Omukiintu iitomeke yemwene omulilo

0
230

OKAPYA – Omukiintu gwomimvo 51 okwa si eso li nyanyalitha sho iifikile yemwene mondunda ye yokulala.

Mesiku lyesakalo lyOkilisimesa oshigwana shomOnkuni moshitopolwa Oshana osha li sha haluthwa komulilo ngoka gwali tagu pi mulimwe lyomomagumbo momukunda ngoka.Omulilo ogwa li gwa hwama megumbo lya Johanna Edward Shiwinga moka ye a kala noyana yatatu noshowo omutekulu.

Shiwinga ngoka a li ihaa longo okwa ipatele aniwa mondunda ye yokulala komatango gEtiyali nokwa hwameke ondunda ndjoka omulilo nokwa pilemo.

Pahapu dhomushiinda ngoka a yakeleko, Johanna Johannes okwa ti Shiwinga okwa li emu hokololele kutya okuna uupyakadhi tawu etwa koyana yaamati yaali, naashika otashi vulika osho she mwetele okwaana ombili, noku dhiladhila kutya ota hulithapo uuwehame mbuka mokwiidhipaga. Okwa thigiko oyana aamati yaali nomukadhona gumwe.

Nonando shika itashi vulu oku kolekwa kutya osho sha thiminike Shiwinga iidhipage pamukalo ngoka, ota pa hokololwa kutya omwanamati gumwe gwomimvo 32 aniwa okwa hanagulapo iimaliwa yoodola omayovi 2 000, mbyoka Shiwinga ali a tuminwa kaakwanezimo lye haya longo koSwakopmund eyi longithe okulanda ominino dhomeya.

Pahapu dhomwanakadhona Maria Manya, mesiku ndyoka osha li she mu kumitha kutya omolwashike yina inaa zamo natango mondunda ye, oshoka olundji ethimbo ndyoka oha kala nale a pitamo.

“Onda penduka okwiilongekidha ndiye kiilonga nonda mono kutya meme okwa li natango mondunda ye, naashika osha li oshikumithi oshoka aluhe ethimbo ndyoka andola okwa penduka nale. Onde mu popitha ndili pondje yondunda okwa zimine ndje nokupopitha ndje woo. Ngame nonda tsikile okulonga shoka ndali te longo onda fulukitha omeya opo ndi iningile otee, ndele natango okwa li ashike eli mondunda ye. Onde mu laleke omanga inaandi ya kiilonga kOndangwa. Omanga ndili mondjila oku ya kiilonga onda kala nomaipulo kutya oshike mbela sheeta opo meme a kale natango mondunda ye kwasha ngaaka, ndele nando ongaaka ngame onda yi kiilonga,” osho Manya a ti.

Okwa ti yina omumweni nolundji iha lombwele nando olye uupyakadhi mboka ena, niishewe ina ulika ootu kutya okuna uupyakadhi wontumba omanga shika inaashi ningwa.

Omanga eli kiilonga Manya okwa dhengelwa ongodhi opo a tondokele kegumbo oshoka yina okwa sile momulilo.

Omushiinda gumwe oye a tondokele kegumbo ndyoka ta kugu oku ithana aashinda konima sho a mono omulilo tagu pi megumbo ndyoka.

“Onda uvu edhina lyandje tali ithanwa kumushiinda,ndele inandi koneka mbala kutya ota ithana Shiwinga ngoka woo ena edhina Johanna. Onda matukile pondje opo ihe ondamono oshikogo sholwithi talu zi megumbo lyameme Shiwinga. Onda matukile mbala megumbo nonda kutha eyemele lyomeya nokumatukila kegumbo ndyoka oku ka dhima omulilo, ngoka twa mono kutya ogwa fika ondunda yaShiwinga.Ka twali twa tseya kutya Shiwinga oku li meni oshoka ongula ndjoka otwa li ashike twe mu mono lumwe tiinyenge pondje yegumbo lye.Otwa kambadhala oku egulula omweelo ndele nguka ogwa li gwa patwa nekumba noshowo gwa mangwa nelyenge okuziilila meni. Omusamane gwandje okwa kuthapo oondhopi dhimwe opo ihe otwa mono kutya Shiwinga okwa li meni a pilamo itaa vulu noku dhimbulukiwa,” Manya a ti.

Ku Kakunawe Shinana

LEAVE A REPLY

Please enter your comment!
Please enter your name here