamo okwa dhiminepo oonaku mweedhilila.

Aawiliki yiilongo noyomapangelo giilongo iishona niinene niinankondo muuyuni oya li poshituthidhimbuluko moJohannesburg ayehe oya tsa kumwe kutya Mandela okwa li no ta kala omuntu ena enwethemo nomuntu omukumiki moondjenda dhe kombanda yuuyuni wetu. Omuperesidende Hifikepunye Pohamba ngoka a popi pedhimbuluko ndika peha lyaawiliki yenenevi Africa oyendji yomuyo ya li woo poshituthi shoka okwa hokolola Mandela ongo omwanamati gwAfrica, omukondjithi gwokatongo a tseyika nawa, nomagano gaashi kuyelekwa gapewa uuyuni.,ngoka itaa ka dhimbiwa kaakuuyuni.Pohamba okwa ti Mandela okwiigandjele yalwe molweendo lwonkalamwenyo ye kombanda yevi.”Okwa li ihiitala yemwene mokwiigandjela yalwe, oshoka okwa li itaala mongushu yomuntu kehe” Pohamba osho a ti. Okwa ti Mandela okwa li onzo yomukumo kaantu yaNamibia pethimbo lyekondjelomanguluko lyoshilongo shawo, unene tuu kaaNamibia mboka yali yeedhililwa pamwe naye kontuntu ya Robben, mokati kaamboka mwa kwatelwa Andimba Toivo ya Toivo. “Madiba okwa li endhindhiliko manya lyuuthemba womuntu, emanguluko lyomuntu, ombili nuuyuki moshilongo shaandjawo noshowo muuyuni auhe” osho Pohamba emu hokolola.Okwa ti esimaneko lyoopalela nakusa Nelson Mandela oondyoka lyoku nyanyukilwa onkalamwenyo ye moku longa nuudhiginini oku gwanitha po shoka a li itaala musho nenge okugwanithapo omankankameno ge gomonkalamwenyo.Moshipopiwa she Omuperesidende gwa America, Barack Obama ngoka a nyanyukilwa onkalamwenyo yependafule lye lyopaumwene, okwa ti Mandela oye gumwe gwaamangululi aanene yomethelemumvo 20, nokwa indile uuyuni wu tsikile ekondjo lye lyoku kondjitha okwaa thike pamwe, oluhepo nokatongotongo. Obama okwa yeleke Mandela naawiliki yalwe aanene yena enwethemo ngaashi Mahtama Gandhi, Martin Luther King Jr, na Abraham Lincoln. Okwa ti kehe shoka Mandela aadha okwe shi longo mekondjo, eshi ningi nuukeka, neitulomo, noshowo neitaalo. Obama okwa indile aawiliki ooyakwawo showo omukuuyuni kehe opo kaa nyanyukilwe nokutanga onkalamwenyo ya Mandela yedhiminathanepo, ndele yo miilongo yawo nenge moonkalamwenyo dhawo oya nyengwa oku dhiminapo. Nenge oya nyengwa okweetapo omalunduluko nando omashona gowala oku kuthapo oluhepo okwaathikepamwe miigwana yawo noshowo momahala gawo. Kuyele oshiwike shika Amushangandjayi gwIigwana Ya Hangana, Ban Ki Moon pamwe naMbishofi Desmond Tutu  oya popile poshigongi pendiki lya Nelson Mandela Centre of Memory. ” Tala omagano omanawa ga Kalunga kutse, mu Mandela nguka,a ningi omusimani muuyuni, omunene medhiminopo, nomombepo ombwaanawa’ Tutu a ti.”Okwa li shili a fa ompulile yina okanasi kuupule

Ngoka etu lundululile moshigwana shaantu yeneyadhimo noshigwana shomalwaala guutamvula’ Tutu ta hokolola .Mandela okwa dhana onkandangala onene muuyuni nokwa guma konyala omukuuyuni kehe nomaihumbato ge monkalamwenyo. Okwa lele South Africa okuza mo 1994 sigo omo 1999 moka a zimbuka miilonga yopolitika yesiku kehe eta gandja onyeka yomulilo guuwiliki kepipi li pevi nolye lyooTambo Mbeki nooJacob Zuma ngoka oye eli omuwiliki gwa  South Africa nena.Nakusa Mandela ota ka fumvikwa Osoondaha ndjika okuza pegumbo lye pomukunda gwawo Gcunu, mUuzilo wa Kaapa, moka omo a putukila.

Ku Magreth Nunhue/Kuzeeko Tjitemisa

LEAVE A REPLY

Please enter your comment!
Please enter your name here