Omudhanitanga Eusebio a mana oondjenda mepipi lyomimvo 71

0
222
Enyakwa lya tseyika nawa muudhano wetanga lyokoompadhi nomudhani gwa Putu Eusebio da Silva Ferreira, ngoka a mana oondjenda dhe oshiwike shayi mepipi lyomimvo 71.

Omudhanitanga lyokoompadhi gwokomeho mosipana ya Putu noshowo ndjoka ya Benfica, Eusebio, ngoka a talika ongo gumwe gwaadhani dhingi gwethimbo alihe okwa mana oondjenda dhe molwa edhengo lyomutima mepipi lyomimvo 71.

Oshikundaneki shepangelo sha Portugal shedhina Lusa osha koleke kutya Eusebio okwa huluko ongula yOsoondaha ya yi. Okwa li gumwe gwomaasimani muudhano wetanga lyokoompadhi muuyuni.

Okwa li a pewa oshilukadhina the ‘Black Panther’ omolwondapo ye noshowo uutile mboka a li ha tula maadhani mboka taya kondjtha osipana ye.Eusebio ngoka eli omvalele ya Mozambique okwa kwathela osipana ye ya Benfica oku ya kuudhano wa hugunina wekopi lya Europa iikando yili ine . Na okwa sindana ekopi ndyoka nosipana ya Benfica omumvo 1962 na okwa li woo a dhana pethimbo ndyoka omumvo 1968 mono osipana ye ya dhengelwe kwaandjoka ya Manchester United.

Eusebio ngoka a za mo Maputo pethimbo lyuukoloni kwali hashi ithanwa Lourenco Marques, okwa li a tegelelwa a ka joine osipana ya Sporting Lisbon ndele  okwa lundulula etokolo  lye nokwa joina Benfica . Nonando okwa li hadhanene osipana yopashigwana ya Putu okwa kala eshiwike ongo omudhani dhingi omuAfrica ethimbo ndyoka sigo oosho pwa ka holoka aadhani aape aaAfrica ngaashi yo Samuel Eto’o Didier Drogba na Abedi Pele.

Eusebio okwa kwathela osipana ye yoBenfica okusindana omakopi goliha ya Putu iikando 11 pokati komimvo 1961 no 1975 moka a tulamo ookoola 638 momaudhano 614, na okwa sindanenepo epapa  lyomudhani dhingi muuyuni lyo Ballon d’Or omumvo 1965.

Esimano lye lyopaigwana olya ka adha ondondo yopombanda pethimbo lyuudhano wekopi lyuuyuni moEngland omumvo 1966, moka Putu eya pehala etitatu na Eusebio okwa li omudhani gwopombanda ngoka a li a tulamo okoola odhindji pethimbo lyuudhano mboka.Okwa li a tulamo ookola omugoyi, ne dhomwaandhika odha li dha tulwamo pethimbo Putu ya li ya dhana na North Korea mokwartefinala moka North Korea a dhengelwe ku Putu ookoola ntano mundatu.

Okudhana kwe nawa omumvo ngoka okwa li kwe mupethitha omapapa ngaashi lyolukaku lwoShingoli etanga lyoshikushu ongo omudhani dhingi methigathano ndyoka, na okwa li woo a pewa epapa lyo BBC lyomudhani gwokomumvo gwokiilongo yokombanda yomafuta omumvo ngoka.

Eso lye olya li lya tseyithwa kotiivii yepangelo noshowo lya kolekwa kiikundaneki yomaudhano yomoPutu..

Okwa dhanena oshilongo she iikando omilongo 64 moka a tulamo ookoola 41 nomasindano ngaka oga kala uule womimvo omilongo mbali inaaga vulika komudhani gulwe ando.

“Okwa li gumwe omunene momaudhano moPutu. Otandi dhiladhila oye gumwe itaa dhimbiwa.Atuhe otushi ongushu ye kuudhano wetanga lyokoompadhi  unene tuu moPutu,” osho omudheuli gwosipana ya Chelesea Jose Mourinho a lombwele  iilonga yomombepo ya Putu yedhina RTP.

“Ka kwali ashike omuntu ena enwethemo kutse ndele okwa li wo omugandji omwaanawa gwoshiholelwa ngele tashiya moku landula oompango dhuudhano wetanga lyokoompadhi,”Omudheuli nale gwoosipana ya Porto, Inter Milan na Real Madrid a gwedhako.Omanga Cristiano Ronaldo okwa simaneke Eusebio moku tula ethano lye a thanekwa pamwe na Eusebio koTwitter.

Eusebio okwa hulitha okudhana etanga lyokoompadhi sho a li ha dhanene ospana yimwe moAmerica ndele konima okwa ka shuna koPutu, hoka a kala niinakugwanithwa ya yooloka, Okwa li ha ithanwa omukwaniilwa moPutu.

LEAVE A REPLY

Please enter your comment!
Please enter your name here