Kapena omvula

0
212

ONGWEDIVA – Onkalo ya nika oluteni ndjoka tayi holoka ngashingeyi miitopolwa yokuumbangalantu oya etele aalongimapya miitopolwa mbyoka omaipulo unene tuu kombinga yiilya yawo mbyoka tayi pi komutenya ngoka gu liko. Aanamapya oya adhika ya kuna omahangu, iilyawala,omapungu nomakunde.

Omutenya nuupyu wetango otawu kukutike evi naashika osha eta opo iimeno yi tameke  okulemba omolwa onkalo yompumbwe yomeya mevi.

“Ngele onkalo ndjika oya tsikile ngeyika pwaana omvula nena otashi vulika tu kale inaatu ka teya sha nuumvo.Otwa li twa fudha kashona omwedhi gwaziko sho omvula yali ya loko niimeno yetu oya tamekele okumena, ndele mbika ngashingeyi oyi lipo tayi lembe nokuganya oshoka mevi kamuna we meya ga gwana yo omvula oya kalako. Iilya nenge iimeno yetu oyilipo tayi ganya  omolwetango epyu. Iilya yetu otayi si,” osho Regina Paulus gwomOkatana a ti.

“Okwaana omvula otaku hepeke iimeno yetu, naahuka otaku ka eta uupyakadhi kombinga yegameno lyiikulya megumbo lyetu. Ongula kehe ngele twa penduka ohatu yi ,mepya eta tu pulula oshoka itatu vulu ashike okupenduka twamwena twaana shoka tatu longo oshoka inatu hala twaadhike inatu ilongekidha uuna omvula ya loko. Oshikwawo iimuna yetu nayo oyi li ishewe muudhigu oshoka mbika otayi kwela kwela ashike okukonga uunapelo noku lya shaashoka shilipo. “ osho Soini Paulus gwomOmatando a ti.

Omunambelewa gwomayakulo gOpaunamapya mUuministeli wUunamapya, moshitopolwa Omusati Martin Embundile okwa ti onkalo yoluteni oya guma iitopolwa ayihe muumbangalantu, naashika otashi etitha omaipulo, oshoka oluteni ngele olwa tsikile nena itapa ka kala eteyo.

“Oshizemo otashi ka kala ngiini ngele onkalo oya tsikile ngaaka, tse otwa li nale twa gandja oombuto ngaashi twa lombwelwa kUuministeli wetu, ndele oshigwana oshina oku tseya kutya olundji January omwedhi ihaagu lokwa naanaa nawa. Aantu yetu oyena egamo okulonga mbala niimeno yawo yotango oha yi hepekwa koluteni ndoka ndele olundji ohaya kunununa uuna ya mono kutya omvula oya tameka ishewe okuloka.Sigo oompaka itatu ti itaku ka lokwa na otuna etegameno kutya omvula otayi ya, na otwa tegamena kekwatho lya Kalunga okutupa omvula.Itatu pumbwa oku kantha etegameno,’Embundile a ti.

Ku  Kakunawe Shinana

LEAVE A REPLY

Please enter your comment!
Please enter your name here