Tseya eyalulo lyoye lyombaanga nawa omumvo 2014

0
278
Omupopiliko gwombaanga yoFNB’, Vicky Muranda.

WINDHOEK – Ninga omukalondjigilile oku tala nawa uukwatya weyalulo lyoye lyombaanga nenge tutye uukwatya wokambo koye kombaanga ndjoka holongitha okupungula iimaliwa yoye. Ngele owe shi ningi otashi vulika to ka kumwa kutya uuna wa longitha eyalulo lyoye lyombaanga nawa opena ompito opo wu mone omauwanawa okuza meyalulo ndika. Pahapu dhOmbaanga Yotango yOpashigwana FNB owa pumbwa oku uvako kutya oludhi lweyalulo lyombaanga luni wu na,naanduka otalu ku pe shike nenge otalu ku longele shike.

Opena omaludhi ogendji guumbo wombaanga, nongele kuna ontseyo kutya okambo koye kombaanga okoludhi luni , nena oshasimana opo tango wu tseye kutya koye hoka holongitha okoludhi luni.

“Uuna aantu oyendji taya dhiladhila kombinga yeyalulo nenge yokambo kawo kombaanga, ohaya tala ashike kutya haka oko ondjila yokutula nokukutha iimaliwa mombaanga.Ndele nuumvo ndhindhilika kutya eyalulo lyoye lyombaanga nenge okambo koye kombaanga otashi vulika ka kale oshipatululo oku ku pungulila oshimaliwa omwedhi kehe nenge okuku hupithila oshimaliwa kehe mwedhi.Shika otashi vulika ngele owa hogolola nenge owa kutha okambo kombaanga keli mondjila nenge hoka taka gwanithapo oompumbwe dhoye dhopambaanga. Uuna wa hogolola hoka , oshaanawa ishewe wu ninge omakonakono kutya uuwanawa wuni to mono mokambo hoka, oshoka otashi vulika wu ka kumwe kutya oto ka hupitha oshimaliwa,” Vicky Muranda, Omuwiliki nenge omupopiliko gwa FNB a fatulula.

Longitha omayakulo gopamashina nopakompiuta

Muranda ota pe aayakulwa yoombaanga omayele opo ya tale kutya uumbo wawo otawu longitha omayakulo gopamashina ga tya ngiini. Oshoka”Uuna wa longitha omayakulo gopambaanga ngaashi ngoka gokuMbaanga nocellphona nenge okupitila moInternet, oto hupitha oshindji.
Omukalo gumwe woo ngoka tagu ku hupithitha oshimaliwa oongoka gwokumbaanga nenge okudeposita iimaliwa yoye peshina lyo ATM pondje. Oshinima sha simana okulongitha oondando nenge opreisa ndjoka ho futu uuna wa longitha uutechnologi okuyeleka uuna wa nana oshimaliwa okuza meni lyombaanga to yakulwa komuyaluli gwoshimaliwa.Oshina ombiliha okulongitha iikwamashina, ngaashi e-wallet nenge shoka hashi ithanwa ‘Ka-Ching’ ,”Muranda a ti.

Okwa gwedhapo a ti ngele oho futu omuntu konyala omwedhi kehe nenge oho tala eyalulo lyoye omwedhi kehe nena oshaanawa wu ninge shika, to longitha iikwamashina, oshoka mbika oto yi longitha pwaana nando ofuto yasha. Oshoka ngele oto longitha omayakulo goshito gopambaanga oku ya metungo, okupopya nomugandjimayele nosho tuu shika otashi ku kutha iimaliwa oyindji.

Ndele ngele owa longitha oCellphone banking, nenge Internet banking, oto kwathele ombaanga opo yi hupithe oshimaliwa nopamukalo nguka ombaanga otayi topola nangweye shoka ya hupitha molwaashoka inoo longitha omayakulo ngoka goshitonale.

Ishewe ngele aayakulwa oya hogolola okulongitha omayakulo gopambaanga goludhi lwopakompiuta, FNB okwa gandja ompito yiifuta yomayakulo tayi futwa ashike komwedhi ndele haambyoka ho futu uuna wa longitha eyakulo. Shika otashi pitika omuyakulwa opo a budgete nawa iimaliwa mbyoka ta futu ombaanga uuna a longitha omayakulo gayo.

Okuswaipa nenge okulongitha iimaliwa koomuma nenge okeshe ?

Nonando oshafa sha kotoka okunana oshimaliwa koomuma okuza mokambo koye oku ka futa iilandomwa yoye, nguka kagu shi omukalo omwaanawa okulongitha okambo koye kombaanga. Okuhumbata iimaliwa koomuma oshiwinayi ngele tashiya kegameno, oshikwawo oto ka futithwa iimaliwa oyindji molupe lwaashoka hashi ithanwa iifuta yomayakulo gombaanga oshoka oho nana oshimaliwa olwindji.Yo iifuta mbika oya londa pombanda ngele owa longitha omashina goATM gaashi gombaanga yoye.

Pethimbo ndika oositola odhindji odhina omashina gokufutila iinima ngoka taga nana oshimaliwa okuza kokambo koye sho to futu iinima mbyoka wa landa mositola. Omukalo nguka ino pumbwa oku humbata oshimaliwa koomuma ndele okakalata ashike koye hoka to ‘Swaipa’ eto futu.

Ngele owa pumbwa okunana oshimaliwa koomuma, nena nana omwaalu omushona okufuta otaxi nenge okulanda oshinima oshishona pomulandithi gwomepandaanda. Ndele okulanda kulwe kwiinima iinene oshaanawa wu lande nokakalata to swaipa ashike.
Ongalashe dhimwe dhokunwetha omahooli nadho odha gandja ompito kaayakulwa yadho opo ya fute omahooli mokuswaipa , kokutya ino pumbwa oku nana iimaliwa koomuma opo aniwa wu ka nwethe omahooli.

Kutha ethimbo eto dhengele ombaanga yoye ongodhi, nenge tala moInternet nenge inda moshitayi mbaanga shoye oku mona kutya oho futu shithike peni uuna wa longitha okambo koye kombaanga.

 

 

Komutoolinkundana

LEAVE A REPLY

Please enter your comment!
Please enter your name here