Helvi Wheeler ota ka ulika embo kombinga yOmukokoliperesidende , Dr Sam Nujoma

0
454
Omushangi gwembo lyuunona

EENHANA – Omushangi gwomambo ganuninwa okuleshwa kaanona,Helvi Wheeler ota ka ulika embo limwe lyaanona. Embo ndika otali hokolola ondjokonona yOmukokoliperesidende Sam Nujoma . Embo ndika olili kohi yoshipalanyolo, Sam Nujoma, Omukokoli Peresidende gwa Namibia.

Embo lyomapandja 64 otali hokololele aanona ondjokonona yomukokoliperesidende Sam Nujoma, unene tuu ya tala komapipi tageya. Membo ndika omushangi okwa shanga kombinga yonakuziwa yOmukokoliperesidende na He yoshigwana sha Namibia okuza kuunona we sigo okemanguluko lya Namibia.
Sho a popi mongodhi na Kundana omasiku gaziko, Helvi Wheeler ngoka eli omushangimambo a pyokoka okwa ti embo ndika olimwe mokati kaangoka a thaneka okushanga kombinga yomapenda gAfrica okuleshwa kaaleshi aagundjuka ya Namibia.

“Euliko lyembo ndika olya thanekwa li ka ningwe petameko lya March na otali ka ningilwa moWindhoek nomOshakati. Otandi vulu okupopya neinekelo kutya embo ndika olya pwa okushangwa ooperesenda 90, na ota li kala momalandithilo mbala konima yokuulikwa kwalyo kuyele mu March,” osho a ti. Embo otali hokolola ekondjelomanguluko lyaNamibia okuza mepangelo lyokatongo lya South Africa okuya komimvo dhemanguluko nedhiminathanepo lyopashigwana ndyoka lya ka landulako. Omushangi okwa hokolola Omukokoliperesidende Sam Nujoma sho a longo neitulemo omolwa emanguluko lya Namibia, na okuna einekelo kutya ndika otali ka hwameka nokulonga aagundjuka aaNamibia nena nokonakuyiwa oku landula oshiholelwa shOmukokoliperesidende okulongela oshilongo shawo.

“Otandi kumike aagundjuka oku tseya nokuiilonga kombinga yethimbo ndika mondjokonona ya Namibia. Aakwashigwana naya tegelele woo okulanda embo ndika moositola dhomambo oshilongo ashihe omanga esiku lyemanguluko inaali adha omasiku 21 ga March nuumvo ,” osho a ti.

Helvi Wheeler ngoka ehole okushanga okuza kuunona we okwa li a kumikwa kaakuluntu ye opo ekiilongele uunamiti nenge uundohotola.
Omumvo gwayi oye awike omushangi omuNamibia a li hogololwa oku ka kala pomauliko omanene gOmambo haga ithanwa Frankfurt Book Fair 2013 moNdowishi. Omauliko gomambo ngaka oga ningilwe okuza omasiku 9-13 October 2013. Oga li ga kalwa kaa uliki yomambo yaza miigwana ayihe yomuuyuni yeli omayovi gaheyali.
Kakele kembo ndika Wheeler okwa shanga woo omambo ogendji gomahokololo gokuleshwa kaanona kohi yopolograma yedhina Yambeka Children Media.
Okuna elalakano oku landitha nokutseyitha embo ndika miilongo oyindji muuyuni unene tuu miilongo yoko Europa hoka omambo ge gaanona kohi ya Yambeka Children Media haga landithwa. Iishangomwa ye yimwe ohayi leshwa miilongo yi vule omulongo moEuropa.

Omambo galwe ngoka Helvi Wheeler a shanga ongaashi “Kishikishi and the bad monster”, “Nehoya and the crocodile”, “The Jackal and the Hyena”, “Iinamwenyo/Animals”, “Princess Makena” omanga omakwawo ogo “Wantama/Animals” naangaka oga nyolwa wo nomelaka lyoshi Swahili.

Oohapu dhopetameko lyembo ndika odha shangwa kOminista Yiimaliwa ya Namibia , Saara Kuugongelwa-Amadhila.

 

Ku Clemence Tashaya

LEAVE A REPLY

Please enter your comment!
Please enter your name here