Where Others Wavered: Sam Nujoma – Omumvo gwOvamboland People’s Organization

0
260

Onda galukile koWindhoek, pethimbo ndyoka Hailwa Andimba Toivo ya Toivo a li a tidhwa koKapa nenge ta tu a “skotwa” molwashoka ye ngaashi Omusita Hamutumbangela na yalwe okwa nyolele kIigwana yaHangana kombinga yoshinima sha Namibia.Onda kala nda tseya iilonga ye yoku hwahwameka aaniilonga aaNamibia mboka ya li ha ya longo moKapa, ndele omupya omunene oongoka kutya ina tu vula oku tsakanena oshoka omashina getu oga pingathana  poJakkalsberg mpoka opo pwa li ha pa thikama omashina gokolutenda kuumbugantu waShomeya. Onda kundana kutya konima okwa ka kwatwa sho eshina lye lya thiki mOshomeya. Osha fa aapolisi ya kala ye mu landula oku za koWindhoek.Oonalunanga odhe mu kaleke okathimbo dhe mu edhilila nokonima odhe mu etha a ye kOndonga hoka oko a za moshitopolwa shokuumbangalantu.Sho a thiki mOndonga, Ya Toivo okwa kwatwa kOmukwaniilwa Johannes Kambonde[Sheepo Sha Namene] ngoka oye a li ta lele oshilongo shOndonga ethimbo ndyoka.Tse na Ya Toivo inatu tsakanena  no pwa ka pita omimvo odhindji ndele na tu ka tsakanene okonima sho  a mangululwa mondholongo okuza kontuntu ya Robben omumvo 1984, nonando otwa kala hatu nyolelathana ethimbo kehe omanga inaa kwatwa momumvo 1966.Oohailwa ooyakwetu mboka ya li koKapa mwa kwatelwa Andimba Toivo ya Toivo[ngoka a li Ominista Yoomina nIikwankondo], nakusa Jacob Kuhangua, na yalwe oya li mekwatathano noAfrican National Congress[ANC],o Congress of Democrats, Communist Party ya South Africa mewiliko lyomuprofesori uuviteko Jack Simons nomukadhi, Ray Alexander, nayalwe moongundu dhilwe dhopolitika ngaashi Patrick Duncan  na Randolph Vigne yongundu yoLiberals.

Oohailwa mbaka oya kala yi itula miinima yo politika moSouth Africa. Naashika osho etompelo limwe ndyoka lya tidhithitha Ya Toivo moKapa noku shunithwa koSouth West Africa . Kakele kaashika, Ya Toivo okwa li a tumine okateipa ku Mburumba Kerina ngoka aadhika nale eli ko New York moAmerica pamwe nOmusitagongalo, Michael Scott ya li taya pulakenwa koka KommiteekIigwana ya Hangana ke na sha nomukundu gwa South West Africa.Ya Toivo nooyakwawo oya dhikepo ehangano lyOvamboland People’s Congress[OPC] nokwe tu tumine okopi yekotampango lyayo. Momasiku 19 April 1959 tse otwa totopo ehangano lyetu lyOvamboland People’s Organization[OPO].Elalakano lyetu enene oku ninga ngaaka olyo oku hulithapo elelo lyuukoloni lya South Africa moshilongo shetu noshowo oku indila opo South West Africa a tulwe kohi yewiliko lyIigwana yaHangana, nelalakano ekwawo olya li ndyoka lyo ku hulithapo omukalo gwoku longitha aantu yetu pakondalaka, ndjoka  ya li ta yi hepeke noku thindila pevi aantu yetu.Omumvo tuu ngoka gweyovi 1959 opwa li pwa kambadhalwa oku shunitha aantu ayehe ya za koSouth West Africa ya li moKapa koshilongo shawo neipopilo kutya koSouth West Africa oku na ompumbwe yaaniilonga.Onkundana ndjika oya li ya shangwa moshifonkundana the Windhoek Advertiser. Ndele tse otwa li tu shishi kutya etompelo enene oondyoka kutya Ya Toivo okwa tumine okateipa ku Kerina kIigwana ya Hangana inaa monika.Tse otwa li ta tu kondjitha okwaana elongo, niilonga yuupika yokondalaka, nomukalo gwoku humbata opaasa shaampoka omuntu to ende. Kokutya omuntu kehe omuluudhe okwa li ena oku humbata oopaasa dhili ndatu, dho ndhika ohadhi ithanwa opaasa yokomwedhi , hayi ningululwa pehulilo lyomwedhi kehe, opaasa yuusiku ndjoka yi na oku kala ya shainwa komuhona gwomuniilonga ngoka noshowo nee opaasa yokupashiona nenge okweenda okuza koshilando  shimwe noku ya kushi kwawo.Ishewe omuniilonga okwa li woo ena oku humbata okambapila kefendelo. Uuna omuntu keena oombapila ndhoka esiku kehe otashi vulika wu kwatwepo kopolisi noku tulwa mondholongo.

Aaniilonga mboka ya za kuumbangalantu ha ya longo momagumbo ka ya li ye na uuthemba  okweenda momapandaanda goshilando, noku ya kolukanda kakele ngele oye na epitikilo lyomuhona gwawo. Epulo oondyoka kutya omolwashike omuntu ena oku kala a kondekelwa molugumbo lwegumbo lyomuhona gwe a fa ombwa.Ndika olya li etukano enene noshowo eshundulo enene koludhi lwaaluudhe. Ngame onda li nale nda tumina omanyenyeto kIigwana Ya Hangana mu February omumvo 1959 pamwe yaakwetu ya Hamano kombinga yoku kwatwa kwa  kwa Ya Toivo noku edhililwa muuwa wOmukwaniilwa, Johannes Kambonde pOkaloko. Oku za omumvo 1959 otwa kala hatu nyolele kIigwana ya Hangana ongo OPO, ndjokanando oya li ya dhikwapo koohandimwe oya li yi na eyambidhidho mokati kaaniilonga yokondalaka moWindhoek, mOld Location, nomokomboni yaPokkiesdaai.Ngame ondali omutoti peresidende gwoOPO, pamwe na Louis Nelengani omupevi- peresidende, manga Jacob Kuhangua okwa li amushangandjayi gwongungh ndjika.Ekotampango lyOPO otwe li tungila kwaandyoka lyOPC, twe li lundulula ashike kashona opo li vule oku longithwa pankalo yopolitika yomo South West Africa. Ngame onda topatopa ekotampango ndyoka neshina ekulu lyokutopatopa ndyoka ndaadhika opo nda landa komukiintu omuNdowishi gwomoVenduka. Omalalakano getu   okwa li oku kondja pwaana oluthuwo opo South West Africa a tulwe miikaha yIigwana ya Hangana opo sho woo shi manguluke.Otwa li tatu longo ongo omukwatikomeho papolitika oku kuthapo omikalo adhihe dhoku thiminikwa tse tu etepo epangelo lyuudemokoli.Okweetapo noshwo oku kalekapo uukumwe mokati kaaWambo, aaHerero, Aadamara, noshowo mokati kaaNama. Oku longa pamwe noshowo muuwanawa womahangano gaaniilonga nomahangano galwe. Oku katuka oonkatu dhopapolitika tadhi tsu kumwe nekotampango noshowo tashi tsu kumwe nomalombwelo, ga OPO. Elalakano ekwawo etungululo lyomeendelelo lya South West Africa moka aantu yamo opamwe naakwaniilwa yawo ta ya kala nuuthemba okwiipangela yoyene ongo aantu ya manguluka.Oku humitha komeho emanguluko lyopapolitika, pankalathano , noshowo pamahupilo unene gaantu mboka yiikwatelela mokulonga niikaha yawo nenge nomadhildhilo gawo opo ya hwepopeke oonkalamwenyo dhawo.

Otwa li woo tuna omalalakano gopaigwana, kokutya otatu longele pamwe nomahangano agehe gopashigwana, gopaudemokoli wuusociale moAfrica napalwe oku teyapo uupiyapika[nenge uuimperiale, uukolonyeki, uukwaludhi , uukwazimo noludhi kehe lwokatongo kiikwatelela kuukwaludhi, ethindilo pevi nokwaathike pamwe pamahupilo mokati kiigwana.Otwa li woo ta tu longele kumwe naaAfrica ayehe mboka ya li taya kondjele uukwumwe mokati kAfrica menenevi noshowo mboka yeli miilongo yilwe muuyuni.Uukwashilyo wOPO owa li wa egulukila omuntu kehe ena omimvo 18 ngoka ta tsu kumwe nomalalakano ngoka shampa ashike kee shi oshilyo shongundu yilwe ndjoka omakankameno gayo itaa ga tsu kumwe naangoka ga OPO. Onkene elalakano lyetu olya li lya kwata emanguluko, uudemokoli, ehulithopo lyiilonga yuupika yokondalaka noshowo okumanga kumwe aantu ayehe ya South West Africa.Dhimbulukwa kutya pethimbo ndika kapwa li omavigumbo ngaashi ga tulwapo konima, aantu ayehe kutya oomboka haya popi oshiDamara , nomalaka galwe oya li ta yaadhika miitopolwa yoshilongo mpoka yo ya lipo molwaalu omunene. Oya li woo miilando moka mwa li aatiligane nonando moka okwa li ya thiminikwa oku kala momalukanda kokule nomagumbo giilumbu. Aantu yokoKavango nayo oye tu joina woo mbala, nokonima otwa joinwa woo kwaamboka yokoshitopolwa shaCaprivi, ngashingeyi hashi ithanwa Zambezi. Otwa monene OPO iilyo oyindji nonando otwa li nuudhigu wo kwiinyenga moshilongo omolwa oshinima shoopaasa.Ngaashi nda hokolola metetekelo, omuvalelwamo kali ena uuthemba wokweenda a ze pehala lye a ka talelepo palwe keena opaasa ya shainwa komuhona gwe, ndjika oyina okuulika kutya okwa pewa epitikilo komuhona gwe.

Opo ihe ota kongo opaasa popolisi nenge pombelewa yoopaasa moshilando shawo opo a vule oku ka talelapo.Olundji omuntu nguka iha pewa omasiku ngoka iindile nenge a pula ethimbo limwe oha pewa ashike omasiku ngele ogendji gatano nenge gaali..Ngaashi nda hokolola montompolwa ontiyali ngame onda longela olutenda ,na onda li handi ende nomukuluntu gwiilonga yolutenda , onkene onda tseya nkene  tandi inyenge moshilongo ndaana opaasa. Onda li handi ifutile ondunda yomuntu gumwe moshikoto shoklassa yotango [oshoka eshina olya li lina iikoto yooklasa nenge oongundu ndatu, yotango oha yi endwa kwali owala kaatiligane, ontiyali okaaluudhe mboka ya talika ya huma omanga oyendji yomaaluudhe ayehe oha ya ende nee moshikoto shoklassa ontintatu]Shampa nda yi mondunda yandje ohandi ipatelemo , na ondi shishi kutya ngaata ngele teya oku pula uutekete pondunda yandje ita konkolapo oshoka okwi itaala kutya ita mu kala omuluudhe, oha yi eke ya konge koklassa ontintatu. Pamukalo nguka oondjindikila dhokweenda onde dhi henuka na onda vulu oku ya komahala ngaashi kOmbaye noku kongela OPO iilyo nokutunga po iitayi yongundu ndjoka noshowo kOshomeya.

Kondoolopa inaandi vula okuthika nuupu okoomina dhokawe koConsolidated Diamond Mines of South West Africa nenge CDM., oshoka hoka okwa li kehala lya indikwa kakele kwaamboka yena epitikilo oku ya hoka lya gandjwa ku CDM. Hoka otwa li ashike hatu tumuko uukalata wuukwashilyo kwaamushanga gwoshitayi ye ta nyola iilyo yetu hoka.Sho nda ka dhika oshitayi kOmbaye onda ifutile ondunda yomuntu gumwe meshina eta ndi ipatelemo naashi nda thiki mOmbaye onda zimo ashike etandi kutha ompunda yandje noku ya kolukanda hoka nde kuuhala Olyomakaya tandi popitha aaniilonga noku ya kumika  ya joine OPO.Osoondaha ongula onene onda yi kokomboni yaaniilonga yolutenda ondaadha omupolisi eli posheelo, ondi izaleke  ondjatha nohema ontokele nonda piti puye nda tya ombibeli neimbilo ,naanguka okwa dhiladhila kutya ngame omusita.Onda endele pamwe naaniilonga mboka ya li taya zimbuka okuza muusiku. Onda tameke tandi imbi yo nayo ta ya joina ndje mokwiimba ngame tandi ya fatululile kutya onde ya oku ya talelapo noku hokolola kutya Jesus okwe ya muuyuni oku hupitha aantu. Uunene tuu sho aantu ayehe ya valwa ya manguluka, ndele nee tse Aafrica ka twa li twa manguluka.Onde ya lombwele kutya okuza sho iita iitiyali yUuyuni ya hulupo iilongo oyindji oya li ta yi manguluka  ndele tse moSouth West Africa otwa li inaatu mona emanguluko natango,nonando otwa li woo tuna ku kala twa manguluka.

Ongundu oya tameke tayi ningi onene aantu taya gongala ya pulakene shoka tandi ya hokololele noyendji yomwaamboka oya joina OPO konima yokupulakena.Esiku ndyoka mokomboni ndjoka onda tsakanenamo na Hailwa Augustus Nghaamua”McNamara’ ngoka aka joina ndje muudjendi nokwa ka ninga omukuluntu gwomakwatathano gwoPLANA ndele okwa ka sila mu limwe lyomomalugodhi gekondjelomanguluko.Onda tsakanene woo na hailwa Vinia Ndandi ngoka nda ulike a ninge amushanga gwoshitayi shOPO mOmbaye.Pethimbo limwe otwa li twa pula Ndandi opo a ye ko UN teende iiyakela moskepa ndjoka yiile pOmbaye, ndele pehala mpoka a li ta vulu oku holama  ka pwa li pena ombepo ya gwana onkene okwa zipo naashoka kapitiya gwoskepa emu mono okwa shuna kOmbaye noku mu helulila komunkulo. Mpoka okwa kwatwa koonalunanga ndhoka dhe mu pula kutya okwa li ta dhiladhila kutya ota yi peni.

LEAVE A REPLY

Please enter your comment!
Please enter your name here