Ovakainhu vamwe ovaNamibia vakaninga eembwada moAngola

0
437

ONGWEDIVA –Angola paife okwa ninga onhele oko ovakainhu vahapu ovaNamibia hava i vaka landife omalutu avo nelalakano oku pewa odola ya America oyo ota i longifwa natango moshilongo osho.

Otaku hokololwa kutya ongudu yovakainhu ovaNamibia ove li koshilongo osho shi heli paveta.

Eyo lovaNamibia ava koAngola ola talikako ongo omukalo wouhupilo omolwa okuhena oilonga moshilongo oko okwa hapupala. Embobolokelo lovanyasha ava moAngola  okwa tengenekwa kutya ola ya pombada, eshi ouendelo wovaAngola mOshikango omo eembwada dihapu kwali hadi longele wa ninga muxupi. Nale ovaAngola vahapu ova li have uya okulanda keefitola moNamibia ashike eshi oita yopashiwana ya xula moshilongo omo, eengeshefa dihapu oda ka patulula oitai moAngola. Eembwada nado o datokola nee okushikula ongeshefa oo moshishiindalongo eshi.

Omuyandjimulombo wopolifi ya Namibia Kommiishina wopedu, Edwin Kanguatjivi okwa ti oshiima eshi oshi shivike kewiliko laNamibia, ndele nee ina dula oku yandja omuvalu kutya ovakainhu ve fike peni taku tengenekwa veli moilonga oyo moAngola.

“Ame mwene ondi shii nokutya ovaNamibia navo yoo ova tameka oku kufa ombinga mongeshefa youmbwada novafa naana ovakainhu vakwao vokonguloshi moshitukulwa sha SADC ovo va hoolola oku ka longela moilongo yi hefi yambulavo, na ohava i koishiindalongo oko hava ka longela oilonga oyo. Onghee ovakainhu vomoshilongo eshi shetu navo ova tokola oku longa ongo eembwada moAngola , kaimba ta va te eedola dAmerica,” Kanguatjivi ta ti.

Ota ku hokololwa vali kutya ovakainhu ovaNamibia oha va i moAngola tava pitile odoolopa yopeengamba ya Santa Clara noku ya keendolopa domOshitukulwa shaCunene ngaashi Ondjiva, noLubango. Omanga vamwe ova ya fiyo okoshilandopangelo Luanda oko vati kuna ongeshefa ili nawa.

“Oha veli vakele moAngola tava ende momaloli eendongelwa oo haa twala oilandomwa moshilongo osho, omanga vamwe ohava twalwamo kovalumenhu ovo vena eengeshefa dokulandifa eembwada  noha va twala  ovakainhu ovo opo va ka shakene novalumenhu vo ta va futwa molwa oilonga yavo,” omukwashiwana waNamibia oo eli koAngola ina hala oku tumbulwa ta ti.

Ota ku tiwa vati ovakainhu ovaNamibian ovo ova ninga eehotela domOndjiva oihadila yavo yokulongela oumbwada. Neenhele omo vati ovakainhu ava hava longele oilonga yavo ongaashi Aquia Verde hotel,  SOS Tropical na Pensao Mandume.

Vahapu vomovakainhu ava vati ove li hanga moudjuu osheshi ihava dulu okwaalukila koNamibia eshi va ya moAngola vehena omikanda doufemba oku ya omo.

“Oukadona ava otava hepa neenghono. Vahapu ohave uya omu vena oHIV omanga vamwe omo va kwatelwa komukifi omu. Ashike oshi djuu kuvo oku mona epango moipangelo yomoAngola shaashi kaveli moshilongo shavo. Ngee va xulifile, omafimbo amwe ohava fudikwa ashike kepangelo laAngola onga eehepele, shaashi luhapu kave shivike mo moshilongo nefimbo limwe ovakwanedimo vavo moNamibia ohava kala vena oupyakadi oku kufa ko omidimba davo, oku di twala keumbo.

Ombelewa youkalelipo shilongo shaNamibian ile oembasy ya Nambia ka ina omivalu doukadona ovo hava yi moAngola noilonga yoludi olo, osheshi ava inava ya moshilongo osho paveta ndele oveli vakelamo. Kaume kange umwe okwe li ndengelepo omwedi wadjako ndee tafi ndele nee yee okwali ena elao shaashi ovakwapata vaye ova ilako omudimba waye noku ke mupaka nefimaneko keumbo lavo mWalvibay,” osho omunangeshefa omuNamibia oo ena ongeshefa moAngola a tonga.

Omunangeshefa ot ta hokolola vali kutya ovaikainhu vahapu ova kala moshilongo osho eedula dihapu itava va dulu oku alukila koNamibia eshi vehena omikanda doku pita nado peengaba.

Otaku hokololwa yoo kutya ekalemo lovakainhu eembwada dovaNamibia moAngola ola hanyeka efiyafanepo moshilonga shoumbwada moAngola na ota ku hokololwa yoo kutya eembada dovaAngola  odo da kenyanana shaashi ovalumenhu ovAngola ohava hakana tete ovaNamibia osheshi ovena omupofi ngeenge tashi ya kofuto.

“Kombinga imwe ovalumenhu ovAngola ova handukile noku tanaukilapo vali eembwada dovaNamibia shaashi vati ovakainhu ava ohava vake, osho hashi eta opo ovalumenhu va hange eendjato davo doimaliwa da yela, ongula eshi tava ka penduka. Oivike ivali ya pitipo oukadona ouNamibia va vali ova dengwa vati eshi va vaka oikutu meumbo omo vali va nangala novalumenhu vavali,” omunangeshfa ou ta hokolola.

Ovakainhu ova Namibia vati paamha ohava longifa oingangamwifi molwaasho oyo oina ombiliha moshilongo osho.

Edi oda kolekwa yoo komukalelipo wopolifi moAngola Hofni Hamufungu oo a hokolola kutya kapena lela omuvalu wopambelewa ou ta u hoolola kutya moAngola omuna eembwada ngapi, ashike moshilongo omo omuna ovakainhu ovaNamibia vahapu.

Hamufungu oo hakala mOndjiva omo hamu pitile ovaNamibia vahapu ngee ta va i moAngola ota hokolola kutya okwa monene ngoo ouyelela oo ta u holola kutya moAngola omuyadi ovakainhu ovaNamibia ovo ve lininga eembwada ashike ngee ta va pulwa ohava ve li patana oshinima eshi nohavati vo oveya ashike moAngola opo va lande eexwiki deeBrazilian.

 

Ku Kakunawe Shinana

LEAVE A REPLY

Please enter your comment!
Please enter your name here