Ookalyamupombo otava longifa oradio mokunyeka

0
360
Yamwe yomaakuluntu taya monika mefano ndika nkene taya landele aanona yawo omizalo dhosikola

ONGWEDIVA – Eembudi novakengeleledi omafiku aa oda konga po omukalo mupe wokunyeka noku kengelela oshiwana, oku pitila mo radio.

Ovo va ninga ihakanwa no va taalelwa koulingilingi ou, ovo ovayandji voilonga, ovakongi voilonga, ovakongi vomaumbo naavo va kanifa va hala oku toolifwa ko, nohava shivifa omatumwalaka avo ngee mo NBC ile kOmulunga Radio, nosho tuu kudimwe domeeradio moshilongo.

Umwe womwaavo va ninga oihakanwa ota hokolola nghene ali a kengelelwa a landele Kalyongo umwe okarecharge omafiku aa, konima a kanifa ombwa yaye, ye te i ingida nee momhepo opo ngeno a toolifwe ko koshiwana.

“Eshi etumwalaka la leshwa, onda tuminwa oSMS komunhu ta ti okwa toola ombwa yange ndee ove i patela mekove lavo. Okwa lombwela nge kutya ye okwa dja mo nee meumbo, onghene nandi mu tumine okarecharge opo a dulu oku dengela ounona keumbo eva lombwele va pukulule nge.

“Eshi nde mu tumina okarecharge okwa kala ta tumine nge eeSMS doipolopolo, nonda dimbulula kutya onda kengelelwa. Efiku olo onda yakulile eeSMS dihapu dadja keengodi da yooloka, keshe imwe ta iti oya toola okambwa, ashike ombwa yange ile yo oya kula, omunhu ita dulu oku i ufana okambwa,” omukainhu umwe ta hokolola.

Omulumenhu umwe ota hokolola nghee a li a tumina Kalyamupombo umwe oshimaliwa nomukalo e-wallet. Omulumenhu ou womOngwediva ota ti okwali a tuma etumwalaka kOmulunga Radio ta kongo omunailonga wokulifa. Okwa ka dengelwa nee komulumenhu tati oku li kOkalongo, a hala oilonga ashike kena oshimaliwa sholefa.

Omulumenhu oo te li ufana omukongi woilonga eshia yakula oshimaliwa okwa dengela nakushituma , emupandule ndee ta dimi ongodi yaye, no i nei tema vali okudja tuu efiku olo.

Umwe ta hokolola kutya okwa li a ingida moraadio onomola yotuwa yaye ya wako, ndele okwa kala ashike ha dengelwa kovanhu tavati ove i toola, nova hala vemushakeneke opo ngeno ve i mupe, ashike nge teva pula vashakene ngeno popolifi, ohava henuka, osho ta shi ulike kutya ovanhu ovo ovanyika oulingilingi.

Omukulunhu wEeprogalama dOkuya mOmemhepo kOmulunga Radio Wilhelmina Mumbala oo naye hanga a ninga oshihakanwa shovakengeleledi ava ota hokolola kutya okwali ta kongo onhele yokukala hano oflat moraadio, ndele ta dengelwa komunhu tati oku na onhele.

“Okwa ti yemwene kemo moWindhoek ashike okwa pukulula nge ko keumbo oko kuna ouflat. Eshi nda yako, onda yakulwa ko omusamane nomukulukadi, nouflat opo vali shili ponhele opo. Ova patululila nge  mukamwe komuflata ovo ndika tale, handi va lombwele kutya onde ka panda.

“Ova tameka nee tava ti nadi futeko oN$1000 nande ono e-wallet. Ame handiti nava penge ashike onomola yavo yomavalulo ombaanga oko ndi tule oshimaliwa ashike ova anya filu filu. Konima onda ka itavela kutya ohandi va tumine oshimaliwa noe-wallet ashike inandi shi ninga shili. Onda ka kumwa nee eshi nda ka yako konhele tuu oko efiku la landula ko, ndaka hanga ko omunhu tati oye mwene weumbo, novanhu ovo nda hangele ko efiku la djako kevashi,” Mumbala tati.

Mumbala ta hokolola kutya mwene weumbo uflat kava li va pwa nawa oku tungwa, iha efa natango muye ovanhu. Osho sha hala kutya omulumenhu nomukainhu ovo kwali tava pula odeposit yoN$1000 ovali oikengelela yongaho.

Omolwa omukalo ou womunyeka wa kongwa po keembudi, oNBC nOmulunga Radio pauhandimwe otadi  kendabala opo di uye po nomikalo dipe doku keelela oulingilingi woludi eli ngaashi tashi dulika.

Mumbala tati kOmulunga Radio okuna opologalama yedina Job Shop, omo ovanhu hava kongo oilonga momhepo, ashike molwa oukengeleledi, ehangano ola kwatwa kedilaadilo okukufapo opologalama ei.

“Ita ndi ti opologalama ota i dipo ashike otwa kwatwa kedilaadilo olo shaashi otwa shakeneka oiningwanima ihapu unene omo ovanhu have uya kufye tava nyeyeta oikengelela yoludi eli,” Mumbala tati.

Omunailonga umwe koNBC naye yoo okwa hokolola kutya omunyeka noikengelela yoludi eli ota i limbilike notava lopotele ovakulunhu voraadio opo pa tulwe eenghatu da kwata moiti opo ku kalekwepo eameno lova longifi novapwilikini voradio.

Omukulunhu wo NBC Albertus Aochamub okwati oshinima eshi ina shi fikako natango kombelewa yaye.

“Ashike oshimima sheembudi tadi longifa oraadio yetu oku kotokela oshi udifa nai neenghono. Paife eshi tushishi, ohatu ka kendabala oku amena eekastoma detu ngaashi tashi dulika, nohatu ka longifa opolifi apa tashi pumbiwa,” Aochamub tati.

Omukulunhu woNBC okwa udaneka kutya ehangano laye ota li ka kendabala oku uya po nomukalo umwe oo ovakwashiwana ita va popi vali eengodi davo momhepo.

Mumbala na Aochamub avashe ova kumaida ova kwashiwana opo va kotoke, vaha yandje ashike oimaliwa kovanhu vehevashi shaashi va pumbwa oilonga ile omakwafo makwao onhumba.

Ku Helvy Shaanika 

LEAVE A REPLY

Please enter your comment!
Please enter your name here