Eefiye doumukainhu a fudikilwe shilimbilika ota di mono oixuna

0
211

ONGWEDIVA – Eefiye domukainhu oo a xulifa hanga eedula heyali da kapita ota di mono oixuna omolwa omapuko ile oilonga youkolokoshi oyo ya longelwe kuvamwe vomovakwapata pefimbo lefyo laina.

Venisia Lukas oo a dile komukunda Omunyekadi mOshitukulwa shaHangwena, okwa xulifile efyo ta li limbilike mo2006, omo vamwainagona ve mu hondjela mekumbafa nokumupaka konima ashike yokafimbo kanini eshi a xulifa.

Lukas oo vati okwa xulifile konima ashike yokafimbo kanini eshi a kema kutya oku udite pomutima. Meni leevili dili lwopu mbali okwa pakwa nale, noinima yaye mwa kwatelwa oikutu noikumbwafa oya fyuululwa po nale. Oshiningwanima eshi shali sha kumwifa ovashiinda novakwapata vamwe, vati osha fiya eefiye daye odo da li pepupi leedula 4 fiyo 18 di he na odjapo yefyo la ina no diheshi kutya ina okwa pakwa peni.

Omukainhu ou ali eli mepupi leedula 40, okwa xulifile konima ashike eshi a hokolola kutya oku udite ouyehame pomutima. Vamwe tava hokolola nokuli kutya eshi a pakwa omifipa dohonde yaye poikesho odali ta di tuna.

Josephinna Diyonisius (21) oo paife eli omunafikola koshiputudilo shopombada shaWelwitchia University ota ti omolwa oiningwanima oyo ya ningwa pefyo laina, ye noundenge vavali itava dulu okumona omakwafo opashimaliwa kepangelo molwaashi kapena odjapo yefyo oku holola kutya ina okwa fya shili.

Omolwa onghalo ei, Diyonisius okuli popepi nokutewatewa mo mofikola omolwa eengunga odo ina di futwa kofikola.

Omunyasha ou ta holola yoo kutya odula ya djako okwa li a tambulwa koshiputudilo shopombada ko India, nepangelo ola li le lilongekida oku mu futila, ashike eshi ina shi ningwa vali shaashi kali e na eedokumende  odo tadi holola kutya ye ofiye shili.

Kakadona ou ta holola kutya eemwedi mbali dopetameko okwa li a futilwa oshimaliwa shifike po N$3000, kuxe ou ha mono ashike ondjabi i fike po N$2000 keshe komwedi.

Omolwa ounyengwi woshimaliwa, xe ya Diyonisius i na dula vali oku mu futila.

Moku dimbulukwa ina, Diyonisius otati nakufya Venisia okwali ha nyangadala mokulandifa oinima yaye. Tati ina ka li nande omuvelaaveli.

“Onguloshi yokupendukila efiku a ka xulife, onda ile ko keumbo lavo, hano koomeekulu, shaashi fye otwa tekulwa kootate, ndee te tupe eefewa noimaliwa. Okwali ashike eli nawa, kali ta vele ashike mboli okwa li ashike ta lekele.

“Efiku la landulako,manga tuli po andaxa yongula po 08h00 otwa lombwelwa kutya meme okwa xulifa lwopo 07h00. Otwa ya komeekulu me endelelo, nomuhongi wetu umwe ashike meumbo ina tu kalamo shaashi otwa lombwelwa tu shune diva kofikola tuka shange ekonaakono. Eshi twa ka aluka lwo po 10h00, ohatu lombwelwa kutya meme okwa fudikwa nale. Ovanhu va aluka nale komaendo noinima yaye oya fyuululwa po,” Diyonisius ta hokolola ye ta lili.

Ehokololo eli ola kolekwa yoo komukulu wa Josephinna, Bertha Diyonisius opamwe na vamwe vomovashiinda ovo ta va ti kutya eshi Lukas a hondjelwa mekumbafa omifipa dohonde poikesho yaye odali natango ta di tuna.

Taku hokololwa kutya, omukainhu nomulumenhu ovo ve li ovamwainagona vaLukas ova li me endelelo okumupaka, nonande omukulupe ina yaLukas pamwe novakwapata vamwe va pula ngeno ku teleeliwe opolifi, ashike edi vati o da wila momatwi a fita.

Bertha na Josephinna Diyonisus tava hokolola yoo kutya ova pula inagona opo e va ulikile opo pena ombila ya ina ndele okwa ti ita dimbuluka kutya ove mu pakele peni.

“Paife otwa kula, hatu dilaadi tu katule ko emanya kombila ngeno efiku limwe, ndee katushi apa meme a pakwa,” Josephinna Diyonisus tati.

Eshi vali sha udifa unene ounona ava nai, osheshi ovanambelewa kouministeli woipambele yomeni kEenhana va kanifa eembapila odo va pelwe komalelo opamifyuululwakalo nokopolifi onga eedombwedi odo dali dina oku va kwafela va mone ngeno odjapo yefyo yaina.

Omunambelewa omukulunhu mouministeli woipambele yomeni kEenhana Martin Shimbudhi, okwati osho eefiye da Lukas tadi dulu oku ninga oku shuna ashike keembelewa domalelo opamifyuululwakalo nokopolifi, opo di moneko omapopilo amwe, shaashi ombelewa yaye ka i na vali apa ta i dulu oku hanga eembapila edi da kana.

Omukulunhu mombelewa haipopileko opolifi Edwin Kanguatjivi okwa ti ye ita dulu naana oku koleka kutya osho sha ningwa kovakwapata va Lukas oshili paveta ile kashili paveta, shapo ongee olutu la nakufya ta li fudulwa mo koo ku ningwe omakonaakono, ku talike kutya oshi etifi shefyo osha shike.

Kanguatjivi ta wedapo tati ngee eefiye edi oda nyengwa oku mona odjapo yefyo la ina ota va  dulu okuya koshikandjo sheameno loomeme nounona mopolifi opo va ka kwafwe.

 

KuHelvy Shaanika

LEAVE A REPLY

Please enter your comment!
Please enter your name here