Natu longeni

0
214

Wonale okwa tile “omukaa wekulonga oshoma, ondjala yeku longa omupetuko.”

Sha hala kutya ovanyasha Ovanamibia, natu li hongeleko konghalo yoluhepo omo vahapu veli mo. Eemhito dokunyangadala tushiwe tuli monene sha shomeendjato, tuli tekule fye vene opo dili, natu pashule ashike omesho etu ndee hatu di longifa.

Epangelo oletu pa eingido opo tu kale tuna ounwa woshilongo shetu, womifyuululwakalo detu odi tu na okutala onga oufiye wetu.

Meingido omo ovanyasha ova kumaidwa opo va kale hava longo noudiinini, veshi oku li longela kuvo vene, veli yambulepo voo vene, vo va yambulepo oshilongo shavo.

Ngee otwa dilaadila nawa, ounghulungu otu u na, oilongifo otu i na, ashike omutima nomesho etu ina a tonata opo tu longife oitalendi yetu oyo ita i tupula nande ofilinga, noilongifo yopaushitwe, ihapu oyo tu i na yoshali.

Ngee wa tale oomeekulu noomeme, ova kala ve na eendjibololo, omo va kala tava hongo oitoo yokukwatela nomatiti oku lila.

Ovanyasha va ngapi va kendabala oku shikula meenghaku doomeekelu? Vangapi va tokola oku fyuulula efyuululo liwa tweli fiilwa.

Fye eshi twa putuka tu dule oomeekulu, ohatu dulu oku uyapo noutekenika upe ndee hatu longo oiyaxa,eembiya, nomakopi opashinanena. Shidulife eshi keshe efimbo ovanyasha hava kala vakalela eendingosho tava longifa nai oikolwifa.

Oinima oihapu, omo ovanyasha tava dulu oku li unganeka ndee tave uyapo nonima oyo tai va etele oiyemo.

Otuna eemwoongo, osha yela kutya ngeenge otwa ningi omapekaapeko a wana, meemwoongo detu ohatu dulu oku mona mo iyemo i li nawa. Ponhele yokuteelela ovakulupe va kole fye hatunu nee, kwafa ku hena mongula, natu tale kutya oha tu uyapo noutekenika wafa peni, tu longulule omaongo etu ndele hatu a tula momakende dele nafye hatu landifa, nokondje yoilongo, ngaashi naana hatu lande omakende ta a di kondje oilongo.

Oinima ngaashi omaongo, omalunga, oitoo, oimbale noshotuu, oyo oufiye wetu. Twa patululilwa oshivelo kovakuluvonale, natu tameke apa va xulila. I na tu kala ashike hatu pitile koundingosho eshi tali piti fye hatu imbi tombo efenge mwali wange ngee kwa toko.

Kakele kwaasho, Omafiku kemale eshi Omupresidente Pohamba a shivifa kutya epangelo ola tokola opo li tunge omaumbo e fike po 100 000 moule weedula omulongo dili komesho.

Ponhele yokukala omutumba fye hatu popyaapopya hatu ulike epangelo nova leli omunwe,natu fikameni, tu ulikile ova leli vetu kutya oha tu dulu oilonga.

Oshinima eshi shilipo shokunyatipaleka ovalaule naavo vali nale va dengelwa pedu, hano o BEE, oshiwa ashike ofye vene tweshi nyateka nokushi shundula.

Teelela ashike utale omaumbo oo ta a kayandjwa a tungwe kwaavo va tofwamo onga eeBEE kutya ota a kala a fa peni.

Okutya ngoo omunhu a pewe okondalaka ita mane. Nge a mane, odula i na i pita po loo eumbo ola tenda, ngee opate oina oilambo ile ya kungululwa po komeva.

Ope na ngaho shili ovo hava kala va pewa eekondalaka medina loBEE ndele ohava longo oilonga yavo. Ovo hava ningi ngaho napaye ongonyo.

Oshitukulwa vali osho tuna oku tala, osho ounamapya, okawe ketu Ovanamibia, okawe kAfrika nounyuni aushe koonono.

Ounamapya nounaimuna owa fimana neenghono, shaashi omo hatu mono oipalwifa, nongee twe li tula mo, onakwiiwa yaNamibia ota i vema yafa etango, shaashi ohatu li palula fye vene, fye oha tu li etele oiyemo.

Nge tweli tula mounamapya nounaimuna twa kwatelamo eongelo lomeva, ehavalo loshikukuta kuli udupo tuu vali opo.

 

LEAVE A REPLY

Please enter your comment!
Please enter your name here