Omukainhu a dipaa omulumenhu

0
324
Paulus Shipaxu mumwaina wa nakufya Godliep Shipaxu na Teopolina Mateus oo naye yoo a lwile na Nevonga

OSHIGAMBO – Moshiningwanima osho shapumba, omukainhu weedula 24, okwa denga noku dipaa omulumenhu weedula 44. 

Otaku hokololwa kutya Anna Dute Nevonga wokomukunda Okankuzi moshitukulwa shaShikoto omafiku aa okwa denga shinyanyalifa Godlieb Kabila Shipaxu nepokolo, osho sha eta Shipaxu a xulife konima yefiku.
Vamwe vopoukamba veli popepi nOshigambo, opo pa ningilwa oshinigwanima, ova holola kutya Nevonga omunamapove, oo e hole shaluwa nomatukano.
Ovanamukunda ova lombwela Kundana kutya omolwa ohole yoikolokosha, Nevonga opo ashike a hangika a tameka oku shinga peekamba opo okudja mu Desemba, shaashi ye pamwe novakainhu vakwao vahetatu va tewa tewa noku indikwa va halyate vali nande omhadi polukanda lopOshigambo, opo ye a li a otekwa kuxe yokaana kaye. Omukainhu ou omunyasha lela okwa tewa ko yoo keumbo lavo kOkankuzi osho sha eta opo a ka kalele omulumenhu waye molukanda.

Mefimbo ashike olo lixupi a tameka oku shingila poukamba vopOniipa, omukainhu ou vati okwa tukaela po nale ovanhu vahapu pOniipa opo, nokwa lwa po nale nomukainhu mukwao wedina Teopolina Mateus.
Paulus Shipaxu mumwaina wa nakufya Godlieb Shipaxu ota hokolola kutya efiku loikolokosha oyo ya twala fiyo omefyo lamumwaina, Nevonga oo a li nokaana kaye shiimba kodula imwe okwe va hanga tava nu otombo pokandingosho ka Mateus.
“Okaana kaye oko kefike pu kange, oka tameka taka lumata okaana kange, ame handi mu lombwele nee kutya na kotokele okaana kaye. Okwa tameka nee oku tukana,” Mateu ta hokolola.
Paulu Shipaxu vati okwa ya meendaka nelalakano loku mweneka eenhangu, ashike naye okwe li twako keendaka.
“Onde va lombwela haiti nadi xule nee, nava mwene, dihapu kediwa. Kakadona oo okwa piluka ashike ndee ta tuku nge oitya ya kula, ta tumbula meme ndee na meekulu. Okudja opo ame onda mwena,” Paulus Shipaxu ta hokolola.

Nevonga vati okwa kadja po pokandingosho ka Paulus na Godlieb Shipaxu navo ova kadja po yo, ndee tava i kombinga ikwao yolukanda.
“Otwa ka uda ashike hatu lombwelwa kutya Kabila (Godliep Shipaxu) okwa dengwa, okwa twalwa nale koshipangelo. Katu shi eshi sha ningwa po katu shi nge ova katwikila nokutanguna molwa omatukano oo a dilila apa, katushishi,” mumwaina wanakufya ta hokolola.
Umwe womookatalekonawa ovo va mona nghee Godlieb Shipaxu ta dengwa ota hokolola kutya ina va mona lela kutya oshike sha eta oikolokosha, ashike ova mona ovo vavali nghee tava tanguna, noku taatawa pokandingosho kamwe.

“Nakufya pokandingosho ta dipo afa a ya kokule, ye ta ka alukako konima yokafimbo. Kafuko eshi a mona Kabila ta di kwinya okwe ke mu shakeneka ena epokolo momake, ndee temu denge oikando ihapu kofingo, kombinga imwe. Kabila ine mu kuma nande, ame onde va tala ndili apa,” umwe womovatali ta hokolola.
Epokolo olo a longifa vati ola nyanyauka.
Eshi a twalwa koshipangelo Godlieb Shipaxu, okwa kwatelwa meembete, omo a lekelwa efiku la landulako. Mefiku omo tuu omo a lekelwa, okwa ya kopolifi a ka konga ombapila yopolifi oyo a li a tumwa ei twale kundohotola.
Paulus Shipaxu otati mumwaina eshi a ya keumbo, okwa lombwela ofamili yaye kutya oku na oku ya koshipangelo efiku tali landulako opo a ka mangululwe, ye a ka lopote oshibofa she dengo nenyenyepeko lolutu kopolifi.

“Efiku la landula ko eshi nda penduka handi mu popifa, ita itavele, ndali ku mu ifana ita nyamukula, mboli okwa xulifa,” Paulus Shipaxu ta hokolola.
Nevonga okwa holoka nale momhangulilo ya Mangestalata mOndangwa omo a li a anyenwa eli futile mo.

Ku Helvy Shaanika

LEAVE A REPLY

Please enter your comment!
Please enter your name here