Ovanalusheshete va twala oshitemo kOuhamba

0
217

ONAMUNGUNDO – Ovakalimo voshikandjo shaNalusheshete mewiliko lElenga Eino Shondili omafiku aa ova ka limine omya yavo kouhamba waNdonga, mangha kwa tuta nawa.

Ngaashi naana omufyuululwakalo wa ufa  kutya keshe kulombo ovanhu nava kale hava ka lima ondjabi kouhamba, ovaNalusheshete navo yoo ova wanifa po omufyuulukalo ou.

Ohamba yaNdonga Immanuel Elifas oya pandula ovanashikandjo shaNalusheshete eshi va eta ondjabi manga oilya inai tupukilila manga ku na oututo. Ohamba oi na omukumo kutya ngee ovaNamibia ova mane oilonga pefimbo otava ka likola eteyo liwa nokukala nomaumbo e na eendja. Okwa pula oshiwana  ashishe shi diinine oilonga  yopamufyuululwakalo ta kumaida ovo ve li peendingosho va dje po va ka longe omapya.

Poshinenga tuu opo, Elenga Shondili olo la findikila lakwatela komesho ovanashikandjo valo ola kumika ovalimimapya va diinine oilonga yopamufyuululwakalo opo oshiwana shi kale neendja dopamufyuululwakalo momaumbo.

 

Oshikandjo keshe mOndonga ohashi  tumu ovanhu tava di moipundi va ka lime eemya davo.

Ondjabi ohai limwa kongudu yovanhu va shaama tava imbi, tava kuwilile voo ovakwati voilya tava landula mo tava yange. Ondjabi  otai limi tai imbi, tai kuwilile, tai nu oikundu, tai li oifima. Monakudiwa ngee ovanhu tave ya kumenekela kouhamba ohava etelele  eembiya nomaufila noivelelwa okuteleka oikulya yavo omakumbafa nomatemo. Ashike molweefo eli  mouhamba omu na omuteleki woikulya . mouhamba kamu na omukaa, omu na ovateleki voikulya, ovalimindjabi ova dungilwa omavela oikundu.

Pamufyuululwakalo wOshindonga, oikandjo ohai ya kulonga kouhamba  hai longwa kovakalimo. Oo omufyuululwakalo wOshindonga, ovakwashiwana va longe epya louhamba okudja keendima, eteyo, nexwo fiyo oilya aishe ya pongololwa po poshipale. Omhito yoo iwa okulonga omapipi oilonga yopamufyuululwakalo ngaashi oilonga ya  longwa kovatetekeli  va kala peehamba.

Oilonga aishe  mouhamba oi na ku longwa kwaavo hava menekele, vamwe ova kala nokutelekela eehamba nokulilonga omifyuululwakalo dOshindonga, eyakulo, eihumbato ,efimaneko lohamba nokwiilonga eenghedi adishe domouhamba, da wana kutambekidwa komaludalo okomongula  ngaashi okwiipweda ngee ohamba ngee tai ya poima, to uya ilo to di pohamba ngaashi ovatetekeli ve shi ninga nopomafimbo eehamba dooNehale la Mpingana.

 

Komutoolinghundana

LEAVE A REPLY

Please enter your comment!
Please enter your name here