Ovanashilonga sho NDF momeva mapyu

0
268

ONGWEDIVA – Omukwaita umwe oo eli omunailonga moNamibian Defence Force, hano metanga leameno koRuacana, okweli hanga momeva mapyu eshi a kufa po otuwa yoilonga shihe li paveta ndele teke i kandoma po. 

Pamulombo oo wa pewa oshifo eshi keedjo daKundana, omafiku aa omulumenhu umwe metanga lEameno oo ali a fiwa a tonatele pakafimbo okamba yokoRuacana, okwa kufa oshihauto shoilonga osho ehena oufemba wokushishinga ndee tava i nakaume kaye oo eli yoo omunailonga pamwe naye mokamba tuu omo keendingosho.

Kakele kokukufa oshi endifo shihe li paveta, otaku hokololwa vali kutya omulumenhu okwafa  ehena ombapila yokushinga.

Ovalumenhu ava vena eembadi douleutenant vati ova uhala nokutokelwa efiku olo nookaume kavo tave li udifa nawa poundingosho vomoRuacana.

Konima yefimbo ova pa olefa ovakainhu vavali, mwakwatelwa omunailonga womokandingosho nomukainhu umwe womupolifi. Ovalumenhu ava ova pa yoo olefa omulumenhu umwe oo taku hokololwa kutya naye omupolifi moRuacana.

Eedjo da Kundana oda hokolola kutya oda li da halukifwa neenghono eshi va uda eweelelo loshihauto ta shi kandoma, naashi va lotokela poshiponga ova haluka mokumona ovanhu vane, omo mwa kwatelwa omushingi nakaume kaye novakainhu vavali  tava di komesho yoshi endifo osho shi na ashike oshikoto shimwe, omanga omulumenhu ou womupolifi oye ashike a li koshikoto oye aeke. Oshiningwanimwa eshi osha ningwa lopo tundi 02h00 youfiku.

Nonande Colonel Peter Shikolalye oo eli Komanda wOmatanga o236 Motorised Infantry Battalion, omo mwa kwatelwa yoo okamba ya Ruacana a anya oku yandja ouyelele welixwapo moshiningwanima eshi, okwa kwashilipaleka kutya, oshiningwa nima oshoshili.

“Ashike fye metanga leameno ihatu lopota oiningwanima oyo ta i holoka po koikundaneki. Otwa yandja nale ouyelele washo sha ningwapo kwaava vena oku u uda. Opolifi nayo yoo ota i konaakona,” Shikolalye tati.

Komanda ou ta holola yoo kutya omushingi ou kali a pewa oufemba wokushinga oshihauto novatwaalelwa ovo vali moshihauto omo kavali mo shili paveta.

Moshiponga omwa lemanena omushingi, omukwaita mukwao, nomukainhu womupolifi. Omukainhu oo halongo mondingosho okwa dja moshiponga omo ehena nande oshiveta.

Eenghalo daavo va ehama ita di limbilike.

Ku Helvy Shaanika 

LEAVE A REPLY

Please enter your comment!
Please enter your name here