Omulumentu a lombwelwa a hule mo iikutu komuhona gwe, sho a tidhwa miilonga

0
436

WINDHOEK – Gumwe gwomaaniilonga aashona yehangano ndyono hali landitha omwiidhi gwiimuna moVenduka lyedhina Kaap Agri Namibia, David Otto, okwa ekelehi omapopyo ngono taga ti ye okwiihula iikutu ye mwene yiilonga mongundu yaaniilonga ooyakwawo, naashika okwali a thiminikwa opo eshininge kaahona ye.

Otto okwa lombwele omunambelelwa guuministili yomawuyelele nomakwatathano Abed Ashipala tati, ehangano ndika olyali lyemupe ompango opo akuthemo iikutu yiilonga meendelelo mbyoka ali a zala, konima sho a tidhwa miilonga mwekwatathano lyuufuthi.

Pomauyelele ngoka gali gagongelwa koshifo shika Kundana, okwa dhidhilikwa nokutya, Otto okwali a hala ofuto ye yahugunina konima sho a tidhwa miilonga, nokwa lombwelwa agaluke esiku lya landula. Omunambelewa omupehakuluntu gwehangano ndika lyo Kaap Agri Namibia Bradley Langenhoven okwati Otto okwali a yaka omwiidhi gwiimuna yomwaalu kaagushiwikwe, shoka shali shemutidhitha miilonga kaapuna okukwatakwata.

“Otto otwe mukumagidha opo a galuke esiku lya landula ano Olyomakaya, nekwatathano lyiimaliwa mbi yahupako ye a galule woo unifoloma ndjoka yiilonga. David kali ta vulu okutegelela nokwa kambadhala opo a hule mo iikutu mbyoka mokati kaantu komeho goombelelwa dhetu naaniilonga ooyakwawo,” Langenhoven tati.

Elopoto olya tsikile nokutya, konima sho Otto a hula mo iikutu ye yiilonga okwa ende koompadhi okuza ko Northern Industry uuka koshitaasi shopolisi yaKatutura, hoka a tsakanene naaPolisi mondjila ye yokuya koPolisi.

Ashipala okwa ti, aanambelewa mboka yoPolisi yali miilonga Etitano ndyoka oya etelele Otto poshitaasi okuza mondjila noye mupula shoka shaningwa po. Oyayi kiilonga yaOtto pamwe naOtto ko Northern Industry hoka kwandhindhilikwa Otto a pewa omwaalu gwiimaliwa ye komeho goPolisi eta shuna kegumbo.

Oonguwo dhiilonga odhili momake gooyene.

Ku Pinehas Nakaziko

LEAVE A REPLY

Please enter your comment!
Please enter your name here