Uudhano womanyakwa gaCAF tawu ka dhanenwa moWindhoek nuumvo

0
213
Omuperesidende gwoNFA, John Muinjo okwa itaala kutya Namibia ota ka edhilila uudhano itaawu ka dhimbiwa womanyakwa gaakiintu go CAF mOctober nuumvo.Pethimbo lyuudhano mboka ospana yoBrave Gladiators ota yi ka tegelelwa yuulike uunyakwa wawo ongo yimwe yaandhoka hadhi dhana nawa okatanga menenevi Africa.

WINDHOEK – Amushangandjayi gwehangano lyetanga lyokoompadhi moAfrica nenge [CAF] Hicham El Amrani ote ke ya mbala ko Namibia ta ende pamwe nosheendo shopombanda. Osheendo she otashi ya shi konakone nokutala kutya omahala guupale moNamibia  oge li tuu nawa komeho guudhano womanyakwa wa CAF wetanga lyokoompadhi lyaakiintu, mboka tawu kala moWndhoek okuza omasiku 11-25 October nuumvo.

Manga Namibia ta longekidha oku edhilila aadhani mbaka nomaudhano ngaka, CAF okwa tseiyithile Namibia nokutya osheendo mewiliko lya Amrani noshowo Omunashipundi gwokangundu hoka taka unganeke uudhano mbuka, Molefi Olifant otaya ka talelapo Namibia .Otaya ende woo pamwe nokangundu kopaungomba okutalelapo Namibia pethimbo lyomafudho pokati kuudhano wOmanyakwa gaAfrica mboka tawu tameke mo South Africa ehuliloshwike ndika. Aatalelipo oya koleke kutya omasiku ngoka taku kala itaaku dhanwa uudhano ogo 23, 24, 27, 30 noshowo 31 gomwedhi nguka.

“Etalelopo ndika otali ka konakona noku konenena omahala ga yooloka mpoka tapa ka dhanenwa uudhano , nomakonakono otaga tala woo omayakulo galwe ngaashi uupale wetanga, omahala gokwiidheulila, oohotela, iipangelo. Osheendo otashi ka tsakanena woo naayehe mboka yena mo oshitopolwa melongekidho lyuudhano mbuka.Osha yela otatu ka kundathana woo iinima ngaashi omalweendo gomombepo, omakwatathano gopangodhi noshowo iilonga yokutuma mombepo omaudhano pethimbo lyokudhana.Osheendo osha kwatelamo Amushangandjayi gwaCAF niilyo yilwe,” osho Omuperesidende gwoNFA, John Muinjo a koleke.

Muinjo okwa ti oku kala otse tatu edhilile uudhano mbuka nenge otse oshilongo moka tawu ningilwa oshinima sha simana noshaanawa,oshoka otashi ka kwathela okuulikila oshilongo nkene hashi ningwa uuna moshilongo tamu ningilwa uudhano wopaigwana ngaashi mbuka.

”Ngaka omakonakono ga simana okuza ku CAF nuuyuni awuhe mboka hawu dhana etanga lyokoompadhi owa tala ku Namibia.Uudhano mbuka otawu ka gandja woo ompito ombwaanawa kaadhani aakiintu mboka taya ulike iitalenti yawo. Na ondi itaala nokandina omalimbililo kutya ospana yaakadhona yo Brave Gladiators otayi ka longitha ompito ndjika okuulika kutya yo oyimwe yoospana dhingi mo Africa,’ Muinjo ta ti.

Okwa indile omuNamibians kehe opo a soshimpwiyu kutya uudhano mbuka tawu dhanenwa moNamibia owa longekidhwa nawa kaakunawe notawu kala esindano enene pakuwu longekidha.

Omuwiliki gwa NFA okuna einekelo kutya omahala agehe noshowo iipumbiwa ayihe  moWindhoek otayi ka fuula ongundu ndjoka tayi ya okukonakona omahala ngaka, na CAF ota ka koleka einekelo lye kutya Namibia ote ke shipondola moku kala oye oshilongo moka tamu dhanenwa uudhano mbuka muOctober nuumvo.

KOmudhindi

LEAVE A REPLY

Please enter your comment!
Please enter your name here