Nalisa a ningi elenga lyotango lyomukiintu lyaMasubia

0
203

IKUMWE – Elunduluko lyopamuthigululwakalo olya ningwa omathimbo ga piti moshitopolwa shelelo lyopahedhi lyaaMasubia sho ndika lya hogolola omukiintu ongo elenga enene lyoshipundi shaIkumwe, shoka shi li ookilometa 55 kuuzilo wa Katima Mulilo. 

Elenga ekuluntu epe olyo Francesca Nalisa ngoka ngashingeyi ta kala koshipundi shelelo lyopamuthigululwakalo shoka pomahala ogendji shi li mewiliko lyaalumentu.

Okwa sindana moshipundi shika pethimbo lyomahogololo ga ningilwe muSeptember  omumvo gwayi, nongeyi okwa hulithapo oohedhi ndhoka dha za nale komapipi nomapipi kutya aakiintu ihaya ningwa omalenga.

Nalisa okwa ti ethigathano ndika kalya li epu kuye oshoka aakondjithi ye oya li ye mu talako kutya iilonga ye ongo omukiintu kayi shi yuuwiliki ndele oombyoka ashike yomegumbo ya nathangwa.

“Omahogololo oga ningilwe momasiku September 9, 2013. Pethimbo lyago opwa li aniwa omatilitho gazi kaalumentu yamwe mboka ya li yuuvite kutya uulenga inawu opala omukiintu. Onkene ngame onda li nda tokola, onda li woo nda tilithwa neso,ndele pehulilo onda sindana,” osho Nalisa a ti.

Miinakugwanithwa yaNalisa omwa kwatelwa oku wilika oshitopolwa sha Ikumwe unene tuu kombinga yoshinima shina sha nevi, ehumokomeho, noshowo okutumina iipongololwa mbyoka ya nyengana koombelewa oonene dhelelo lyaaMasubia koBukalo.

“Tse otuli kohi yewiliko lyongonga ya Bukalo mwaashihe shoka tatu longo. Otatu tala kiinima yinasha nevi, unene oontamanana kombinga yalyo. Onda indile oshigwana opo shiilonge okuholoka kiigongi,” osho Nalisa a ti.

Okwa ti okwa hala oku mona aagundjuka yiitulamo miinima yopamuthigululwakalo dhawo oshoka  shika ohashi ya kalitha konima kombinga yehumokomeho. “Otwa hala oku tala kombinga yaagundjuka, uuna twa ithana iigongi, aakuluntu oyo ayeke haya holoka. Aagundjuka oyendji oyiitaala kutya iigongi mbika oyaa kuluntu oyo ayeke.

“Onda hala oku longitha okomitee yomapendulopo yomomukunda opo ndi kumike aagundjuka. Pamukalo nguka otatu potokonona uupyakadhi wokwaana iilonga okupitila miigongi ya yoolokathana.

Nalisa keshi ondjendi miilonga yewiliko unene tuu sho a longa omimvo 16 ongo omulongisikola nongashingeyi okuli omunashipundi shelelonongelo lyosikola ya Ikumwe Combined School. Okwa kala miilongawiliko ya yooloka okuza nale. “Onda yi moshipundi shevululuko omumvo 2010 ongo omulongisikola. Onda li omunashipundi gwaaKatolika kaRoma omumvo 2005 sigo 2011 nongasingeyi ohandi wilike ongundu ya Mary metumo lya St Francis moshitopolwa shUubisofi shaRundu,” Nalisa apopi kombinga yiinakugwanithwa ye.

Nalisa okwa li a thiminikwa oku kiilonga kokollege kepangelo lyokatongo konima yokupita oform ontiyali nenge ograde nine pethimbo ndika opo a vule oku kwatha aamwayina aashona.

Sho a taamba oshinakugwanithwa shika inaashi monika nale moshitopolwa shika, Nalisa okwa thigulula omashongo ogendji ngaashi ndyoka lyokwaana ehala mpoka tapa gongalele Ongonga yOshipundi shaIkumwe. “Itatu vulu nokutsikila tatu gongalele kohi yomiti ngele tatu kundathana nokupotokonona iikumungu yoshigwana. Otandi indile aakwatheli aanamutimahenda opo yetu kwathele. Sigo oompaka katuna oonzo dhopashimaliwa. Onda tokola opo tu patulule okambo moka tamu tulwa iimaliwa. Otatu ka pula mboka taya yakulwa, opo woo ya kwathele,” osho omunamimvo 64 Nalisa ati.

Nalisa ngoka eli omulongimapya nomusitangombe momukunda gwawo okwa ti okwa hala oku kondjitha oluhepo moshitopolwa she. ”Onda hala oku kumika aagundjuka opo ya kuthe ombinga mehumokomeho. Onkene otwa pumbwa oku indjipaleka iigongi yokangundu kehumokomeho moshitopolwa . Otandi dhiladhila woo okutameka okinda, opoloyeka yokuhondja iizalomwa, opoloyeka yokumuna oondjuhwa, noshowo ndjoka yoshikunino,” elenga epe tali ti

Nalisa ngoka a valelwa poLuhonono nale, sha tseyika [Schuckmansburg] oye omumwayinakadhona omukuluntu gwoshilyonale shoparliamende, Patricia Siska.

Ku George Sanzila

LEAVE A REPLY

Please enter your comment!
Please enter your name here