Where Others Wavered – Eipumomumwe papolitika

0
428

Oshiningwanima shomomasiku 10 December 1959 mono aavalelwamo ya tokola yaa kale taya thindilwa kongudhi kepangelo lyokatongotongo, osha li oshilanduli shethindilo kongudhi ndyoka lya li tali ningwa kepangelo lyongundu yo National Party yokangundu okashona mewiliko lya Daniel Malan, Hendrick Verwoerd na J G Strydom. Mbaka opamwe nooyakwawo yalwe mepangelo lyokangundu kaantu aashona oya toto oompango nooveta moparliamende ndjoka mwa li ashike hamu kala iilumbu. Ooveta ndhika odha li dha kankamekelwa komikanka dhokatongo. Mokati kadho omwa li ndjoka tayi utha kutya pokati komalukanda moka muna iilumbu naaluudhe opena oku kala ehala lyaana aantu, ndyoka tali gamene iilumbu kaaluudhe.Oveta ndjika oya li ya tulwa miilonga moSouth West Africa nomo South Africa.

Tse mboka twa li twa kala mOld Location otwa li twa lombwelwa kutya otuna oku tembukila kolukanda lwa Katutura,ndoka lwali konyala oshinano shookilometa ntano okuza mokati koshilando.Ndele tse otwa ti otwa hala oku tungilwa omagumbo goopala nawa, shampa ashike ngoka ogena okutungwa pomahala getu moka twa kala mOld Location naamoka omo mwa fumvikwa ootatekulu.
Ndele omahalo getu oga tindwa noku ekelwahi kepangelo, ngaashi iiningwanima yomomumvo 1959 tayi ulike.

Osoondaha yo13 September 1959 Oraata yokugandja omayele oya li ya ningi oshigongi shoka sha li sha kalwa ku Nel de Wet omukuluntu gwomalukanda. Poshigongi shika aakalimo yomOld Location oya tindi okutembudhilwa ko Katutura. Konima ishewe yiiwike ihamano mEtine lyomasiku 29 October 1959 oshigongi oshikwawo osha li sha longekidhwa kepangelo lyiilumbu. Aakalelipo yaavalelwamo pwaashika oya li ya za ko OPO, SWANU,Oraata yaawiliki kohi yOmukwaniilwa Hosea Kutako noshowo aawiliki ye li kohi yuuwiliki welelo lyaaDamara.Mbaka oya koleke ashike shoka ya tokolele kutya yo inaya hala oku falwa koKatutura.
Nonando aakalimo yomOld Location ya ti yo inaya hala oku tembudhilwa koKatutura,mEtitano omasiku 4 December 1959, aapolisi opamwe nomuwiliki gwomalukanda de Wet oya tameke okushanga aantu koonkondo ya tamekele moshitopolwa sha Damara hashi ithanwa D5. Moshitopolwa shoka aapolisi mbaka ya tameke , oya adha mo oshilyo shoraata ogandjimayele,August Gariseb sha tsondumbo netembudho lyaakalimo oku ya fala ko Katutura.Omashango ngoka oga ningwa omutenya manga aalumentu oyendji ya li yaya kiilonga onkene Gariseb okwa li a hupithwa kaakiintu mboka ya ponokele opolisi noku yi matukitha . Ndele konima ashike yokathimbo aapolisi mbaka oya galuka yeetelele omwaalu omunene gwaapolisi. Mbaka noya kwatapo aakiintu mboka ya li ye ya ponokele.Okukwatwa kwaakiintu mbaka okwa fala sigo oompoka kutya aakiintu yomOld Location oya nyanya okuya kombelewa yokomufala Daan Viljoen oku ka ulika okwaanombili kwawo.Tango oya ende okuya kombelewa ye nohugunina okegumbo lye.

Ndele Viljoen okwa kala teya henuka inaa hala oku tsakanena nayo.Konima sho a tokola oku ya popitha okwe ya lombwele kutya naya ye kuMangestrata CL Hager.Nguka okwe ya lombwele kutya oye na oku taambako shoka sha ningwa ku muni, a ti epangelo olya hala oku mu pa omagumbo omawanawa, omolwuuwanawa weni nowaanona yeni onkene omuna okupandula. Omuna okupandula muni molwa iimaliwa mbyoka a longitha peha lyeni.”Ndele Watja Kaukuetu ngoka a li omupevi peresidente gwoSWANU okwa lombwele Mangestrata ngoka kutya okwa puka ngele epangelo lye ota li dhiladhila kutya onkalamwenyo yomuntu otayi hwepopekwa ko ku mu tungila egumbo ngoye to mweetha inoo mu kwathela we sha.Ishewe tse otwa tala etembu ndika lyaali mombepo yomautho gIigwana ya Hangana ndele etembudho ndika otali ningwa mombepo yooveta nomulandu gwoveta yokatongo.Tse katuna omaipulo kombinga yomwaalu gwiimaliwa mbyoka muni a longitha okutunga Katutura. Mbono uupyakadhi wawo yene,”.

Mangestrata Hager okwa tsikile ta lombwele aahololimadhiladhilo a ti” Katutura okwa tungwa okuulika aa Europa oyena oshimpwiyu nane aavalelwamo” Otandi mu pe omayele gandje ga hugunina kutya inamu ikuthila oveta miikaha yeni, ndele ihumbateni ongo aakwashigwana haya iyutha koompango.Itashi kwatha sha ngele ota mu dhenge omiste dheni mekuma.”Kaukuetu okwa yamukula Hager no ku mu pula kutya okwa dhiladhila shike mokupopy a ohapu ndjoka kutya ota ya idhenge mekuma, tse itatu tembukile koKatutura.Aantu mboka ya kwatwa oye li peni.

Olyomakaya omasiku 5 December 1959 aakiintu aanandjungu mboka yali ya kwatwa oya futu kehe gumwe iiponda itatu, ongo egeelo ndyoka yo ya pewa ku Mangestrata Hager. Aakalimo yomOld Location oya kala ya tongolwa pamihoko kokutya aaHerero, Aawambo, aaDamara, aa Nama nayalwe, olukanda nduka lwolwene olwa li oshitopolwa shaWindhoek na olwa li halu pangelwa kumuni ngoka a li ashike ena aanambelewa yaatiligane, mbaka oya li haya ningi omatokolo ga guma onkalonawa yaavalelwamo nonando mbaka ihaya pulwa opo ya gandje ezimino lyawo.Omatokolo ngoka ogali haga tseyithilwa aakalimo komukuluntu gwOld Location, Nel de Wet okupitila mOraata yokugandja Omayele.
Momautho ga muni omwa li muna limwe tali utha kutya opena oku kala omahogololo giilyo iipe yooraata yokugandja omayele moshitopolwa kehe. Omahogololo ngaka ogali haga ningwa woo pakatongo nopamihoko. Oshiholelwa oshilyo moraata ndjoka sha za moshitopolwa shAawambo nenge shaaHerero oshina okuhogololwa ashike kaakalimo yomiitopolwa mbyoka. Mbaka oya li haya monika kutya oya za miitopolwa mbyoka uuna yuulike kutya yo oha ya futu iifendela yomagumbo gawo nenge iifendela mbyoka hayi ithanwa yondunda.
Tse aagundjuka otwa longitha eutho ndika notwa ningi omahogololo sho twa hwahwameke aakalimo ya hogolole iilyo mbyoka yetu gama.Moshitopolwa shOvambo section 1 oshilyo shoka sha hogololwa osha li, Thobias Akuenye, mOvambo section 2 omwa hogololwa , Frans Kampala moHerero section 1 omwa hogololwa Frans Shiguedha.

Aakalelipo yetu ayehe oya li ya hogololwa nomawi ogendji. Moshitopolwa shaaDamara omukalelipo moraata yokugandja omayele okwa shunwamo. Iilyo mbika iipe oya li yina oshinakugwanithwa oku ninga iikonga mbyoka tayi kondjitha etembudho koonkondo lyaantu okufalwa koKatutura.Olukanda lwa Katutura olwa li talu kala kohi yewiliko lyoshikondo oshipe hashi ithanwa Bantu Administration and Separate Development mepangelo lya Verwoerd.Ngaashi sha kala omukalondjigilile oveta ndjika oya lolelwa tango moSouth West Africa omanga inaa yi ka tulwa woo miilonga moSouth Africa.
Okutembudhilwa kwaantu mbaka koKatutura ota ku ti mbaka otaya ka kala kohi yekondololo enene okuyeleka nethimbo ya li mOld Location. Ishewe okutembudhilwa ko Katutura otashi ti woo mbaka otaya ka futa iimaliwa omolwa omagumbo moka yeli gaashi gawo yene ndele ngoka oga muni. Iifuta mbyoka yo ya li yena okufuta oya li pombanda oku yeleka naambyoka yo ya li haya futu omanga ya li, mOld Location,moka ya li haya futu ashike iithilinga itatu nomapeni gahamano omolwomayakulo gopamuni komwedhi kehe.
Eyooloko olya li ndyoka kutya mOld Location omagumbo oga li gaakalimo yoyene omanga koKatutura omagumbo oga muni, onkene omuntu kehe ngoka itaa tsu kumwe nepangelo lyiilumbu otashi vulika ashike a tidhwemo megumbo.

Sho twa dhimbulula kutya epangelo olya li lya tokola shili oku tembudhila aakalimo ko Katutura nando ina ya hala , otwa iyunganeke noku ninga iikonga yoku boikota omayakulo agehe gopamuni mOld Location.
Onda hehela oshihauto shina embako na otwa hingi molukanda tatu popi momalaka agehe. OshiNama/Damara osha li sha popiwa ku hailwa Moses Garoeb, ngoka a ka ninga Amushangandjayi gwoSwapo noshowo Ominista Yaniilonga. Willy Watja Kaukuetu na Nathaniel Mbaeva gwo SWANU oya li taya popi moshiHerero, omanga ngame onda li tandi popi mOshiwambo , twa lombwele aakalimo yomOld Location kaa ya ye kosaala yomanwino ya muni, nenge kosaala yokino yamuni, nenge ya longithe oombesa dha muni. Okwiiteka okulongitha omayakulo agehe ngaka ga muni okwa li woo kwa yambidhidhwa kOraata yaawiliki kohi yOmukwaniilwa Hosea Kutako.

Shika osha longo nomayakulo agehe gamuni oga thikamekwa itaaga longithwa noshowo itaaga longo mOld Location.Aantu oya li ya nyanyukwa okuuva omalaka gawo taga popiwa membako oshikando shotango.

LEAVE A REPLY

Please enter your comment!
Please enter your name here