Omukiintu ta lundilwa kutya okwa dhipaga okamwanagona okwa tila oku dhipagwa

0
307

ONGWEDIVA – Omukalimo gwomEndola gwomimvo omilongo 44 – okwa thigipo egumbo lye pomukunda ngoka konima sho a tuminwa omalaka tage mu tilitha neso. Omatilitho ngaka kutya ota dhipagwa oga landula eso nefumviko lyomunona omwanagona ngoka a sile momeya.

Rebecca Lungameni, ngoka omwanagona aadhikile asila momeya iiwike iyali ya piti, okwa ka kongele ekwatho noshowo egameno koombelewa dhopolisi mOshakati noshowo koombelewa dhegameno lyaakiintu naanona mOshakati. Shika okwe shi ningi konima aniwa sho aantu yomomukunda gwawo ye mu tilitha kutya ota ye mu dhipaga molwaashoka oye eeta eso lyomunona ngoka. Omunona ngoka gwomumvo gumwe okwa gwilile mondombe yili popepi negumbo lyaandjawo konima yiiwike iyali.

Okwa ti mbala ashike konima yefumviko lyomunona nguka ye aniwa okwa tameke okutuminwa omalaka ga shangwa mocellphona, tage mu lundile kutya oye a dhipaga omunona ngoka onkene oshigwana shomomukunda ngoka otashi ka longa naye na okuna okusa.

Aapolisi oya ti Etiyali oshiwike shayi Lungameni okwa holokele posasiona yopolisi ta lili ye eli monkalo yengwangwano.

Ndele Lungameni okwa lundile opolisi kutya kapena nando omunambelewa gwopolisi  ali emu pulakene kutya okuna uudhigu wa shike. Na sho inaa pulakenwa kaapolisi okwa tokola ashike  a shune kegumbo. Megumbo Lungameni okwa kutha iinima ye yimwe  nokwa shuna kooyina.Okwe shi ningi oku ka holama oshoka okwa tila, konima sho a tilithwa nokumbandamekwa neso kwaamboka ye mu tumine omatumwalaka kongodhi ye. Aatumi yomatumwalaka ina ya ulika kutya mbaka oyo oolye.

Kommishina gwopevi gwopolisi, mOshana , Rauha Amwele okwa ti ombelewa ye inayi taamba olopota ndjoka oshoka ngiika ka ya li ya shangwa kaapolisi.

Pahokololo lya Lungameni, esiku oshiponga shaningwa ,ye okwa li a thigipo egumbo lyawo, oku ka landa ostocka yomokasitola kaandjawo. Sho a zi megumbo okwa thigile omwanagona gwomumati oshinakugwanithwa shokutonatela omunona. Nguka okwa li eetwa pegumbo lyawo a fudhe puyo pethimbo lyefudho lyoKrismesa nomumvo omupe.

“Omwandjegonamati nguka okwa li natango mondunda ye yokulala sho nde mu ithana noku mu lombwela a tonatele omunona nguka. Onde mu pe oshinakugwanithwa shoka molwasjhoka ngame onda li tandi yi  ndik a lande iinima iipe yomositola yetu. Onda ka pitula omukiintu ngoka ha longo mokasitola tse no twa yi ihe .Konima sho twa landa iinima mbika otwa shuna kegumbo konyala potundi onti-13h00.

Onda igidha omumati okumupula kutya omunona oku li peni.Ndele nguka okwa ti omunona ine mu mona ongula ayihe, oshoka aniwa okwa li a dhiladhila kutya shono keewete omunona ngiika onda yile naye. Okwa ti woo ishewe ina uva ndje sho nda li nde mu ithana ongula opo a kotokele omunona. Shika osha etele ndje omalimbililo,onkene onda pula aashiinda ngele omunona ngoka ina ye mu mona.Ndele mbaka nayo oya ti ina ye mu mona.”Lungameni a ti.

Okwa ti aantu oya tameke olukongo ndoka lwa landula ompadhi sigo opondobe  yomeya yili popepi negumbo, moka yaadha omunona asila mo.

“Ngashingeyi kandi shiwo kutya  omolwashike ndina okupewa oombedhi unene tuu sho omunona shi wetike kutya okwa si omeya.Oshinima oshiwinayi shili ndele kandi uviteko kutya omolwashike ndina okutulwa ondjo meso lyomunona nguka.Ondi shishi kutya oosuwala yandje kaye hole ndje onkene otaya kambadhala okweetapo etopoko pokati ketu nomusamane gwandje,’ Lungameni a ti.

“Shoka sha etele ndje omaipulo ooshika kutya aapolisi ina ya yakula ndje nawa. Onda li ndishi tse otuna oku fala omaupyakadhi getu  kuyo unene tuu uuna tatu tilithwa neso, ndele kandali nda tegelela aapolisi mbaka ya yole ndje sho nde ya lopotele shika.” Lungameni a ti.

Ku Kakunawe Shinana

LEAVE A REPLY

Please enter your comment!
Please enter your name here