Umwe aya moshipangelo eshi a dipaa fimbifimbi

0
1045

ONGWEDIVA – Okamati keedula 16 okali ka twalwa meendelelo kOshipangelo kOshakati ke li monghalo ii, shalandula vati eshi ka dipaa fimbifimbi.

Delila Mbabi wopOnelago popepi nOngwediva, ina yokamatyona oko ota ti hasho oshikando shotete okamona taka dipaa fimbifimbi. Ashike oshikando eshi ounona vaye ova li va haluka neenghono eshi mumwaina a tameka oku nyenyeta kutya ota ehama omutwe no pomutima, nokwa kambuka, konima ashike yominute dinini eshi a dipaa fimbi fimbi oo a hanga mokombifa yambulavo.

“Fye otu wete kutya opa enda ashike eemhepo da nyata, fimbifimbi keshi wongaho, shalongo shiveli wange eshi oku ilikana, a likanena okamwaina, ngeno walye tuu,” Mbabi tati.

Mbabi ta hokolola kutya nonande petameko ovaneumbo kava li va limbililwa eshi va hanga fimbifimbi eli mokombifa, eshi okamatyona kaka tameka oku ehama, ova ka kwatwa koumbada.

“Otwe ke lipula kutya osha enda ngahelipi fimbifimbi a pitilile eenduda dikwao ndee ta ende fiyo okokombifa ina monika, opena epuko,” Mbabi tati.

Eshi okamati ka tameka oku ehama, ounona ovo vali meumbo ovo aveke ova ifana omukulunhu poushiinda oo eva lombwela vape mumwaina omuti wouyehame, ashike eshi ina shi kwafasha.

“Efimbo alishe olo shiveli wange okwa kala ashike ta ilikana. Naashi va mona kutya mukwao okwa kambuka, ova pita tete pongeleka opo va ka ilikanenwa, nomufita okwe va lombwela ve mu twale diva koshipangelo konima yomailikano,” Mbabi ta hokolola.

Eshi okamona kadona kaMbabi ka fikifa nomumwainamati moshipangelo, vati okwa li eli monghalo ii neenghono, ashike konima eshi a ungwaungwa naye kovapangi okwa kala nawa.

 

Ku Helvy Shaanika

LEAVE A REPLY

Please enter your comment!
Please enter your name here