Uuvanekele aayambidhidhi iilonga iiwanawa mokudhenga oongonyo

0
251
Enyakwa lyondjundo yoWBO International Lightweight, Paulus ‘Hitman’ Moses (kolumoho) ota ka gamena epaya lye ndika lyo WBO International Lightweight moku kondja na Rafael Coria gwaArgentina pendiki lyoongeshefa lya Dinero Shopping Complex mOutapi mesiku lyo1 lya Maalitsa nuumvo.

WINDHOEK – Enyakwa lya Namibia lyolutu lwokudhenga oongonyo lwoWorld Boxing Organization (WBO) mondjundo yo International Lightweight,Paulus ‘Hitman’ Moses okwa uvanekele aayambidhidhi ye kutya nuumvo ote ke ya etela omapapa monkambadhala ye yokuninga enyakwa lyuuyuni mokudhenga oongonyo.

Hitman okwa ningi euvaneko ndika moWindhoek oshiwike shika poshigongi shoonkundana a ti ye okwa li enyakwa lyuuyuni mokudhenga oongonyo onkene okushi shoka shina okuningwa opo omuntu a ninge enyakwa muudhano mbuka. Onkene elalakano lye nuumvo okulonga nuudhiginini opo a hedhe popepi nompito yoku ka kondjela epaya lyuunyakwa mondjundo ye yo lightweight.
Enyakwa lyuuyuni nale mokudhenga oongonyo otali ka tsakanena na Cristian Rafael Coria gwa Argentina sho ta ka gamena oshishani she shoWBO International Lightweight molugodhi talu ka ningilwa pendiki lyoongeshefa lya Dinero moshilandopangelo shoshitopolwa Omusati , Outapi mesiku lyo 1 lya Maalitsa nuumvo.

“Nuumvo otagu kala omumvo gwomapaya taga sindanwa kaadhengingonyo aaNamibia, hangame awike, na otandi uvanekele aayambidhidhi yandje mOutapi kutya oya tegelela olugodhi talu ka kala lwa pupyala. Ngame ondi idheula nawa neitulemo no ndiilongekidha oku ka kondja nawa oshoka shoka nda hala okwaadha osho oku kondjela oshishani shuuyuni,’ Hitman ati a indile ayehe mboka ye hole obokisa opo ya ye kendiki lyoongeshefa hoka petameko lya Maalitsa oku ka tala nkene oongonyo tadhi dhengwa.

Pethimbo lyolugodhi ndoka uusiku mboka Julius ‘Blue Machine’ Indongo, ota ka gamena epaya lye lyondjundo yo WBO Africa Junior Welterweight mokukondja na Joel Mwelwa gwa Zambia molugodhi lwomadhiingoloko 12. Olugodhi nduka nalwo olwa tegelelwa lu ka kale itaalu nuwa meya. Omanga Martin Haikali naye ota ka ya moringa pethimbo olyo tuu ndyoka ndele omukondjithi gwe ina tseyika natango.Omalugodhi ngaka oge li kohi yoshipalanyolo the Champs in Outapi Boxing Bonanza.
Redemption of the Rock’ Boxing Bonanza momasiku 20 ga Maalitsa moWindhoek

Okuza kOutapi petameko lya Maalitsa okluba yaadhengingonyo ya Nestor Sunshine Boxing Academy otayi ka kala nuudhano woongonyo momasiku omilongo 20 ga Maalitsa posaala ya Ramatex moKhomasdal ongo oshitopolwa shokudhimbulukwa emanguluko lya Namibia omimvo omilongo 24. Omalugodhi ngaka otaga ka kondjwa kohi yuudhano tawu ithanwa ‘Redemption of the Rock’ Boxing Bonanza.
Olugodhi olunene luusiku mboka olwa Paulus ‘the Rock Ambunda enyakwa nale mondjundo yo Bantamweight ngoka ta ka kondja na Nestor Hugo Paniagua gwa Argentina molugodhi lwondjundo yoWBO Bantamweight opo a vule okutulwa momusholondondo guuyuni, kutya okuli peni ongo gumwe gwaamboka taya vulu okupewa ompito ya kondje nenyakwa ndyoka li na epaya lyondjundo ndjoka ngashingeyi. Olugodhi ota lu ka kondjwa uule womadhingoloko geli 12.

Molugodhi olukwawo olunene Bethuel ‘Tyson’ Ushona ota ka tsakanena nomukondjithi gwe Carlos Herrera omukwashigwana woo gwa Argentina molugodhi lwondjundo yoInternational Welterweight momadhingoloko geli 10. Tyson okwa ti ota ka kondja opo asindane mokudhenga Herrera oshoka ye oye eli ponomola ontiyali moku mona ompito a ka kondjithe enyakwa ndyoka lina epaya ndika muuyuni. Ngele okwa dhenge omuArgentina nguka nena ota ka hedha popepi elela nompito oku ka kondjela epaya ndyoka mbala.
Immanuel ‘Prince’ Naidjala naye ota ka umba uuna wa kahandja sho ta ka kondja nomukondjithi gwe ngoka inaa tseyika natango manga. Omadhina gaabokisi yamwe mboka woo taya kuumba oongonyo uusiku mboka inaga tseyithwa manga.

 

Ku Otniel Hembapu

LEAVE A REPLY

Please enter your comment!
Please enter your name here