Onda mitika Miss Namibia -eshenge dingi tali ti

0
861

ONGWEDIVA – Wendelinus Hamutenya oo a li a hoololwa onga eshenge dingi mo Namibia, hano Mr. Gay Namibia 2011, okwati okwa yandja eteelelo ku kamwe komoukadona dingi moshilongo, hano oo Miss Namibia vomido da djako. 

Hamutenya oo heli ufana mwene omukondjelimanguluko womashenge moNamibia nokwali yoo a kakalela po Namibia mefiyafano leshenge dingi mounyuni otati, okamonakadona oko ka teelelwa ka dalwe moule weemwedi nhatu di li komesho, otaka ka kala okaana kaye okativali shaashi okuna nale okaana kokamati.

Ta lombwele Kundana kutya edimo olo a yandja ola kala omhangela pokati komuvaleki waye oo omulumenhu mukwao na ina yokaana, hano omukainhu.

Hamutenya oo eya pouyelele kutya ye eshenge omanga ali ena omido16, nokwa lombwela Kundana kutya  ye kena oudjuu noku ulwa eshenge okwa ti ye ita ka holola nande edina lomukainhu ou a mitika ile kutya okwa li Miss Namibia wodula ilipipo.

“Fye nokakadona oko otwa kala efimbo lifike hanga podula, nokeshishi kutya ame ohandi i moihole novalumenhu novakainhu, ndele kake na oudjuu nasho shaashi oke hole nge neenghono. Ame onde ka lombwela yoo kutya fye nako itatu dulu okutwikila shaashi ondina omulumenhu ndimu hole twa valekafana nale nokuli,” Hamutenya ta twikile.

Onghundana yokumitika kwa Hamutenya omafiku aa oya eta eemhata koFacebook oko vamwe va panda osho sha ningwa keshenge eli, omanga ovo ina ve shi tambulako ove mu tukaela.

Omulumenhu ou pauye mwene okwa shanga kutya: “Inandi lipa ombedi eshi nda mitika okakadona, onda hala ashike okaana okativali, nokukala xe kokaana, ngaashi ovalumenhu vakwetu. Okukala eshenge itashi ti kutya nghifi omulumenhu nawa. Onghene ina mu pula nge vali kutya onde shi enda ngahelipi…”.

Vamwe vomova landuli va Hamutenya koFacebook ove mu pa ombedi eshi a mitika, tava ti kutya ounona ovo ta dala ota va ka hepekwa koovakwao keefikola shaashi va dalwa keshenge.

Vamwe tava holola yoo kutya oushenge oshinima shili kondje youKriste ye Hamutenya ohe li ula omuKriste.

“Ehandukilo olo to ka mona meulu ota li ka kala linene lidulife poilonga oyo tolongo kombada yedu,” umwe tati.

“Wendelinus omhepo yoye oya pukifwa. Onda fimaneka ehoololo loye okuninga eshenge, ashike oku dala okaana kamwe vali osha puka. Ino pumbwa nokuli ushi lombwele ovanhu, osha yeleka shikufife ohoni shaashi ngaho oto vake omulumenhu woye. Oku kala eshenge itashi ti eemhango domoihole nadi djepo. Nokuli pamwe ove kushi eshenge shili. Omolwashike ho dilaadila oku nangala novakainhu?”mukwao womova landuli va Hamutenya  koFacebook ta pula vali.

Hamutenya okwa yelifila Kundana kutya ye okuna omuvaleki, omulumenhu mukwao womuBotswana oo kwali va tokola opo va hombole ngeno muDesemba a djako ashike omolwa eendubo dovanhu ovo va kala noku lombwela omuvaleki waye oindoondoo ohango ove i kaleka manga.

Hamutenya tati omahokololo oo taa popiwa kutya voo nomulumenhu waye ove li efa kaefi oshili, ashike pokati kavo opa li peuya okuhatwakumwe  oko okwa kwa etifa opo ohango i undulilwe komesho.

Hamutenya, otati ye nomuvaleki waye ove na omhangela opo okaana oko ina ka dalwa natango vekeka kufeko ku ina vo veka tekule nge va hombola.

“Opo ngoo manga hatu popi nomumati wange kutya nge otwa hombola ohatu kala moNamibia ile oha tu i koBotswana ashike ame mwene onda hala oku ka kala koBotswana. Ounona vetu ita tu ke va tekula onga omashenge. Ame ondi shishi nale kutya ngaashi okaana kange koshiveli kokamati ka keshi eshenge,” Hamutenya tati.

Hamutenya oo ta hokolola kutya okwe li dimbulula kutya ye eshenge omanga ali ena eedula 16 okwa indila ovadali neefikola opo dilonge ounona kutya omukifi wo HIV/Aids iha u kwata ashike omulumenhu nge a nangala noumkainhu, ashike oha u dulu yoo oku ku tambulwafanwa nge omulumenhu aya moixulo nomulumenhu mukwao.

Eshi hasho oshikando shotete Hamutenya ta eta oityatyaana okudilila moikundaneki. Odula ya djako okwali pe uya eendaka kutya okwa yandja omusholondodo womadina koshikundaneki, omo muna ovanamadina novanenenhu moshilongo ovo vati a ya navo moixulo.

Oshikundaneki oshali yoo sha holola kutya Hamutenya okwati oha  futwa opo a kongele ovalumenhu ovanamadina omashenge.

Konima Hamutenya okwa lombwela oikundaneki kutya onghalamwenyo yaye oi li moshiponga, sha etifwa kehokololo olo lali moikundaneki, nota kendabala opo a fiye po oshilongo.

Ku Helvy Shaanika 

LEAVE A REPLY

Please enter your comment!
Please enter your name here