Omutonateli womaliko a kendabala oku li dipaa nomeva opatilii

0
212

 

ONGWEDIVA – Omatango Etitatu oshivike sha ya hanga hanga a ashituka omahodi eshi omutonateli womaliko anwa omeva opatilii onga onghendabala yokulidipaa konima eshi a lilikila oshimaliwa shaye ashishe shokomwedi keshina.

Amuteya Samuel  womido 23  omukalimo omolukanda la Havana moWindhoek okwa dja kelungu konima eshi a nwa omeva opatilii.

Otaku hokololwa kutya konima ashike eshi a yakula oshimaliwa shaye shokomwedi Samuel oo halongele ehangano lonhumba lokutonatela omaliko moWindhoek okwa ya noku yukilila konhele yoku dana omashina nelalakano lokulimonena oshimaliwa shihapu.

Samuel oo ha mono oshimaliwa shokomwedi shifike po N$750, ota ku hokololwa kutya okwa lya eengunga  ku kaume kaye do N$1230. Eshi a mona kutya oshimaliwa osho a mona koilonga kashali tashi dulu oku futa eengunga daye, Samwel okwa ya aka te omashina, opo a fute eengunga daye yee ngeno eli xupifile po sha.

Mumwainagona waSamuel oo ina hala edina laye li popiwe okwa lombwela Kundana kutya ponhele yokufindana sha, oumaliwa va Samuel aveshe ova lika po po keshina osho she mu etala a ude nai neenghono. Omukwanedimo ou ota hokolola kutya  mEtitatu tuu omo, okwa yakula okatumwalaka kaxupi, hano oSMS yadja ku Samuel oo a lombwela ovakwapata  laye kutya oteke li dipaa.

moSMS omo, Samuel vati okwa lombwela mumwainagono opo aka tale olutu laye kokambashu kaye koHavana komatango efiku olo, shaashi ote li dipaa.

Mumwaina oo kwali a limbililwa neenghono okwa endelela opo a ye kokabashu kaye oko emu hanga eli monghalo ii neenghono.

“Okwa li a tambulilwa mOshipangelo shaWindhoek Central Hospital oko eendohotola detu lombwela  kutya oku na elao, ngeno okwa fya. Moshipanngelo okwa ningamo omafiku a tano.

Konima eshi a djamo moshipangelo, Samuel vati okwa lombela ofamili yaye kutya okwali ta kendabala okulidipaa shaashi kali ewete kutya ota ningi ngahelipi konima eshi a tapo oimaliwa yaye aishe, ye oku na oku futa eengunga.

Pauyelele oo wa yandjwa komishangwa dopaunongononi, opatilii yotuwa omuna oshikunguluki sho sulphuric acid eshi hashi dulu oku xwika noku ehameka omunhu.

Omadidiliko oo ta a ulike kutya omunhu okwa nwa omeva opatilii okwa kwatela mo okufuda noudjuu, oipute mokanya nopofingo, onghungo ina ohonde, okuhamonako nawa naashi luhapu ohashi xulile mefyo.

Ku Kakunawe Shinana

LEAVE A REPLY

Please enter your comment!
Please enter your name here