Kotokeni kombinga yohole ompe, taleni nawa aaholike yeni aape

0
290
Omukwatakanithi momakonakono giilonga yomiyonena mopolisi mo//Karas Komufala gwopevi gwopolisi, Rudolf Isaaks

KEETMANSHOOP – Opolisi moshitopolwa sha //Karas oya indile opo aantu mboka yena omwakwatathano gopahole itaaga ende nawa ya konge ekwatho lyopahungomwenyo okuyeleka nokudhipaga noshowo okwiidhipaga yoyene.

Omukwatakanithi momakonakono giilonga yomiyonena mopolisi mo//Karas Komufala gwopevi gwopolisi, Rudolf Isaaks okwa lombwele Kundana kutya omiyonena ndhika omidhigu oku monikwa oshoka opolisi itayi vulu okumona kutya oshike tashi inyenge momutse gwomuntu.

“Nguka ogwo omuyonena gumwe ngoka itaagu vulu oku ngambekwa kopolisi oshoka tse itatu vulu okulesha shoka aantu taya dhiladhila. Omayele ngoka tatu gandja kombinga yaashika ogo owala ngoka kutya mboka ya halika kaalumentu aape kuyo naya kotoke yaa zimine ashike mbala ndele ya konakone manga kutya omuntu ngoka okwa tya ngiini nomaihumbato ge oga tya ngiini. Oshoka olundji omalalakano gomuntu ngoka ka ge shiwike kutya oga shike. Pamwe otashi vulika omuntu ngoka ena ondjokonona yelongitho lyoonkondo,” Isaaks a ti,.

Isaaks okwa ti omiyonena moshitopolwa shoka odha shuna pevi ndele efudho lyomatango omanene olya li lya piyaganekwa  komadhipago genasha niihole, ngoka kwa ndhindhilikwa ga holokela moshitopolwa shoka.

Okwa indile ishewe oshigwana opo shi hokolole uudhigu mboka shina unene uuna omuntu inoo halika we kumukweni, konga ekwatho paaniilonga yonkalonawa nenge kaasitagongalo, nenge komuntu ngoka wuli popepi naye, noshowo kutya nando ino halika we ku kuume ngoka , ndyoka ka li shi ehulilo lyuuyuni.

Okwa kumagidha woo mboka yena oondjembo opo ye dhi kwate nawa uuna ta ye dhi longitha, Okwa ti ooyene yoondjembo na ye dhi kotokele nawa noku kala nawa nadho.

“Mboka yena oondjembo paveta inaye dhi thiga ashike dha holekwa nenge dha lala shaampoka. Oshoka olundji ndhika ohadhi gwile momake gapuka. Ooyene yoondjembo ina ya thiga oondjembo dhawo kohi yiipundi momahauto gawo ndele oshaanawa oku kala noondjembo dhawo kolutu. Uuna omuntu ondjembo itee yi longitha oshaanawa oku yi patela mehala  hali edhilwa nawa.

Isaaks’ okwa popi ndhika sha landula kiiningwanima yomadhipago gaanahole ngoka ga ningwa moshitopolwa shoka pethimbo lyomatango omanene.

Oshiningwanima shimwe oomoka omulumentu gwomimvo 35 adhipaga kuume gwomimvo 23 Osoondaha poRosh Pinah.

Moshiningwanima oshikwawo , Andreas Hosea ‘Rickey’ Tsei-Tseimou okwa yaha kuume ke  Tessa Christiaan (22) iikando ine omolwa ongeyo omanga Okili inaayi adha. Okwe shi ningi poKaiti.

Tsei-Tseimou okwe kiidhipaga omanga kuume ke  Christiaan okwa hupu moshiponga shika.

Kenorita Beukes, omukalimo gwomoRehoboth okwiidhipaga  sho iiyaha nondjembo yakuume ke poKaiti.

Oshilyo shetanga lyegameno, Hendrik Alweendo Amutenya  osha dhipaga omuholike gwasho nale  Felicity Draghoender  nuuta woAK 47 poKarasburg.

Pamahokololo, Amutenya okwa fadhukapo okuza pehala lyoshiponga nokwa kaadhika iiyaha nondjembo esiku lya landula.

Omunambelewa gwopolisi, Hermanus Bikeur, naye okwiidhipaga sho iimangeleke poAus.

Ku Jemima Beukes 

LEAVE A REPLY

Please enter your comment!
Please enter your name here