Merino omudhanitanga gwonale okwa hulitha

0
235

WINDHOEK – Omanga oshigwana shaadhanitanga noshowo shaamboka yehole etanga opo tashi kondjo okudhimbwa oluhodhi ndoka shali shina omolwa eso lyaadhani nale yospana yo Blue Waters, kokutya ,Theo “Don King” Mutumbulwa  na  Petrus “Kaboy” Shovaleka oshowo omugameni nenge omudhani gwokonima gwospana yoCivics, Pieter “Ralla” Klaaste –oshiponga shimwe kombinga yetanga osha holoka ishewe.

 

Omudhani nale gwokonima nenyakwa lyospana yoAfrican Stars, Zebedeus “Merino” Kandonga,  a hulitha konima yokukondja ethimbo ele nuuvu wosuuka. Omudhani gwaantu eholike koyendji nguka okwa ilongo okudhana etanga lyokoompadhi mOkahandja, moka yamwe yaadhani yo African Stars  yomomimvo dhomilongo heyali noshowo omilongo 80 ya dhana pamwe naye ,okwa manene oondjenda dhe moshipangelo sha Windhoke omaandaha oshiwike shika.

 

Merino gwomimvo 63 okwa kala kee uvite nawa uule womimvo odhindji konima sho a li a kwatwa kombanda ndjoka ye mu thigi itaa vulu okwiinyengitha ombinga yimwe na okwa li woo ihaa vulu we okupopya nawa.

Okwa joinine ospana yetanga lyokoompadhi mo Katutura omumvo 1974 yedhina Black Beauty Chiefs (BBC) okupitila mospana ya Flames FC sho a popilwako nawa ku kuume ke okuza mepipi lyuumatyona mOkahandja Oscar “Silver Fox” Mengo.

Omudhanitanga nguka eholike kwaayehe ye ihaa popya popya okwa li ha keelele nawa konima yospana yawo, na okwa li gumwe gwaadhani mboka ya li ya dhana pethimbo African Stars ali a dhengemo oBlack Africa muudhano wekopi lyo Daves Cup. Okwa li woo oshitopolwa shospana yo African Stars ndjoka ya kala nokudhana nawa sho uudhano mbuka wa egululilwa omihoko adhihe omumvo 1977.

Pethimbo a dhanene ospana yo African Stars Merino okwa li  gumwe gwomaadhani yasimana yokonima pamwe naadhani ngaashi Kierie Tjituaiza, Bush Menjengua, Albert Tjihero, Kariirii Katire, Soetman Kaune, George Gariseb, Willy Rwida na Lemmy Goagoseb.

Merino, ngoka a tseyika woo nedhina lyezimo lyawo ongo Karonga,okwa li omukwiita omwiinekelwa ngoka a thigala mospana ya African Stars nokonima sho ookume ke naadhani ooyakwawo yomOkahandja ya tokola okutotapo o Liverpool FC pethimbo sho oshilongo opo sha manguluka.

 

Ku Carlos Kambaekwa

LEAVE A REPLY

Please enter your comment!
Please enter your name here