Brave Warriors ya dhengwa ku Ghana okoola yimwe monola muudhano wopambili

0
354

WINDHOEK – Epuko lya nanthangwa lya ningwa komukwati ngoka a pyokoka gwa Namibia , Athiel Mbaha noshowo omapuko gamwe ga ningwa kaadhani yokomeho yosipana ya Namibia Brave Warriors ogo ga pewa ombedhi sho ospana ndjika inaa yi vula okushipondola okutula nando oyo okoola yimwe mokoola ya Ghana. 

Uudhano pokati ka Namibia na Ghana mboka wa dhanenwe Olyomakaya gaziko moVenduka  owa hulile mo Brave Warriors ya dhengwa okoola yimwe monola ku Ghana pokapale kEmanguluko moVenduka.

Namibia okwa tulwa okoola methimbo lyominute 27 sho uudhano mboka wa tameke, sho omudhani gwokomeho gwa Ghana, Sulley Mohammed a thangelemo etanga ndyoka Mbaha a li inaa kwatapo nenge eli thangele kokule konima sho eli shuninwa ku kapitiya gwospana ndjika Da Costa Angula.

Konima yokutulwa okoola Namibia okwa papudhuka noku tameka tadhana neitulemo  naadhani yoBrave Warriors yokomeho ngaashi Sidney Urikhob, Deon Hotto, Willy Stephanus na Petrus Shitembi oya kala noku keelelwa mokoola ya Ghana ndele nee oya ndopa okutulamo okoola.

Okuuka pehulilo konyala lyedhingoloko lyotango Namibia okwa tsikile okudhana nokuponokela Ghana ndele nando ongaaka shoka ina shi ya pa nando okoola yimwe.

Olundji aadhani yokomeho oya kala ya fa ashike yaana ontseyo yoku tulamo ookoola.

Medhingoloko etiyali uudhano owa tsikile konyala wafaathana moka Ghana a kala ashike ta gamene okoola ye opo yaa tulilwemo ku Namibia. Yo aaNamibia ya tsikile noku ponokela ombinga ya Ghana neinekelo kutya pamwe otaya tulamo nando oyo yimwe yimwe ya kale andola ye thike pamwe ndele iiponokela mbyoka ina yi ndjambula sha.

Uudhano osho wa kala tawu dhanwa ngaaka sigo wa ti pehulilo sho omuhikihiya Helmut Andreas a hiki ohiya ya hugunina.

Mannetti okwa kuthamo Mbaha mokoola ete mu pingenepo nomukwati omugundjuka Llyod Kazapua mominute 61.

Okwa kuthamo ishewe  aadhani aakulu eta etamo mboka aape ngaashi mboka, yooTreasure Kauapirura, Panduleni Nekundi na Theophilus Tsowaseb ye ya pomahala gooDennis Tjetjinda, Urikhob na Shitembi, ndele nando okwa ningile omalunduluko ngoka Namibia natango okwa li andopa oku tulamo okoola nando opwa li oompito odhindji okushininga.

Nekundi okwa li eshi pondola oku dhana noku piyaganeka aatalelipo ndele nando ongaaka omatanga ge oga kwatwamo komukwati gwa Ghana.

Aadhani ooyakwawo mboka woo ya ka tulwamo muudhano nayo oya kala nokupalutha okutula etanga mokoola.

Ghana okwa thigipo oWindhoek metitatu okuya koBloemfontein moSouth Africa hoka ta ka kala a tegelela etameko lyuudhano womanyakwa gaaAfrica mboka tawu tameke momasiku 11 January nuumvo.

Ku Otniel Hembapu

LEAVE A REPLY

Please enter your comment!
Please enter your name here