Yamwe yo maakulupe ya ninga woo oombudhi

0
209

Oshilishili nuumvo oyendji otwa li twa kenyanekwa komaihumbato  gaakulupe, nonando tweya talako  onga oontungwa dha siikilila ombepo.

Momvula ndjika yo2013 oshigwana osha tala nosha lesha uunene oonkundana odhindji dhiinenenima tayi limbilike, tayi tilitha notayi sithohoni  mbyoka  ya ningwa kaakulupe ngaashi omayikuthomwenyo, uufuthi, uukengeleledhi, okatoo noshowo okulongitha iikolitha sha pitilila.

Ano lela uuyuni wetu owa taalela peni sho oontungwa dhasiikilila ombepo odho dhilile iimbuluma komeho.

Omwedhi gwa ziko okwali kwa kundanekwa omukulupe gwomukiintu aniwa aninga uukengeleli sho aningi uumutse uuyali opo a kale ta taamba openzela yaakulupe iikando iyali momwedhi kehe.

Omukulupe ngoka okwa li nokuli a tamanekelwa ekengelelo sho ta ku tiwa kutya okwa yuga epangelo konyala oodola N$42 000 okuza moshiketha shopenzela yaakuluntu mokugandja oomvula dhuukokele we dhaashi dhoshili . Omukokele nguka okwa li a pewa iifutilemo oodola N$ 8 000 mondholongo yopolisi  pEenhana.

Ngele oto tala nawa shoka kashi shi oshiningwanima tashi vulu okuningwa komukulupe ena oomvula omilongo hamano nasha. Nonando uufuthi inawu pitikwa nando  moshigwana ashihe, osha sheshwa nayi oku wu uvila omukulupe.

Oshiwike shazi ko okwali ishewe kwa lopotelwa noku kundanekwa oshiningwanina moka komukulupe mwene gwomukunda ena oomvula 80, ta tamanekelwa uufuthi woondongili oonkani ndhoka taku tiwa ohedhi landitha po kwaamboka ya hala okupululitha omapya gawo oshoka oondongi dhawo odhasa moshikukuta shonuumvo.

Omukulupe okwa li amangwa po mEtiyali lyoshiwike sha yi sho kwa hololwa kutya oha landitha oondongi kadhi shi dhe ndhoka hadhi ya oku napa momukunda gwe okuza komikunda dhopopepi noshowo dhokokule.

Omwedhi ngoka gwa ziko Kansela gwOshikandjohogololo shUukwiyuushona okwa li woo a kenyenekwa kombepo yaakulupe yomoshikandjohololo she mboka ya pikwa ngashingeyi kiikolitha na otaya longitha iimaliwa yo penzela pa puko momalovu.

Dhika odho dhimwe dhomoonkundana ndhoka dha ningwa kaakulupe tadhi halutha.

Kakele kuufuthi aakulupe oya kwatwa wo kombepo yokwiikutha omwenyo mepipi lyuukokele. Shika omuntu oho kumwa nee kutya omadhilaadhilo ngaka oye ga etelwa kaagundjuka nenge ombepo yapuka ye ya kwatako?

Akwetu oshigwana shaNamibia otwa ukeni peni aano nge nani mbela iimbuluma niiningwanima ka yi na omapipi?

LEAVE A REPLY

Please enter your comment!
Please enter your name here