Onakalunga ya mona mwene gwomukunda

0
192

ONAYENA – Elelelo lyOpamuthigu-lulwakalo lyaNdonga olya ulike Sakeus Andreas opo a ninge mwene gwomukunda Onakalunga. 

Omukunda Onakalunga ngoka guli moshitopolwa shaShikoto ogwa kala kaaguna mwene gwomukunda nogwa kala tagu ilele gogwene okuza mo 2008 sho Johannes Amupanda Namene ngoka a li mwene gwomukunda a hulitha.

Momasiku sho gali Decemba 21, 2013 tatekulu Andreas okwali a langekwa pambelewa. Nande a kala a ulikwa nale kelelo ndino kutya oye ta lele omukunda nguka ina kala a langekwa pambelewa. Poshiithanene mpaka opwa li pwa kala aaleli yopamuthigululwakalo yoondondo dha yooloka oshowo aakalimo yomomukunda ogo tuu nguka.

Okwa li pwa ningwa iipopiwa oyindji ya yoolokathana naangu ali omupopi gwesiku okwali mwene gwoshikandjo shUukwanambwa Wilbard Lidker.

Pethimbo ta popitha aakwashituthi  okwa gandja ombili kaanamukunda sho ya ningi ethimbo yiidhidhimikila onkalo yokwaahena ngu te ya lele nokuya kwashilipaleka kutya ngashingeyi oya mona nee ngu te ya lele nongele yena omaupyakadhi naya  ka lopote ku mwene gwomukunda gwawo ano tatekulu Sakeus Andreas ngono a langekwa esiku ndyo.

Mwene goshikandjo osho tuu shika okwa li a tumbulapo dhimwe dhomoompango dhoshilongo noku guna aakwashigwana opo ya iyuthe kudho nokulongela kumwe na mwene gwomukunda yoo kaa ya kale ye mu dhina ngaashi omikunda dhimwe dhili.

Lidker okwa  kumagidha mwene gwomukunda  kaa ha kale gopuundingosho onkene na kale owala ta longele megumbo ye na kale ta pula omakwatho mpa sha pumbiwa.

Ta tsikileko nokumu guna kutya uuna omukunda gwe gwa adhika kuupyakadhi ne wu kandulepo ngaashi tashi vulika nongele ota nyengwa na tseyithile Elelo lyOndonga meendelelo opo a kwathelwe.

Aakalimo yomomukunda ogo tuu nguka oya nyanyukwa moku mona ngu te ya lele oshoka ngashingeyi otaya vulu okugandja uupyakadhi wawo oshowo omikundu ndhoka tadhi holoka momukunda gwawo.

Oya ulike enyanyu lyawo noondigolo  noku imba oondjimbo ndhono dhali tadhi nyanyudha shili.

Ku Maria Namupala

LEAVE A REPLY

Please enter your comment!
Please enter your name here