Frieda ota ka tseyitha oalubuma ye mOtjiwarongo

0
207
Okapeko kokombanda koalubuma ya Freeda “Just Freeda”

WINDHOEK – Omuhikingalo omuNamibia Frieda Haindaka, a tseyika nawa nedhina lye moongalo Freeda, ota ka tseyitha noku ulika oalubuma ye, yedhina “Just Freeda” ano ndjono tayi ti oye ashike Freeda, kOtjiwarongo moViritios Bar, pehulilo lyomwedhi nguka.

Freeda okakadhona hoka okawaanawa ka tseyikile nawa unene tuu pethimbo mpoka kali haka imbi nongundu ndjoka yali ya tseyika nedhina Gal-level, manga inaa tameka okwiimbwa oye awike.
Oomvula dhapiti, Freeda na Daphne ya tseyika onga aayimbi pamwe, Gal-Level), oya kala ethimbo ele taya imbi konyala oomvula dhaadha pomulongo, noya kala noku likola omapapa ogendji, ngele tashiya poshipewa shawo moongalo. Momumvo o2011, oyali ya topoka molwa omatompelo gontumba kaage shiwike.

Konima yethimbo efupi ashike Freeda okwa tameke okushanga nokuninga oalubuma ye oye awike, nokwa adha natango onkatu yopombanda noalubuma ye ndjoka Just Freeda, yali ya piti muDesemba omwedhi gwazi ko.
Oalubuma ndjika yosolo oya humbata ehwata lyuungalo omulongo nahetatu (18), noya kwatelamo oongalo dhayooloka ngaashi dhoHouse, Kwaito noRnB. Freeda okwati, oalubuma ndjika ye yotango oye mupula oomwedhi Ntano okutota po nokwe yi ningi nelalakano opo a totepo epandja epe, oku tamukulula ko, noku ulika kutya ye ota pula natango komeho.

Okwadhenge omuthindo nokutya elalakano lyokuluka oalubuma ye “Just Freeda”, opo atseyithe aayambidhidhi ye kutya, okwa patulula epandja epe, nota kala aluhe oye Freeda ngele tashiya moongalo.
Moalubuma ye ota kwathelwa nee kuGazza, Exit, D-Naff nomuhikingalo omuZambia Shayman Shaizo. Uungalo mboka tawu nywitha omakutsi gaapulakeni mopoloyeka ndjika ongaashi nee “This Whole Love Thing”, hoka ka kala nokudhana onkandangala mewangandjo, “Boom Boom” ta kwathelwa ku Dice, na “Vudu” ta kwathelwa koMaszanga. Okatekete keuliko ndika okena N$ 30-00 nota kaka gwedhelwa sigo opo N$ 50-00 konima yotundi ontimulongo nambali yuusiku.

 

Ku Pinehas Nakaziko

LEAVE A REPLY

Please enter your comment!
Please enter your name here