Sam Nujoma – Where Others Wavered: Olweendo lwopapolitika kOshomeya

0
224

Mu Auguste 1959 ondi iyakele kOshomeya oku z a mOvenduka opo ndi ka dhike oshitayi shOPO moshilando shoka. Sho nda thiki posasiona yeshina lyokolutenda onda tsakanekwa ku nakusa Leevi Mwashekele  ngoka a li ha longo momina ya Tsumeb Corporation Limited nenge pafupipiko TCL.Omanga inaandi za mo meshina okwa nongonene ndje mbala a ti aapolisi oya li taya kongo ndje. Okwa li ya tumu etumwalaka koosasiona adhihe dhomashina oshilongo ashihe konima sho ya ndhindhilike kutya kandali mo moWindhoek, onkene ngele onda monika nandi kwatwe. Onkene molwaashoka osasiona yomashina ya Shomeya onda li ndi yi shi onda kala ashike moshikoto shandje nda mwena, kakele koku lombwela Mwashekele opo a faalele oondjato dhandje kegumbo lye. Okwa faalele ondjato yandje. Konima onda zimo meshina no nda yi kosasiona yoombesa ndhoka hadhi fala aantu kOndangwa okuza kOshaanda okupitila mOshomeya.

 

Konima yotundi yimwe aapashioni mboka ya zi kOmbaye oya ende koompadhi oku za posasiona yoombesa mpoka, ngame nonda endele mumwe nayo. Sho tatu adha pokati koshilando otwa mono obloka yopolisi, naapolisi yaali aaluudhe oya li taya pula opo tu ipopye kutya otse oolye noshowo tu ulike oopaasa dhetu. Ooyakwetu mboka twa li tatu ende nayo oya gandja oopaasa dhawo noshowo oyi ipopi kutya oyo oolye, na oya li taya shuna kOwambo okuza kiilonga. Aapolisi mbaka yaali oya pula ndje opaasa yandje, ngame onde ya yamukula kutya nangame ondina opaasa ashike ngaashi yakwetu onkene ka sha li sha pumbiwa opo ngame ndi yi ulike. Aapolisi mbaka aananyalo oya etha ndje ndi tsikile nolweendo lwandje oku ya moshilando. Onda yi kumumwamemegona David Uushona a li ha longele moHotela ya Ackerman.Kongulohi shono kwa luudha, Leevi Mwashekele okwa tumu omwanakadhona Kathrina iile ndje kohotela, opo a fale ndje kegumbo lye kolukanda.Onda tsakanene na Mwashekele na otwa tulapo omathaneko noshowo omadhiladhilo na otwa longekidha po mbala oshigongi pethimbo lyelongeloKalunga, mpoka nda pewa ompito okufatulula omalalakano niilalakanenwa  ya OPO.

 

Pethimbo lyoshigongi onda kumike aaShomeya ya hwahwameke aantu yo ya dhikepo oshitayi shOPO moTsumeb. Onde ya pe oofoloma dhuukwashilyo noshowo oocopie dhekotampango lyOPO. Omusamane Mwashekele okwa li iitulamo shili na okwa hwahwameke aaniilonga ooyakwawo momina ya Shomeya.Onkene oshilando shika osha ka ninga oshinankondo muukwashilyo waOPO. Konima yelongeloKalunga otwa ka lya omwiha kaandja Mwashekele. Ndele okwa li ena uumbanda kutya pamwe aapolisi ota ya ka hadha egumbo lye omanga keemo, notashi vulika ndi ka adhikwe megumbo, onkene okwa tumu ndje pamwe nomwanakadhona opo a fale ndje ndi ka holame moshipangelo shomina.Poshipangelo opwa li omupangi gwomulumentu edhina Luanda aza koNyasaland nenge Malawi nena. Nguka okwa li omunambili, na okwa taamba ndje eta tula ndje mondunda ye moka nduuhala esku alihe na okwa li eetele ndje iikulya.

 

Otwa li twa kundathana kombinga yopolitika, twa popi kompumbwe yokuhwahwameka aAfrica opo yi imangulule yoyene.Pethimbo ndika aawiliki oyendji yAfrica oya li taya kondjele emanguluko. Luanda naye okw a li oshilyo shongundu yaandjawo yo Nyasaland African Congress Party mewiliko lyomuleli gwotango gwoshilongo shoka Omundohotola  Hasting Kamuzu Banda. Omanga ndili mOshomeya onda tuminwa ondelekelama okuza kOvenduka  kutya opolisi ota yi kongo ndje. Onkene nandi kale nda kotoka nawa nawa.Aniwa oya ile nookuli pegumbo lyandje lutatu nokupula omukulukadhi mpoka ndili ye okwa yamukula kutya ngiika ondili kolukanda nookuume yakiintu. Omukulukadhi gwandje okwa li eshi kutya onda ya molweendo lwowina kOshomeya. Uuyelele awuhe mbuka onda kala tandi wu taamba okuza ku Hailwa Nelengani ngoka oye a li omupeviperesidende gwOPO.

 

Kongulohi onda tokola okuthigapo Oshomeya neshina lyomitsalo ndyoka lyali hali fala ongopolo kOmbaye opo yi ka tuminwe koAmerica naEuropa.Eshina ndika olya li ashike lina oshikoto oshishona shokweenda ngaata, moka ngame nda londo. Ngaata okwe ya nokwa mono kutya ondi na okatekete kondilo kokweenda moshikoto shongundu yotango, na okwa pula ndje kutya omolwashike  tandi endele meshina lyomitsalo . Onde mu lombwele kutya onda li nde endelela nduuka kOtjiwarongo hoka kwa li meme teehama unene. Ngaata okwa etele ndje ohenda nokwa ithana ndje ndi kuutumbe popepi naye, sigo twa thiki mOtjiwarongo. Onda zimo meshina nokuya kolukanda kaandja Aaron Iipinge omulongisikola, moka twa kundathana iikwapolitika noshowo ekondjelomanguluko.

 

Molwaashoka kandali noopaasa yokweenda mOtjiwarongo onda tokola ndi tsikile ondjla yandje okuya kOmaruru, nosigo okUsakos, hoka sho nda thiki ko nda ka mona amushanga gwOPO, ngoka a li omuniilonga molutenda, mUsakos otwa ningi oshigongi noshigwana osho woo naaniilonga.Esiku olyo tuu ndyoka onda londo meshina tali zi kOmbaye lyuuka koKapa, okupitila mUsakos, Okahandja, noWindhoek. Onda yi mondunda yandje moshikoto shotango ndjoka hayi ende ashike omuntu gumwe, tandi mbesitele olusitati nenge ombelekehwa nonda tsikile olweendo lwandje okuya koWindhoek. Shono nda thiki mOkahandja, amushanga gwoshitayi shOPO okwa tsakaneke ndje nokwa lombwele ndje kutya oshaanawa opo ndi zemo meshina , ndaa tsikile nalyo sigo okoWindhoek. Ndele ngame onda li nda tila kutya otashi vulika ndi kwatwe molwaashoka okandolopa hoka okashona unene nomuntu keeshi gwaamoka ota dhimbulukiwa mbala.

 

Onkene onda tsikile olweendo lwandje sigo omoWindhoek. Poshitaasi shomashina onda aadha aapolisi  taya dhiingoloka ngiika ya tegelela ndje, onkene onda kala ashike meshina nda mwena. Aaniilonga oya li yiipyakidhila noku lundulula omalapi miikoto noshowo okutulamo omeya omape. Olundji omeya oha ga tilwa hi mpoka, onkene mevundakano nomekako ndyoka aapolisi oya zipo. Omanga ndili meshina onda mono omuntu ta hingi okatekisa kedhina Kauhuepuku, ngoka iile aapashioni, oku ya fala kOld Location. Onde mu ithana a kuthepo ondjato yandje omanga ngame nda ka landa sha shokulya pokasitola koposhitaasi ka tungilwa aaluudhe. Konima yokathimbo onda shuna ku Kauhuepuku na otwa yi naye kolukanda inaandi kwatwa.

 

Onkene onda thiki kegumbo nombili , nomukulukadhi gwandje okwa hokololele ndje shoka ashihe  sha ningwapo, kutya aapolisi oyiile pegumbo lyandje lutatu taya kongo ndje, komatango gesiku ndyoka onda yi ndi ka mone omupolisi Maritz poombelewa dha muni ndhoka kaadha li kokule unene negumbo lyandje. Onde mwaadha mombelewa ye noku mu pula kutya omolwashike ta piyaganeke omukulukadhi gwandje mokati kuusiku, eshi ningi iikando ayihe itatu. Onde mu pula kutya omolwashike inaa tala momambo ge kutya ngame onda futile egumbo lyandje uule woomwedhi ndatu okuuka komeho. Okwa yamukula ndje kutya mboka ya li pegumbo lyandje opolisi yoshitayi shoSpecial, oyo aniwa ye mu indile opo eyi fale pegumbo.

 

Maritz okwa pula epulo kutya ngele otwe shi pititha opo South West Africa a ye miikaha nometonatelo lyIigwana ya Hangana, ye ongo oshilumbu inaashi longwa otashi ka ningwa ngiini?Ngame onde mu lombwele nawa kutya, “Ngele ngoye omukwashigwana gwevi ndika nena oto kala miilonga yoye,shampa weethapo ondhino nokuhepeka  aantu”Okwa tala ndje nawa ngame nonda zimo mombelewa ye.Konima yoshiwike shimwe onda ka tsakanena nomupolisi gwospecial, Andreas Nangolo ngoka a lombwele ndje kutya onda halika komupolisiVan der Watt gwoshitayi shawo mombelewa oonene moWindhoek . Konima yiiwike iyali onda yi kombelewa ya Van der Watt, na onda kuutumba koshipundi ndeegamena kondjatha ye ndjoka a li a tula kusho.Sho eya mombelewa ye okwa popi nomagandambadhi a pula kutya olye pendje epitikilo ndi kuutumbe koshipundi shoka. Ngame onde mu yamukula woo nomagandambadhi ndati ye ina ithana ndje ndi  kale nda thikama esiku alihe mombelewa ye. Okwa lombwele konima kutya ye ha ye iithana ndje ndele ngoka iithana ndje oKapitia Blaauw  omukuluntu gwawo. Blauuw oye ngwiyaka omushona iiyumbilile ndje manga nda li te longo poombelewa dha Carsten Veld mu Auguste 1959.

 

Onde mu yamukula kutya kandina ko nasha kutya olye iithana ndje.Opo ihe Van der Watt okwa ti ota ulukile ndje mpoka pena ombelewa ya Blaauw. Ihe ngame onde mu lombwele opo a fale  ndje kombelewa ndjoka.Sho nda thiki mombelewa ya Blaauw onda adha mo aapolisi yatatu ya zala omizalo omiluudhe. Omanga Blaauw a kuutumba konima yoshitaafula oshile shafa mbyoka ha yi kala pomahala mpoka hapa thikilwa.Blaauw okwa lombwele ndje ndi mwene, oshoka ondili mombelewa yopolisi. Ngame onde mu yamukula nda ti kena uuthemba oku gandagula ndje ngaaka, ye okwa thikama nokwa kambadhala okuundulila ndje kaapolisi mboka yatatu. Molwaashoka okwa li omuhupi ishewe okwa li a fa inaa lya nawa, onde mu hilile kombanda yoshitaafula , nokwa fa eehama komapepe ge, onde mu lombwele woo kutya onda hala oku mu longa oshilongwa.

 

Pethimbo ndyoka omupolis Johannes Muleko oshilyo shoSpecial Branch a za kOkavango ena oshilukadhina “Warmgat’ okwa kambadhala oku ya moohapu dhetu andola a toloke oku za mOshiwambo oku tula mOshimbulu, ndele ngame onda ti ndi ekwathelo lye. Aapolisi mboka yatatu yomizalo omiluudhe inaya tya nando osha , nenge ya kambadhale ootu ya ponokele ndje, ngaashi osho ya li ya dhiladhila.  Shono andola ndi ze mombelewa ye, Blaauw okwa lombwele ndje kutya mengestrata gwa Shomeya ota kongo ndje oshoka onda li kondoolopa ndjoka ndaana opaasa. Ngame onda zimo mombelewa ndjoka. Onde kuuva ehokololo kutya konima sho nda zi mOshomeya, Conradie a li ha longo poombelewa dhoopaasa mOshomeya okwa kundana kutya omo ndali mokalando hoka.Oohapu ndhoka aniwa okwa li edhi lombwelwa ku Luanda ngoka a li a edhilile ndje mondunda ye.

Luanda aniwa okwa lombwele Conradie kutya Sam Nujoma oya ile puye opamwe naKathrina omwanakadhona gwaLeevi Mwashekele. Opolisi oya li ya kwata Kathrina noku mu pula noku mu dhenga, nokonima nguka okwa ka hokolola kutya osho shili Sam Nujoma okwa li mOshomeyaa. Okuza mpoka ngame inandi enda mo we mOshomeya  andola ndi ka pangulwe. Konima  yomwedhi gumwe onda tumine iiponda itano ku Blaauw okufuta egeeelo lyandje sho nda yile kOshomeya ndaana opaasa.

LEAVE A REPLY

Please enter your comment!
Please enter your name here