Okamati kamutushi inaka hala oku pangelwa koulema

0
214

 

ONGWEDIVA – Gideon Kamutushi (14) oye umwe womovanhu ovo va tokola opo va ha efe oulema uva ye moshipala, moku kala monghalamwenyo ya ukilila nonande pakale pena oyiimbi.

Kamutushi, omunafikola oo a shanga nokwa pita oGrade 7 ko Charles Anderson mOngwediva, okamati oko kalemana ekipa lombuda nokeli kokatemba.

Oulema ou ina u imba Kamutushi opo a pite eendodo dili heyali meedula ashike dili nhatu.

Oitwa yaye oyo a mona mekonaakono la xuuninwa loGrade 7 oiwa nokwa mona unene eeB neeC.

“Onda tameka ofikola mo 2011, eshi ndali ndina eedula 11, paife ondili mo Grade 7,” Kamutushi ta hokolola pauxupi.

Kamutushi oo paife eli mefiloshisho loMVA fund, ehangano olo li lile po ovo va monena oiponga moihauto, ohadi meumbo lovaenda hano o guest house i li mOngwediva opo ha futilwa nohafutilwa, oikulya onhele, nomufilishisho waye kehangano.

Ovadali vaye ova kala ve na ashike oshisho shokumufitila ofikola ashike eshi epangelo la kufa po oshisho sho futo yelongo lopetameko ovakulunhu vaKamutushi navo yoo ova mangululwa koshinakuwanifwa eshi.

Omukulunhu woMVA fund mOngwediva meme Eva Amakali okwa hokolola kutya, Kamutushi okwa monene oshiponga mo 2002 moWindhoek, manga ali ena eedula mbali adike. Konima yefimbo okwa ka kala na inakulu komukunda Oshandi mOshitukulwa shaHangwena.

“MVA fund oha talelepo ngoo eekastoma daye efimbo nefimbo ashike mupya munene, omafimbo aeshe oo hatu talelepo Kamutushi, ina tu dimbulula nande kutya kali ha i kofikola, shaashi otwa kala ashike hatu mu talele po momafudo ofikola. Otwe keshi dimbulula ashike efiku limwe hatu popi na meme waye mongodi kutya mboli iha i kofikola,” Amakali ta hokolola.

MVA fund okwa kendabala nee ngeno a kongele okamati aka ofikola peefikola domOhangwena ashike odo dili popepi nOshandi, odi li pefululu opo ita pa dulu oku enda okatemba.

Amakali otati eshi osha etifa nee opo ehangano li tokole oku kongela Kamutushi ofikola meefikola dimwe domOhangwena ashike, eshi ina ve mu monena mo onhele ove mu eta nee ko Charles Anderson oko a mona ofikola.

Amakali okwa ti, Kamutushi haye aeke ha pewa omakwafo ko MVA fund ashike opena yoo ounona vahapu ovo hava pewa omakwafo oludi naana eli omo yoo mwa kwatelwa vahapu ovo hava fikola meefikola domOngwediva.

 

Ku Helvy Shaanika 

LEAVE A REPLY

Please enter your comment!
Please enter your name here