Aaakulupe mOnawa ya dhana oKrismesa 2013

0
359

Oshali tashi nyanyudha oku tala aakulupe taa kongoloka ta yi itsile koontondje, yeli miihauto ta yeya okudhana Okrismesa yawo. Oshinenenima shika oshaningilwa Megongalo Onawa ELCIN eti 21 December 2013.

 

Esiku olyali lya longekidhwa nawa, naakulupe oyali ya holoka oyendji yaadha po 200. Okrismesa ndjiino oyali ya longekidhwa komugundjuka Elifas Ya Samuel Heita ngono a yambidhidhwa melongekidho ku Thomas Nalusha, ayehe aakwanegongalo megongalo Onawa noyi iyambele okuyakula aakulupe no ku ya ningila oshituthi shoKrismesa.

Aakulupe oya ningilwa ElongeloKalunga kOmumbishofi Josephat Kashindi Shanghala, Omumbishofi woshikandjongeleki Uuninginino. Omumbishofi oye aningi Euvitho nokuyakula aakulupe nuulalelo Uuyapuki. Aakulupe oyali yuuvite ombili mokupulakena Ewi lyomumbishofi ye mu etha nale.

 

Etaambo lyaakulupe olya ningwa kOmusita wEgongalo Hiskia Ileni Hambiya.  Oshituthi osha kala tashi mwenyekwa noondjimbo mewiliko lya Jona-Loteni Abraham nosho wo Ongundulwiimbo yokOndjakulwambinga Olukekete yEdhina Longeleni Omuwa Nenyanyu. Aakulupe oya popithwa wo kOmukuluntu gwo Namibia Funeral Supply mUutapi , Simon ya Mikael Heita, okwe ya tsu omukumo ya dhiginine eitaalo nando yeli methimbo lyuukulupe opo ya gandje oshiholelwa kOmapipi tageya. Omukuluntu gwo Namibia Funeral Supply,  Simon Heita okwa gandja omagano gUulindeli 2014 ku kehe omuntu alipo noshowo N$ 1000 molwoshituthi shika sha Krismesa.

 

Omugundjuka Elifas Heita okwa tsu aakulupe omukumo opo yakale haa dheula omalutu gawo esiku kehe, naakale hayi inyenge, ngee miilonga yesiku kehe, okuhinga oombasikela kungoka ta vulu, okweenda, oku iyutha, okutondoka oshowo okukala taya ningi omadhewo galwe.

 

Omusitagongalo Hiskia Ileni Hambiya mokupopitha aakulupe okwa lesha omatumbulo gaza mu Lukas: 2:28-32 tati omukulupe Simeon mokumona Jesus sho etwa kotempeli ku He na Yina, okwa tumbula:  laleka ndje Omuwa ndi ye  nombili, oshoka omeho gandje oga mona ehupitho ndyoka weli longekidha montaneho yaantu ayehe.

 

Omumbishofi okwa kumike aakulupe noku pandula  omulongekidhi  kutya okugongela aakulupe oya mona ompito yoku popithathana nokudhimbulukithathana omathimbo gonale sho yali haayi komalongelo Kalunga naasho yali haa dhana omaudhano nosho tuu. Omumbishofi okwa tumbula kutya: Osha pumbiwa momagongalo getu nena okugongela aakulupe. Ihe omwaninga oshinima oshiwanawa nosha simana onkene, ina mushi etha.

 

Ombepo ya Tate Kalunga oyali ya wilike noya talaleke noku vululukitha oomwenyo dhaakulupe oku uhala pongeleka. Onkene Tate Kalunga na pandulwe. Oshituthi shoKrismesa shika okwa thanekwa shikale hashi ningilwa aakulupe omuvo kehe, na otayi tsikile okuningwa nokuhiya wo aakulupe yoongeleki adhihe.

 

Okuza mongeleka aakulupe oyayi koofaila hono yali ya longekidhilwa iikulya yawo nokutyapula esiku lyawo. Oya lile onyama yongalangombe, niikulya yilwe, oya topolelwa kehe gumwe onyama yongombe inayi telekwa opo yakalye komagumbo gawo. Kehe gumwe okwa pewa omboloto, osuuka, okofiwa. Taa esiku olyali ewanawa unene.

 

Tate Kalunga nayambeke omupiya gwe nguka: Omugundjuka  Elifas Heita opo a tsikile nokuyakula aakulupe megongalo oshowo moshilongo. Pehulilo okwiimbwa eimbilo 641 nOmusita Hiskia I. Hambiya okwagalikana. Aayehe ya holokele oya shuna komagumbo gawo nenyanyu.

 

Ku Hisikia Ileni Hambiya

LEAVE A REPLY

Please enter your comment!
Please enter your name here