Ehumokomeho otali ende nawa mOnayena

0
202

ONAYENA – Oshikandjohogololo Onayena  osho shimwe  shomiikandjohogololo yili mOshitopolwa Oshikoto tashi endelele oku huma komeho.

Pankundathana na Kansela gwOshikandjohogololo Onayena Max Nekongo, moshikandjohogololo she omuna omauwanawa ogendji ngono aantu yakala ye ga pumbwa no paife oye ga mona.

Momauwanawa ngono omwakatwelwa iilonga yoopate mbyoka yali ya egululwa konima ashike yoomwedhi ooshonashona niilonga mbyoka oyili metifa.

Nekongo okwa tumbulapo yimwe yomomakwatho ngono yiipyakidhila noku andjakaneka moshigwana ngaashi oopate ndhono tadhi longwa , noosikola ndho dhili popepi nopate  otadhi ka mona omauwanawa ogendji.

Ta holola kutya opwa thanekwa okapangelo hono ta ka kala pOmulondo na oya dhiladhila opo egongalo kehe lili moshikandjohogololo li kale lina okapangelo.

Shika otashi kwathele aakwashigwana opo kaaya ende we oondjila oonde oku ka konga omayakulo guunamiti.

Epangelo otali andjakaneke omalusheno moshikandjohogololo komahala nomahala mwa kwatelwa oosikola adhihe odhina olusheno na okuniwe edhiladhilo opo  Oshikandjohogololo Onayena shi ye pamuthika go Village Council muule woomimvo omishona.

Ehumokomeho otali ende nawa mOnayena na Kansela Nekongo ota holola kutya mongaashingeyi moshikandjohogololo she otamu tungwa ehala lyomangeshefelo  ndyono lili mewiliko lyo Namibia Development Corporation (NDC).

Mehala muno otamu kakala muna oombaanga dha yoolokathana, omatala, oongeshefa dhomaludhi ogendji ndhono tadhi ka watela aakwashigwana ayehe.

Kansela ta holola kutya ehala ndino lyomangeshefelo otali ka gandja oompito dhiilonga kaakalimo yomoshikandjohogololo Onayena. Ye ta gwedhapo noku kwashilipaleka kutya oya thaneka ando mu May omvula ndji opo ehala ndino lyomangeshefelo li kale lyapwa ku tungwa.

Kansela okwa pandula Epangelo sho tali kambadhala mpa tali vulu oku hedhitha omayakulo popepi noshigwana ta tsikileko noku indila aakwashigwana ayehe ye kiinyolithe opo ya vule okuhogolola pethimbo lyomahogololo oshoka olya thika.

Ku Maria Namupala

LEAVE A REPLY

Please enter your comment!
Please enter your name here