Ovanayena moutile wokuliwa noudiyo

0
271

ONGWEDIVA – Ovakalimo vomomikunda dOshikandjohoololo Onayena nopoushiinda oveli monghalo youmbada omolwa ovanhu vati veli poukamba vopomikunda davo tava dipaaa ovanhu noudiyo.

Mopaife ngaha ovanhu va fika pu vatano ota ku hokolwa kutya ova fya konima eshi va nwa omalodu a tulwa oudiyo poundingosho vopolukanda laNayena.

Kansela woshikandjohoololo osho Max Nekongo ota hokolola kutya omanyeyeto oludi eli omo lela eli mo moshikandjohoololo shaye, ashike ovakwashiwana ita va holola lela ondjungu mokuyandja ombangi kopolifi opo iye kefina loshinima osho.

“Ashike oundingosho oveli koshi yoveta yopamifyuululwakalo. Onda popile ngaho nelenga loshipundi shaNiimwandi,  Naeman Hamalwa opo a tale moule woshinima osho. Oveta yopamifyuululwakalo oya yela. Ngee opena oundingosho tava fekelwa, nava pate manga manga omakonaakono ta apu. Nge mwene wokandingosho oku na omunailonga waye ta fekelwa, nemu tule manga pedu, manga omakonaakono ta apu.

“Oshiwana vali kashi udite ombili shaashi opolifi oha i ti ashike ota i konaakona oshinima ashike iha i aluka neevali i tu lombwele oshidjemo shomakonaakono,” Nekongo tati.

Komufala wopolifi mOshitukulwa shaShikoto Komishina Anne-Marie Nainda okwati ombelewa yaye oya uda omanyenyeto nomalundilo ovanhu tavafi konima eshi va pewa oudio pOnayena. Nainda okwa ti okwa pa komanda woshitaasi yo polifi pOnayena opo a konaakona omapopyo oo. Ta udanekele omutoolingundana kutya ote mu alukile ashike ina aluka. Ongodi yaye oya kala tailili ndele ita i nyamukulwa.

Moshiningwanima shi talala osha ningwa Olomakaya la djako omo omukainhu wokomukunda Iikokola moshikandjohoololo omo tuu omo, vati okwa tameka ta nyenyeta ouyehame womedimo, konima ashike yokafimbo kanini eshi a landa nokunwa omalodu okatokele pukamwe komoundingosho ovo taku fekelwa kutya opo pena ovo tava yandje omiti.Omukainhu vati eshi a mona kutya ota tetwa medimo okwa lombwela nakulandifa pokandingosho emutwale kokakilinika shaashi oye omu landifa okatokele.

Eshi va ya pokakilinika omulandifi wokatokele vati okwe li vaka okastoma yaye oyo konima ashike yokafimbo ya tameka ita i popi. Omukainhu vati okwa ufanenwa o ambulansa imu twale koshipangelo kOnandjokwe, oko a lekelwa konima yefiku limwe. Eshi aya keumbo omukainhu okwa tameka vali ta ehama, noku shunwa ko koshipangelo.

Omukwapata womulumenhu umwe a pakwa oivike ivali ya pita otava hokolola kutya omukainhu umwe womwaava taku fofodolwa kutya  otava yandje omiti, okwe li hokolola nale moipafi yofamili ya nakufya noyeendobwedi dimwe kutya oye a yandja oudiyo ku Hafeni ya Nelulu.

Omukainhu vati okwa hokolola kutya okwa yandja omuti wa fuluka, ku Nelulu nelalakano,  opo a hafye diva.

Omukwapata wa Nelulu okwa lombwela Kundana kutya mumwaina okwe uya ashike efiku limwe keumbo, tati oku udite ta lika medimo.

“Otwe mu pula nge okwa nwa ngoo omashini (ofresh milk) shaashi opena omahokololo ovanhu tava yandje omaudiyo pOnayena. Ye tati ngoo okwa nwa, ta tumu vali okapakete kakwao komashini. Okwa ninga nee omafiku ta nyenyeta ngaa medimo, eshi taku ti naye koshipangelo ina hala  ota nu ashike omashini,” omukwapata wa nakufya ta hokolola.

Konima yomafiku manini, Nelulu okwa ka ombokelwa neenghono osho sha etifa opo ovakulunhu vaye ve mutwale kundohotola wopaumwene oo ekemu tumina koshipangelo kOnandjokwe oko aka tambulilwa meembete.

“Efiku eli aka xulifa, otwa yako kuye koshipangelo ndee hatu kala ko fiyo opo 19h00. Otwa hanga ngoo ta kala omutumba atu mupe ngaa oikulya, ashike okwa kala ashike ta kungu. Keshe eshi to mupe ote shi kunguko, nde eshi tashi diko oshi laula fokofoko. Okanya kaye nelaka ola li li laula loo ola tenda omifya, dakula dafa oshana sha pwina,” mumwaina ta hokolola.

Ongula yefiku la landulako, ofamili oya lombwelwa kutya Hafeni okwa xulifa ngonguloshi po 20h00.

Meenghali omwe keuya omulumenhu umwe kaume ka nakufya vati ena oiwanga tati elao. Vati okwa lombwela ina ya nakufya opo oiwanga oyo i twikwe poshivelo shondunda ya nakufya, yo i kale ta i tekelwa fiyo efiku lefudiko i ka twikwe kombila.

Omulumenhu ou vati okwa lombwela ovalilafya kutya Hafeni okwa pewa okatokele ka lumbakanifwa nombike noudiyo, nelalakano lo kuka twika oiwanga kombila yaye oku keelelwe ovo ve shininga veheshi ninge vali.

Ofamili oya halulwa kehokololo eli, no ya ufana opolifi, nomulumenhu ou vati ehokololo laye okwe li hokololela opolifi li li ngaashi li li.

Omolwa ehokololo likumwifa, ovakwapata ovo vali vena elalakano loku paka omudimba waHafeni nande i na u tandwa, ova tokola opo va pule u tandwe.

“Ovanhu vamwe mofamili ovo va li kalela ndohotola eshi ta tande ova ti nakufya kena omandjadja meni laye omu na ashike edimo moo omwa laula ashike fokofoko fiyo opofingo. Ashike ndohotola okwa ti omanyamukolo oshidjemo shetando ota euya ashike konima yeemwedi hamano,” omukwapata ta hokolola.

Ovo taku fekelwa kutya ova ninga oihakanwa youdiyo wopOnayena omulumenhu vali umwe womoshikandjohoololo omo oo naye a landa otombo ndele ta i nayo keumbo oko aka nwa namushiinda shaye. Ovalumenhu ou a landa otombo okwa fya konima yomafiku avali, namushiinda shaye okwa fya konima yoshivike.

Onghendambala oku mona  enyamukulo kelenga Hamalwa nalo yoo ola xulila mounyengwi shaashi ongodi yaye oya dima.

 

Ku Helvy Shaanika

LEAVE A REPLY

Please enter your comment!
Please enter your name here