Ronaldo, Angerer, Heynckes na Neid ya sindana poFIFA Ballon d’Or

0
203

Cristiano Ronaldo okwa hogololwa oye omudhanidhingi muudhano wetanga lyokoompadhi omumvo 2013.Esindano ndika lye olyo etiyali okuwena epapa ndika sha landula sho ndika eli sindanene ishewe omumvo 2008. Epapa ndika ohali ithanwa FIFA Ballon d’Or. Aasindani yalwe yomapapa poshiithanene shoka sha ningilwe kuyele oshiwike shika oyo omukwati gwomokoola gwospana yaakiintu ya Ndowishi Nadine Angerer ngoka opo a mono esindano ndika lwotango.

Omudheuli nale gwospana ya Bayern Munich Jupp Heynckes opamwe nomudheuli gwospana yopashigwana ya Ndowishi yaakiintu, Silvia Neid oyo ya pewa omapapa ga FIFA gaadheuli dhingi metanga lyokoompadhi lyaalumentu naakiintu omumvo 2013.

Oonakusindana mbaka oya hogololwa kaadheuli yoospana dhopashigwana, kookapteina yoospana noshowo kaakalelipo yiikundaneki yopaigwana mboka ya hogololwa ku FIFA noshowo koshifo sha France hashi shanga kombinga yetanga lyookompadhi shedhina France Football.Aasindani oya li ya tseyithwa poshituthi shegandjo lyomapapa ngaka shoFIFA Ballon d’Or shaningilwa mosaala yedhina Kongresshaus moZurich sha Switzerland Omaandaha oshiwike shika.Omahogololo agehe oga li mewiliko nokutalelwa komeho kehangano lyaayaluli yomambo lya PricewaterhouseCoopers Switzerland[PwC].

Omunedhina mo TV aza ko Brazil, Fernanda Lima opamwe nomudhanitanga omunedhina gwa Netherlands, Ruud Gullit oyo ya li aawiliki yoshituthi shika sha li sha kalwa kaayenda konyala yevule peyovi 1 100 noshowo sha li sha ulikwa motiivii miilongo yi vule pethele 180 muuyuni auhe.

Mokati kaayenda omwali aadhani ya Brazil oshilongo shoka sha sindana ekopi ndika lyuudhano wetanga lyokoompadhi lyuuyuni iikando itano. Mbaka oyo Pele ngoka asindana ekopi lyuudhano mbuka lyuuyuni iikando itatu momimvo(1958, 1962 nomo 1970), Amarildo (1962), Carlos Alberto (1970), Bebeto (1994), Cafu (1994 nomomumvo 2002) oshowo Ronaldo (1994 nomo2002). Opwa li woo omudhani omunedhina omugundjuka Neymar, ngoka a tegelelwa aka kwathele oshilongo she shisindane ekopi ndika oshikando oshitihamano sho uudhano walyo tawu ka dhanenwa megumbo moBrazil nuumvo.

Omodela yopombanda yaBrazil, Adriana Lima noshowo Omwiimbi omu Swiss-Brazil ha imbi oongalo dho rhythm naandhoka dhoSoul,  Marc Sway oya ulike shoka tashi ka kala sha tegelelwa oku ka ningwa moBrazil konima yomasiku 149 gahupako ngashingeyi.

FIFPro, ehangano lyaadhani muuyuni olya li lyahiya aadhani omayovi 52,000 opo ya hogolole ospana yawo yaadhani yo FIFA FIFPro World XI. Aadhani mboka ya hogololwa mospana ndjika oyo: Manuel Neuer (Germany) mokoola; Dani Alves (Brazil), Philipp Lahm (Germany), Sergio Ramos (Spain) na Thiago Silva (Brazil) konima; Andrés Iniesta (Spain), Franck Ribéry (France) na Xavi (Spain) mokati kokapale ; na Cristiano Ronaldo (Portugal), Zlatan Ibrahimović (Sweden) na Lionel Messi (Argentina) komeho.

Epapa lyo FIFA Puskás lyokoola ombwanawa  yokomumvo lyeetelwepo omumvo 2009 okudhimbulukwa Ferenc Puskas olya pewa omudhani gwokomeho gwa Sweden, Zlatan Ibrahamovic ngoka a li a tulamo okoola sho a thanga okatonyo muudhano wawo naEngland momasiku 13 November 2012. Ibrahimović okwa mono omawi gooperesenda 48.7 komeho gNemanja Matić ngoka a mono ooperesendqa (30.8 %) na Neymar ngoka a mono ooperesenda(20.5%).

Omuperesidende nale gwo IOC, Jacques Rogge okwa pewa epapa lyomuperesidende gwoFIFA, lya gandjwa komuperesidende Joseph S Blatter omolwa iilonga ye yaana ezimbuko okugamena uudhano wopaigwana mewiliko lye ewanawa lyuudhano wOlympic.Omudhani enyakwa gwa Brazil muudhano wetanga lyokoompadhi, Pele okwa pewa woo epapa lyesimaneko lyo FIFA Ballon d’Or Prix d’Honneur molwashoka aadha monkalamwenyo.

Ku Otniel Hembapu

LEAVE A REPLY

Please enter your comment!
Please enter your name here